¹ Yehova ua handekele na Mosesa ha viana via Moave ku Yundau ku Yeliko ngueni, ² ''Valekenu vantu vamu Isaleli vahieko vimo ku vusuana vuavo vua mavu kuli vaka Levi. Vatela kuvalia zimbaka ziakama kutumamaho na mavu akulila vimuna anazinguluka kuzimbaka. ³ Vaka Levi vakakala nezi zimbaka zia kutumamaho. Mavu akulisile vangombe ziavo, matanga, Navimuna, vikuavo . ⁴ Mavu akulisila vimuna azingilika mbalaka yakama aze vavakahia vaka Levi muatela kuvatangununa kufuma ku zimbango zia mbaka na likombakazi limo zimbango zia mbaka kufuma ha mucipimo ca likombakazi limo muzimbango ziose. ⁵ Muatela kupima cipimo ca makulukazi avali kufuma hambandza yambaka yakama kutala kumuntuntuko, na mankulukazi avali kutala kumusamuko, na makulukazi avali kutala kumu lahuko, na mankulukazi Avikuviti avali kutala kuvuhili. Aua akakala mavu amumbaka yavo. zimbaka ziakama zikakala hakati. ⁶ Atanu na limo lia zimbaka ziakama zimukahia va Levi ziatela kukala ngue zimbaka zia kusuna. muatela kuhia evi ngue ngalila kumuntu uze atsihile mukuavo akutmama. Cikuavo naua vahienu zimbaka ziakama makumi auana - na vali. ⁷ Zimbaka zimukahia kuli va Levi zikakala ziose hamo makumi auana - na atanu na atatu. Uatela kuvahia mavu akulisilaho. ⁸ Miyati yakama ya vantu vaku Isaleli, miyati ize ili namavu a engi, vayela kuhia zimbaka ziazingi miyati yeyindende vakahia zimbaka ziazindede. Muyati uose uatela kuhia vaka Levi kuesekesa na cihanda cize catambuile.'' ⁹ Kaha Yehova ua handekele kuli Mosesa ngueni, ¹⁰ ''Handeka kuvantu vava Isaleli na kuvaleka nguove, 'Omu mumukazavuka Yondau na kuya muli lifuti lia Kanana, ¹¹ Sikaho uatela kusakula zimbaka ziakama kukala zimbaka zia kuvandelamo enu, cihela cize muntu uze akutsiha mukuavo cakuhona kuntantekeya akuvandamo. ¹² Ezi zimbaka ziakama ziatela kukala zia vuvando vuakufuma kuli vakakumutsiha cakuhona kumana na kumu sompesa ku citingitingi. ¹³ Muatela kusakula zimbaka zia kama zitanu na imo kukala zimbaka zia kuvandamo. ¹⁴ Muatela kuviukisa zimbaka ziakama zitatu kuhambakana Yondau na zitatu mu cifuti ca Kanana.Zikakala zimbaka zia kuvandamo. ¹⁵ Kuvantu vamu Isaleli, kavangendzi, vose vali nakutumama mukati kenu, Ezi zimbaka zitanu na imo zikutumama mukati zikakala ngue muvuvando kuli uose uze atsiha mukuavo mukukamuka atela kutininamo. ¹⁶ Vunoni ngue muntu ivanavangela na veta mukuavo na citungu, kaha ngue mukuavo natsi, sikaho uze uakuvangela cacili vene napu mukakutsihia.Atela kumu tuala na kumu tsiha. ¹⁷ Ngue muntu uakuvangela naveta mukuavo na livue mulivoko lize likutsiha mukuavo, ngue mukuavo akutsa, sikaho Mukakuangela napu vene mukakutsiha. Atela kumutsiha. ¹⁸ Ngue muntu uakuvangela akuveta mukuavo na ciutua caciti cize cikuasa kutsiha mukuavo, kaha ngue mukuavo akutsa, sikaho mukakuvangela napu vene mukakutsiha. Atela kumutsiha. ¹⁹ Mukakuli hiluisilamo ku maninga vatela kuhaka mukakutsiha mkutsa. Omu muali kamuuaa, uze muka kuhiluisilamo kumaninga atela kumutsiha. ²⁰ Ngue akuveta mukuavo mucizindo cipue kumuasa vimo, oku namivandela. ²¹ Amba ngue mukuveta nakazindo na livoko lieni manga mukuavo atse, kaha uze muka mukakuvangela uze avetele atela vene kumu tsiha. Napu mukakutsiha. Uze mukakumuhiluisilamo maninga vanase kutsiha mukaku tsiha ngue vali uana neni. ²² Vunoni ngue muntu vamuvangela cakukasumuka na veta mukavo cakuhona kuntantekeya cizindo cipue akuasa vimo vize vikukuata mukuavo kuhona muaku liongela. ²³ Cipue ngue kuasa livue lize likuasa kutsiha mukuavo cakuhonoua kumumona, kaha mukakuvangela mkuavo. Vunoni evi vikeko via kulinga ngue uze muntu natsi. ²⁴ Munjila yangoco, citingitingi catela kutala ha kusompesa ca uze uakuvangela na kukuhilusilamo mumaninga kukavangeya aua masiko. ²⁵ Citingitingi catela kumavuko uze ivavangela kufuma kuzindzili ziava vakakuhiluisilamo kumaninga. cize citingitingi catela kuhiluisa uze uakuvangela kumbaka ya vandamo kuze kuatininine. Atela kuyoyela kuze vene kuheta na hantsimbu akatsiha mukuluntu uava sasendote, uze ivauavesele na mazi a kulela. ²⁶ Vunoni ngue muntu vamuvangeleye hantsimbu ili yose akuya nakuhambakana ndzita ya mbaka yakuvanda kuze kua tininine. ²⁷ Kaha ngue mukakuhiluisilamo kumaninga akamuuana hambandza ya ndzita yambaka yeni yakuvanda, kaha ngue a akutsiha muntu uakuvangela, mukakuhiluisilamo kali kakala na mulonga uaku tsiha. ²⁸ Muomu yakuamba nguavo muntu uakuvangela atela kutumama lika mumbaka yakuvanda nomu muali katsa mukuluntu uava sasendote. Hanima yakutsa mukuluntu uava sasendote, uze uakuvangela akuasa kuhiluka kucifuti kuze kuli vikumba vieni. ²⁹ Ezi zisimbi ziatela kukala cikuku cose kuhitila mucikota ca vantu ziavo vose muzingalila ziose zimua tumama. ³⁰ Uose atsihile muntu, uo mukakutsiha atela kumutsiha, Ngue muze vakambulula mumezi avakaleho. Vunoni mukaleho umo lize kaliesi kulingisa muntu kumu tuala kukutsa. ³¹ Cikuavo naua, kati mukatambule ndando ya muono ua mukakutsiha uze vanahie mulonga uakutsiha. Atela kumutsiha vene. ³² Kati mukatambule ndando ya uze umo nai kumbaka yakama yakuvandamo. Keti mukamutavese munjila eyi kutumama havikumba vieni kuvanga sasendote natsi. ³³ Kati mukapihise mavu munjila nkana muekutumama, muomu maninga akufuma kuli vakakutsiha akupihisa mavu. Cahi kuviukisa vakulinga mumavu ngue maninga ana muanieneneho, kufumisaho na maninga aumo uze ua muaniene. ³⁴ Sikaho kati mukapihise mavu aze muekutumamaho muomu njekutumamamo. Yange, Yehova, Ekutumama mukati kavantu va Isaleli.