¹ Kaha Yesu uamu tuameneneko kuli muzimu ua kulela linga vaka mu eseke kuli satana. ² Omuo na likelele kulia makumi auana a mutana na makumi auana a vutsiki, ua vuile ndzala. ³ Mukua ku eseka uezile kaha ua handekele neni, "Ngue u muana Njambi, sika aua mavue a a himpukeke muka." ⁴ Vunoni Yesu ua mu kuaniene, naku muleka ngueni, " Va cisoneka, 'Muntu kali kuasa kuyoya na muka lika liao, vunoni namezi ose kufuma mu kanua ka Njambi." ⁵ Kaha satana uamu tualele mu nganda ya kulela kaha uamu mesele ha kasongua ka tembele, ⁶ kaha ua handekele neni, "ngu umuana Njambi, limbile ha mavu, muomuo vana soneka, 'akasika tungelo tueni vakaku kuase,' kaha, 'vaka kumbata mu mavoko avo, ngoco kutina u suntsuka ciliato cove ha livue." ⁷ Yesu ua mulekele, "Naua vana soneka, 'Kati mu eseke muangana Njambi yove." ⁸ Naua, satana ua mutualele ku muneida ua laha cikumakuma kaha ua mu lekesele vifuti viose via hano ha mavu na vumpahu vuovo. ⁹ Ikeye ua lekele, "Evi viose nji kaku hiavio, nga u tsikama na kunji lemesa." ¹⁰ Kaha yesu ua mu lekele, "Hamoye fuma kuli yange, atana muomuo vana soneka, u ka lemesa muangana Njambi yove, naua u ka singimika lika ikeye." ¹¹ Kaha satana ua musisile, naua talenu, tungelo vezile na ku pangela ikeye. ^{12 13} Vuno omo Yesu ua vuile ngecize Yoano ali mu kamenga, ua ile ku Ngalileya. Ua sezele Nazaleta kaha uaile naku tumama mu kapenama, ku mukulo ua Ngalileya mu mukuakua ua Zembulone na Nafatali. ¹⁴ Evi via solokele linga cika pue nge cize civa handekele kuli Isaya kapolofeto, ¹⁵ "Cifuti ca Zembulone na cifuti ca Nafatali, Njila ya ku cisali mu sinia lia Yondanu, Ngalileya ya vakua vifuti! ¹⁶ Vantu vaze va tumamene mu milima va muene ua kama mutana, na kuli vaze va tumamene mu cifuti na mu cimbembe ca ku-tsa, hali vakevo mutana ua ka tuililile." ¹⁷ Fume ize nsimbu Yesu ua sangumukile ku ambulula na ku handeka, "Alulukenu, muomuo vuangana vua muilu vuneza mu hiehi." ¹⁸ Omo ua hitilile ku cisali ca Ngalileya, ua muene va muanaye va vali, Simone uze va lukile Petulu, na Anduleo muanaye, kuta vuanda mu cisali, muomu vakevo vakua kuta vatsi." ¹⁹ Yesu ua handekele kuli vakevo, "Tuayenu, njikavienu, kaha nji kami puisa vakua kuta vantu. ²⁰ Kaha haze vene vasile manda va mu kavele. ²¹ Omu Yesu akele na kuya kufuma kuze ua muene vavali veka va muanaye, Tiangu muana Sembendeo na Yoano muanaye. Vakele mu vuato na Sembedeo ise avo va tungulula manda avo. Ua va sanene, ²² kaha haze vene va sile vuato na ise avo naua vamu kavele. ²³ Yesu ua hitanganene yose Ngalileya, ku longesa mu viavo visinangonga, kua ambulula zimpande zia cili zia vuangana na ku kanguisa nkala miyati yose ya misongo na mavezi ha kati ka vantu. ²⁴ Kaha mizimbu yeni ya hetele kuose ku Silia, kaha vantu vanehele kuli ikeye vose vaze va yandele na misongo na mavezi, nava kele na vandemone, vakua kalepa, na vakua ku sinia. Yesu uava kanguisile. ²⁵ Vivunga via kama via mu kavele kufuma ku Ngalileya, na ku Ndekapoli, Yelusalema, na Yundeya, nava mu sinia lia Yondanu.