¹ Kaha cakele ngecize omo mualingile Isake nakolo na meso eni akele na kavuivuivui kakele naku mona, ua sanene Esau, muaneni ua mukuluntu, naku handeka kuli ikeye ngueni, ''Muanange.'' Esau ua handekele kuli ikeye ngueni, '' Yange uno,'' ² kaha Isake ngueni, ''Tala vuno, Ange njakolo. Kanja ntantekeyele litangua liange lia kusta. ³ Ngecize nona vuta hovio liovena, na vuta vuove hamoye mumusenge naku kunjihiangela ntsitu. ⁴ Unjitelekele viakulia vitovala, ngue muze munja lema, kaha unehe kuliange mangana njilie mangana njiku vezikise ntsimbu kanda njitsa.'' ⁵ Kaha Lambeka ua vuile omu muakele na kuhaneka Isake kuli Esau muaneni. Esau uaile mumusenge nakuyomba ntsitu kaha uanehele. ⁶ Lambeka ua handekele kuli Yakomba muaneni ngueni, ''Tala kuno, Ange njavile iso na kuhandeka na Esau mukuluntu uove. Na handekele ngueni, ⁷ 'Njineheleko ntsitu na kunjitelekela viakulia vitovala mangana njilie, nakuku vezikisa kumeso a Yehova ntsimbu kanda njitsa,' ⁸ Vuno ngecize, muanange uononoka kulizi liange munjikuku sika. ⁹ Hamoye kuvuntanga, naku neha vana va vampembe va vali vacili; kaha njikuteleka viakulia vitovala viacili kufuma kuli vakeko via iso, ngue muze mua lema. ¹⁰ Kaha ukumu tualela iso, mangana alie, linga aku vezikise ntsimbu kanda atsa.'' ¹¹ Yakomba ua handekele kuli Lambeka naye ngueni, ''Tala, Esau mukuluntu uange ikeye akala na vungona, vunoni ange nja lamba. ¹² Mpano tata akunji kuata ange, kaha njiku soloka kuli ikeye ngue njimu kamakuli. Ange njikulinehela cisingo haliange kati kuvezika.'' ¹³ Naye ua handekele kuli ikeye ngueni, ''Muanange, eca cisingo cikale haliange. ononokela kaha lizi liange, nakuya, kanjihangelevo,'' ¹⁴ Kaha Yakomba uaile naku mbata vana va vampembe na kuvaneha kuli naye, kaha naye uatelekele kulia citovala, ngue muze mualema ise. ¹⁵ Lambeka ua nonone vuzalo vuacili vua Esau, muaneni ua mukuluntu, viakele vavio mu ndzivo, naku zika Yakomba, ntsongo yeni. ¹⁶ Kaha ua hakele vilambu via mpembe ha mavoko eni nahaze ha lamba ha ntsongo yeni. ¹⁷ Ua hakele viakulia vitovala na muka uze ua viukisile muli voko lia muaneni Yakomba. ¹⁸ Yakomba uaile kuli ise na kuhandeka ngueni, ''Tata.'' Ise ua handekele ngueni, ''Yange uno; yove iya, muanange?'' ¹⁹ Yakomba ua handekele kuli ise ngueni,'' Yange Esau muanove ua ntuantua. Ange njalingi ngue muze muua handekele kuliange. Hinduka tumama mangana ulie ntsitu yange, muomu ove unji vezikise ange.'' ²⁰ Isake ua handekele kuli munaneni ngueni, ''Muomu vika ua iuanena vuasi, muanange?'' Ikeye ngueni, ''Muomu Yehova Njambi yove na ineheke kuliange.'' ²¹ Isake ua handekele kuli Yakomba ngueni, ''Tuaya kuhiehi nange, linga njiku kuate, muanange, ngue mukeko yove muanange Esau ini cahi.'' ²² Yakomba ua suenene kuli Isake ise; kaha Isake ua mukuatele na ku handeka ngueni, ''Lizi ngue lizi lia Yakomba, vunoni mavoko ngue mavoko a Esau.'' ²³ Isake kamu ntantekeyele muacili, muomu mavoko eni akele navungona, ngue mavoko a Esau mukuluntu eni, ngoco uamu vezikisile. ²⁴ Ua handekele ngueni, ''Yove muanange Esau cili cili? Ikeye ngueni Yange vene.'' ²⁵ Isake ngueni, ''Neha viakulia kuno, kaha njikulia ntsitu yove, mangana Ange njiku vezikise.''Yakomba ua nehele viakulia kuli ikeye. Isake ualile, kaha Yakomba ua munehelele viniu, kaha ua nuine. ²⁶ Kaha ise Isake ua handekele kuli ikeye ngueni, ''Tuaya suena kuno unji ntsuembe, muanange.'' ²⁷ Yakomba ua suenene kuhiehi na kumu ntsuemba, kaha uanikile vueko vua vuzalo vueni kaha uamu vzikisile. Ua handekele ngueni, ''Tala, vueko vua muanange ngue vueko vua vua mumusenge Yehova nanjivezikisa. ²⁸ Kaha Njambi akuhie cihanda ca kumume ua lilu, naku mazi akumavu, nakulana cavimbuto na viniu. ²⁹ Vantu vaku pangele na miyati ikakotamena ove. Ukale mukuluntu hali vana vanoko, kaha noko vana veni vakaku tsikamena ove. Uose akaku singa na ikeye akakale uaku singiua; uose uze akaku vezikisa na ikeye akakala uaku vezika.'' ³⁰ Kaha cakele ngecize haze vene hamanesele Isake, kaha Yakomba, kaha Yakomba uathukile kufuma kuli ise Isake, Esau mukuluntu ueni uezile kuvuyambi vueni. ³¹ Na ikeye uatelekele viakulia vitovala naku neha kuli ise, Ua handekele kuli ise ngueni, ''Tata, hinduka tumama linga ulie ntsitu ya muanove, mangana unji vezikise.'' ³² Isake ise ua handekele kuli ikeye ngueni, ''Yove iya?'' Ikeye ngueni, ''Yange muanove, ua ntuantua, Esau.'' ³³ Isake uazazele cikuma na kuhandeka ngueni, ''Iya uze natsihile ntsitu na kuneha kuliange? Ange njalile yose ntysimbu kanda ove uiza, kaha Ange njamu vezikisa. mukeko, vamuvezikisa.'' ³⁴ Omu muavile mezi a ise, ua lilile na ciniengo cakama cikuma cakusasa, na kuhandeka kuli ise ngueni, ''Njivezikise, nage naua, tata.'' ³⁵ Isake ngueni, ''Ntsongo yove nezele kuno nakunjonga nambata laza civezikiso cove.'' ³⁶ Esake ngueni, ''Kati va sugamene muku luka Yakomba? muomu nanji sintsila zitsimbu ezi zivali ua fumisile vukuluntu vuange, kaha, tala, vuno mumu na fumisa civazikiso cange.'' Ua handekele ngueni, ''Kaua njitulikiliko civezikiso cimosi?'' ³⁷ Isake uakuaniene naku handeka kuli Esau ngueni, ''Tala, Ange njamulingisa kukala mukuluntu vove, kaha Ange njamuhie navana va neye vose njimuyevo kukala vangamba veni, kaha Ange njamuhie mbuto na viniu. Vika viavingi naua vinjikulinga kuliove muanange?'' ³⁸ Esau ua handekele kuli ise ngueni, ''Uli na civezikiso cimolika tata? njivezikise, nange naua, tata.'' Esau ualile helu. ³⁹ Isake ise uakuaniene naku handeka kuli ikeye ngueni, ''Tala ku mazi a hamavu, kukala vukalo vuove naku mume ua muilu kufuma muilu. Hamu kuale uove ukayoya, kaha ukovola muanoko. ⁴⁰ Vunoni ngue ukalinga zimpata, ukali pakumuina makambo ueni uaku ntsingo yeni.'' ⁴¹ 'Kaha Esau ua zindile Yakomba muomu yaci vezikiso catambuile kuli ise. Esau ua handekele mumutima ueni ngueni, ''Matangua akulila tata ali kuhiehi; hanima yaco njika tsiha ntsongo yange Yakomba.'' ⁴² Mazi a Esau muaneni uamukuluntu amulekele Lambeka. Ngecize uaile na kusana Yakomba muaneni ua kanike naku handeka kuli ikeye ngueni, ''Tala, mukuluntu uove Esau anaku handeka ivene haliove kusinganieka kukutsiha ove. ⁴³ Ngoco vene, muanange, ononoka kulizi liange katuka tina hamoye kuli Lambane, muanetu ku Halane. ⁴⁴ Uka tumame neni, matangua andende nomu vute vua muanoko vukutula, ⁴⁵ noho vutenu vua muanoko vukufuma haliove, kaha akusuva vaualingi kuli ikeye. Kaha Ange katuma na kukuhianga kufuma kuze. vikandzo njikami zimbalesela muvavose litangua lia ngongo? ⁴⁶ Lambeka ua handekele kuli Isake ngueni, ''Ánge njakatala muono muomu ua vana va Hete. Ngue Yakomba aka mbata mpuevo kuvana va Hete kukala mpueyeni, ngue avava va mpuevo, vana vamolika vamu cifuti eci, vika viacili vikakala ku muono uange?''