¹ "Kati muhise, kaha enu navaka mihisa. ² Muomu na cihiso ciukuhisa na cio, cikeko naua ove vaka kuhisa na cio, kaha naci seteko ciuku setekela, cikecio ove naua vaka kusetekela. ³ Vikandzo mueku tala kacisoni kakandende kali muliso lia ndumbuove, vunoni kauhasa kutala mungola uli muliso liove? ⁴ Vati uhandeka kuli muanoko nguove, 'mana linga njikufumise ka cisoni oko kali muliso liove,' okuni mukongola hanga una mona muliso liove? ⁵ Enu va kuacivembulu! Ciakuli vanga nona mukongola ouo uli muliso liove, kaha uku mona vuino mukufumisa kacisoni kali muliso lia muanoko. ⁶ Kati uhane viakulela kututali, kaha kati umbile zimpota ziove ku vangulu. Muomu va zilialangela na zintsende ziavo, nakualuluka na kuku saniuona. ⁷ "Vundila, kaha vaka kuhia cio. Lengeya, kaha uku uana. Tota, kaha va kuku sokoluelako. ⁸ Muomu uose ue kuvundila, ue kutambula, uose ueku lengieya, ueku uana; Kaha na ku muntu ue kutota, ve kumu sokoluela. ⁹ Chipue iya hali enu, omu muaneni amu vundila muka, kaha a muhia livue? ¹⁰ amba nga amu vundila insi, kaha amuhia linoka? ¹¹ Amba vuno, ngue enu vakua vipi mutantekeya mua kuhela vana venu, kaha vati muze mua kuhia na mua likuhanena Isuenu uze ali muilu kuli vaze vamuvundila? ¹² Sikaho, viuma viukuzanga mangana vantu vakulingile, vilinge ove naua kuli vakevo, muomu aua akeo mezi a lisiko na vapolofeto. ¹³ "Kovelenu kuhitila mu cikolo cia cindende. Muomu cize ciaku zandzavala kaha cia kukama ikeye iya kulamba, kaha vantu vavengi vekuyamo. ¹⁴ Vunoni cikeko cia kuli suata kaha njila naua yaikalu ikeko ituala ku muono, kaha va iuanavava ndende. ¹⁵ "Zangamenu natu polofeto vamakuli, ava vekuiza iza kuli enu muvuzalo vua vampanga vunoni muavusunga vanapu tungunge vaku liana. ¹⁶ Mukava tantekeya ku vusuka vuavo. Vantu veku hasa kuhela vusuka vua viniu ku muti ua mingonga ni? Amba zikuyu kumuti ua munguni? ¹⁷ Mukemuo naua, muti uose uaku viuka ukema vusuka vua cili, vunoni muti ua kupihihia ue kuima vusuka ua vupi. ¹⁸ Muti uaku viuka kauhasa kuima vusuka vua vupi, navuno muti ua kupihia ka uhasa kuima vusuka vua ku viuka. ¹⁹ Uose muti kaukema vusuka vua kuviuka vakau vatula naku umbila mu cisali ciatuhia. ²⁰ Mukemuo vene, muka vatantekeyala ha vusuka vuavo. ²¹ Kati vose vaze veku handeka kuli ange nguavo, 'muangana, muangana,' vakengila mu vuangana vua muilu, kuvanga vaze lika valinga muaya cizango cia Tata uli muilu. ²² Vavengi vantu vakahandeka kuli ange kulitangua lize, 'muangana, muangana, katua handekele mezi a vu polofeto mulizina lioveni, mulizina liove tua tuhuisile va ndemone, na mulizina liove tualingile vipupu viavingi? ²³ Kaha njika handeka kuli vakevo nguange, kanjami tantekeyele! fumenu kuli ange enu va kua kulinga via vipi!' ²⁴ "Sikaho, uose ouo akevua mezi ange naku ono noka vamu fuisa ngue yala ua kuzangama uze ua tungile ndzivo yeni ha livue. ²⁵ Mema akalunga anokele, na mavaze ezile, na mahundzi ahuhile na kuli veta ku ndzivo ize, vunoni kaya uile, muo valele luvula luayo ha livue. ²⁶ Vunoni uose evua mezi ange kaha aviana ku ononoka vamufuisa ngue yala cisiname uze ua tungile ndzivo yeni hamuseke. ²⁷ Mema akalunga anokele, mavazi ezile, kaha mahundzi naua a huhile na kuliveta ku ndzivo ize, kaha yeuile, kaha kuacia yo ciapihile ²⁸ Kaha cia solokele omu Yesu ua manesele kuhandeka mezi aa, vivunga vize via likomokelele ha vulongisi vueni, ²⁹ muomu ua kuvalongesa ngue mu kuazingolo, kaha kati ngue muve kulongesa va kua kusoneka vavo.