¹ Paulu, njindongu ya Yesu Kilisitu, anjisanene kukala kapositolo kaha kuhaka kumuzimbu uacili ua Njambi, ² ou yavalekele kusika muli vapolofeto zieni mu mikanda yazila, ³ uvavuluka Muaneni oze asemukile kuntanga ya Ndaviti kueseka na kumuvila. ⁴ Kuhitila mumuzimu uakuzuala vamuhiele zindzili ziakukala muana Njambi nakusanguka kufuma muvatsi, Yesu Kilisitu muata uetu. ⁵ Kuhilila muli ikeye tuatambula ngozi kaha navapositolo na kulemesa lutsilielo muahita mufuti ose, muomu yali zina liene. ⁶ Mumafuti aua, vakusana naua kukundama kuli Yesu Kilisitu. ⁷ Kuli vose vali mu Loma vose valema Njambi kaha vakavasana kukala vantu zieni vakuzila: Ngozi kulienu kaha ku unda kufuma kuli Njambi tata yetu na muata uetu Yesu Kilisitu. ⁸ Cakavanga, njasatsela Njambi yenga kuhitila muli Yesu Kilisitu nenu vose, muomu ya lotsilielo luove luvambuluile kuhitila mulifuti liose. ⁹ Njambi ikeye mpaki yange, ou enjekuzatela mumuzimu uange mumuzimbu uamuli muaneni, hakeko hajatualelelaho nakutumbula ove. ¹⁰ Ange liose njekuhulisa mukuvundila cange nguange muose mucikukela ange hamosi njikuvezika vuavuno muvisinganyeka vua Njambi na kuiza kulienu. ¹¹ Ngece omu ange njinakutonda kumimona enu, nguange homisi ange njimuaveleko muzimbu ua vuana vua muzimu, mangana mukale nazindzili enu. ¹² Omu mukeko, ange hasimbuile na kukola kunjikuasa mukati kenu, kuhitila mulotsilielo luaveka, luenu kaha luange. ¹³ Kaha Ange kanjesi nakutonda enu mukale vakuhona kualumuka, vamuanetu, hakeko ange hanja fumine kuiza kuli enu ( Vunoni vanjisueka nakulelo), mangana mukale nayimosi mihako mukati kenu ceka naua, ngece omu ange munjili njakele mukati kavose va kamafuti. ¹⁴ Ange yange mukamukuli vose va halase kaha nava nyamuiza kuli vose vazangama nava vahulama. ¹⁵ Vunoni, ngue kuli ange njalivukisa na kuambulula muzimbu kuli enu muli mu Loma. ¹⁶ Muomu Ange kanjesi natsoni namuzimba uacili, muomu yinapu zindzili ya Njambi zia kuavola vose va tsiliela, cakavanga kuli Yundeya kaha nava Halase. ¹⁷ Muonu muli eci Njambi vakavusunga vakavasolola kufuma kukutsiliela kuya kukutsiliela, ngue omu muva soneka. "Vakavusunga vakayoyela kulutsilielo." ¹⁸ Muomu vutenu vua Njambi vaka lusolola kufuma muilu hali vose kavesi va Njambi kaha nava vakuhona vusunga ha vantu vaze kuhitila mukuhona vusunga vakuatele vusunga kunima. ¹⁹ Eci cikeko muomuo cazivile njambi alisoluele kuli vakevo. Muomu Njambi avasololueleleco vakevo. ²⁰ Muomu kavekumona kuvuka ceni, lizina lie lia zindzili zia haya miaka kaha navu Njambi vueni, vuasoloka muacili, matangua ose kufuma hakupanga lifuti, vavimona kuvuka vuma viapangele, mangana vahone muakuli hakuila. ²¹ Muomuo, amba tuhu vantantekeyele Njambi, kavakele nakumulemesa ikeye ngue njambi, amba kumutsatsele cahi. Cakuhona, vezile nakukala vahulama muvisinganyeka viavo, mumitima yavo muakele visinganyeka viamilima. ²² Vali vulukile kukala vamangana, vunoni valumukile kukala vileya. ²³ Vatambasianene kuviuka ca Njambi uakuhana pola mucifuanesa civapangele ngue cakupolesa muntu, kaha kutuzila, na tusitu, nevi viekukalava. ²⁴ Haze vene Njambi uava hanene vakevo kuli mbimbia kumitima yavo yakuhona kuvuka, yakumivila yavo nakuhona kulilemesa mukati kavo vavene. ²⁵ Cauze atambasianene vusunga vua Njambi vua makuli, kaha uze ekutsikamena kaha nakuzatela viapangele menga apangele. Ou uakukisuila miaka yose. Amen. ²⁶ Muomuo yeci, Njambi avahiele kuyanda nakusauala ca tsoni kuli vampuevo nakutambasana vusoko vuacisemua vaze vose kavakele na cisemua. ²⁷ Munjila imolika, vamala naua vaseza vusoko vuavo nava puevo nakueci mukusimbula cavo hali umo namukuavo. Ava vakele vamala vaze valingile viatsoni nava mala kaha vatambuile vavene mulonga kuesekesa nomu muvalingile muamupi. ²⁸ Muomuo kavantantekeyele kukala na Njambi muvisinganyeka vuavo, avahiele kuheta ha mangana amazika kanua, mangana vahone kulinga viuma viacili. ²⁹ Vasulu nakuhona vuololoke, kuluua, vukenya, kaha na luiso. Vasulu navukeya, nakutsiha vantu navikonkoziola, makuli, nakoko. Vakeko vakakuyongola. ³⁰ Vihuanga, kuzinda njambi, kusuuntu, kulivua, kulitaka munjila yakulinga via santana; kavekuononoka kuli visemi. ³¹ Kavesi namangana, kavesi nalutsilielo, kaha na kuhona ngozi. ³² Ve kuntantekeya zisimbi zia Njambi, vaze vekulilongesa vuma nkana vakatambula kutsa. Vunoni kati kaha vekulinga eve vuma, vatela kuntantekeya vakuavo vaze vekulinga kuli vekevo.