¹ Vutsiki vuze lukungulukilo luose valilile helu. ² Vose vana vava Isaleli valiniengele kuli Mosesa na Alone. na kuli lukungulukilo luose lua handekele navo nguavo, ''Menga ngatuatsile mucifuti ca Ingito, cipue kuno kuli ou musenge! ³ Vikandzo Yehova via tunehelele etu kuli eci cifuti tutse kuma kuale? Vapuezietu na vana vava ndende vakavapukula. kacikuviuka etu kuhiluka ku Ingito?'' ⁴ Vahandekele kuli umo namukuevo nguavo, ''Tusakulenu ntuamena mukuavo, kaha tuhiluke ku Ingito.'' ⁵ Kaha Mosesa na Alone va nongamene kumeso a mbunga ya lukungulukilo lua vana va Isaleli. ⁶ Yehosua muana Nune na Kaleve muana Yefune, uze ua pandamene kuli vaze va landele cifitu, vatavuile vuzalo vuavo. ⁷ Vahandekele kuli vaze vaka lukungulukilo lua vana va Isaleli. vahandekele nguavo, ''Cifuti cize cituahitile na kuceseka cifuti cacili cikuma. ⁸ Ngue Yehova na vuikilila netu, kaha akututuala etu mucifuti na kutuhiaco etu. Cifuti cekuhita mavele na vuci. ⁹ Vunoni kati mulinge zimpanta na Yehova, kaha kati muivue vuoma na vantu va cifuti, muomuo vakevo muka uetu. Kulama cavo vakacifumisa kuli vakevo, muomu Yehova ali netu. Kati mukevue vuoma vakevo. ¹⁰ ''Vunoni likingulukilo luose luahandekele na kuvasa mavue. Vunoni vumpahu vua Yehova vuasolokele mu mbalaka ya ciuaneno kuli vose vana va Isaleli. ¹¹ Yehova ua handekele na Mosesa ngueni, ''Matangua angahi ava vantu vaka njizinda ange? Matangua angahi ava kahona kunjitsiliela ange. Kutala ngue njapange vintantekeyelo na zindzili ziange mukati kavo? ¹² Ange njika va veta na musongo ua kulitambuisa, naku va viana, kaha njikaku puisa ove muyati ua kuhiana ava muku lana na muku kama. ¹³ Mosesa ua handekele na Yehova ngueni, ''Ngue ukulinga evi, kaha vaka Ingito vakucivua eci, Muomu ove uava yoyesele ava vantu kufuma vakevo muzindzili ziavo. ¹⁴ Kaha vaka cambulula kuli vandambo va cifuti eci. Vana civui nguavo ove, Yehova, ali nava vantu, muomu ualisoluesa luholo na luholo. Mbunga yove ikamana hali vantu vetu. Ukaya kumeso ava mu ngundzi yamaselua hatangua hatangua kaha mungundzi yatuhia muvutsiki. ¹⁵ Kaha ngue ukutsiha ava vantu ngue muntu umo, kaha vaka cifuti vaze vanevu lutsimo vakahandeka nakuamba nguavo, ¹⁶ 'Muomu Yahova kalikambata ava vantu mu lifiti lizi lia singile kuvahia vakevo, avatsihile, vakevo mumusenge? ¹⁷ Kaha, njikulambelela ove, zatesa zindzili ziove. Muomu ove uahandekele nguavo, ¹⁸ Yehova ekulivandeka na nakutenuka kaha uakala cilemo. Uekukonekela vupi na civulumuna. Ukulinga nahamo hahi uekusambesa ngoco mukamilonga tsimbu yalikaneha kuzangamesa ca vupi vuava kuku mucikota cavo, kuli zimo lia mucitatu kaha nelia muci uana; ¹⁹ Nguavo, njiakulambelela ove, Ovu vupi vuava vantu muomu yakuneha cacivuasiano mulutsilielo, ngue omu muue kuvakonekela ava vantu kufuma hatsimbu ivakele mu Ingito na vuavuno.'' ²⁰ Yehova ua handekele ngueni, ''Njavakonekela mukulama kuhulisa cavo, ²¹ Vunoni muavusunga, omu muja yoya, kaha nacifuti casula na vumpahu, ²² Vose vaze vantu vaze vamuene vumpahu vuange navintantakeyeso via zindzili zize zijapangele mu Ingito na mumusenge - vacili na kujeseka lika ange eve mutsimbu likumi kaha kavesi na kuvuikilila mulizi lianga. ²³ Kaha njikuhandeka nguange kavakamona cifuti cinjilisingile nava iseavo. Naumo uahi uze anjizindile ange akacimona eci, ²⁴ Kufumisako ngamba yange Kaleve, muomu ali nacimbembesi ceka kaha nanjikave ange namutima uose. ukamuneha ikeye mucifuti muze muaile, Kaha cikota ceni vakacimbata. ²⁵ (Vunoni va Amalekita na vaka Kanana vatumamene mucimbongo.) mene mukalumuke nakuya mumusenge munjila ya cisali caku Tila. ²⁶ Yehova ua handekele kuli Mosase na Alone. Uahandekele ngueni, ²⁷ ''Mantangua angahi anjikakala na ntsimbu na lukungulukilo liuno lua lupi? Njinevu kulinienga cavana va Isaleli nange. ²⁸ Handeka navo nguove. ''Ngue munjili nakuyoya, muana handeka Yehova, 'ngueni muuahandeka mukuivuilila cange, Njikucilinga eci kulienu: ²⁹ Vivimbi vuenu vikalahukila omu mumusenge, enu vose vaze vali niengele haliange, vava tandele ngue kukala cenu cose, kutanda cose cavantu kufuma mumiaka makumi avali nakuya helu. ³⁰ Enu kamukaya mucifuti cize cinjamisikile kukala limbo lienu, kufumisako Kaleve muana Yefune na Yehosua muana Nune. ³¹ Vunoni vanike vavandende vaze vamuahandekele nguenu vaka vapukula, Ange njikuvatuala mucifuti. vakantantekeye cifiti cimua viana enu. ³² Ngue eve, mivila yenu yakutsa ikalahukila omu mumusenge. ³³ Vana venu vakakala ngue tufunga mumusenge mumiaka makumi auana. vatela kuima kuzangamesa havipangi vienu via litavu kuvanga na kukumona ca vivimbi mumusenge. ³⁴ Kuesekesesa na ntandelo yama tangua ha hatsimbu yakueseka cifuti, matangua makumi auana, Enu mukema kuzangamesa cavupi vuenu mumatangua makumi auana, muaka umo matangua ose, kaha mukantantekeya kumiviana cange. ³⁵ Ange, Yehova, njahandeka. Njikalinga eci kuli vose va ndemona va lukungulukilo vaze vekukunguluka hamo haliange. vakavamanesa naku vavatula, kaha kuno vene vakatsa.'' ³⁶ Kaha vamala va Mosesa vaze vana tumine nakutala cifuti, vaze vahilukile valingisile lukungulukilo kulinienga kuli Mosesa nakutandesa lize lialipi ha cifuti - ³⁷ Ava vamala vaze vakele nakuneha lizi lialipi ha cifiti vavakuatele, kaha vatsile namusongo kumeso a Yehova. ³⁸ Kuli vaze vamala vaze vaile nakutala cifuti, Yehosua muana Nune kaha na Kaleve muana Yefune vakeko vasaleleho. ³⁹ Kaha Mosesa ua mbuluile aua mezi kuvana va Isaleli, kaha valiniengele cikuma. ⁴⁰ Kaha vahindukile cimenemene na kuya helu lia muncinda na kuamba nguavo, ''Tala, tuli hano, kaha tunakuya kucihela cize Yehova ca sikile muomu tualingi vupi'' ⁴¹ Vunoni Mosesa ua handekele ngueni, ''Vikandzo vimukuvulumuina lusiko lua Yehova? kamukavezika, ⁴² Kati muye, muomuo Yehova kesi nenu mukumikuasa enu kuvitondzi venu. ⁴³ Kaha Amalekita na vaKenana kuvali, kaha ukutsa kumukuale muomuo enu muahilukamo kukavangeya Yehova. Sikaho kali kukala nenu.'' ⁴⁴ Vunoni vatavele kuya kumuncinda; ambatuhu, cipue Mosesa cipue vuato vua civuasiano ca Yehova vasile cilombo. ⁴⁵ Kaha va Amalekita vasikumukile, kaha vana Kenana vaze vasolokele kuli uze muncinda. Vava vetele va Isaleli kaha vahetele ku Holema.