¹ Kaha Mosesa ua kuaniene ngueni, ''Vunoni vati ngue kava kanjitsiliela ange cipue kuhalakana kuliange vunoni vaka vaka handeke nguavo, ' Yehova kasolokele kuliove'?'' ² Yehova ua handekele kuli ikeye ngueni, ''Vika vili mulivoko liove?'' Mosesa ua handekele ngueni, ''Mulamu.'' ³ Yehova ua handekele ngeni, ''Umbile hamavu.'' Mosesa ua umbilile hamavu, kaha ualumukile linoka. Mosesa kaha Moosesa uamu tinine. ⁴ Yehova ua handekele kuli Mosesa ngueni, ''Olola livok liove naku mukuata kumucila.'' Kaha ikeye uoluele livoko lieni nakumukuata. Kaha ualumukile mulamu mulivoko lieni ceka naua. ⁵ '' Eci linga va tsiliele nguavo Yehova, Njambi yava kukuavo, Njambi ya Avilahma, Njambi ya Isake, kaha ikeye Njambi ya Yakomba, nasolokele kulienu.'' ⁶ Yehova naua ua handekele kuli ikeye, ''Vuovuno haka livoko liove mukati kantulu yove.'' Kaha Mosesa ua hakele livoko lieni muntulo yeni. Omo mualingile nalifumisa, tenu, livoko lieni lia lumukile mbumba, kuvuka ngue neve. ⁷ Yehova ua handekele ngueni, ''Haka livoko liove muntulo yove naua.'' Kaha Mosesa uahakele livoko lieni muntulo yeni, kaha mualifumisile, uamuene linalumuka naua, ngue tsitu yeni naua. ⁸ Yahova ua handekele ngueni, ''Ngue kava kutsiliela ove- ngue kava kuliungumika na cintantekeyeso cakavanga ca ndzili yange cipue kutsilielamo, kaha vaku tsiliela cintantekeyeso camu civali. ⁹ Ngue kava kutsiliela naua evi vintantekeyeso vivali via ndzili ziange, cipue kuhalakana kulienu, kaha kambate mema kufuma mundonga naku tila ha ntunda. Kaha mema aze aunasu akalumuka maninga kuntunda.'' ¹⁰ Kaha Mosesa ua handekele kuli Yehova ngeni, ''Sukulu, Ange kanja lakatele, cipue tsimbu yaku nima cipue hano hauna handeka kuli ngamba yove. Ange njeku kokovoka muku handeka nalilimi liange lilemu.'' ¹¹ Yehova ua handekele kuli ikeye ngueni, ''Iya napange kanua kamuntu? Iya napange muntu ua kaveve cipue kasinda mantuintui cipue mumona cipue ku puputiya? Nguetu Yange vene Yehova? ¹² Vuno ngoco vene hamoye, kaha Ange njikukala kunua kove nakuku longesa muaku handeka.'' ¹³ Vunoni Mosesa ua handekele ngueni, ''Sukulu, njavundila tuma uose uze iuna singanieka kutuma.'' ¹⁴ Kaha Yehova uakele navutenu na Mosesa. Ua handekele ngueni, ''Amba vati Alone, muanoko, kaLevi? Ange njantantekeya nguange nase kuhandeka muacili. Ambatuhu, anakuizi nakukuuana ove, kaha muali kukumona ove, aku viukilila mumutima ueni. ¹⁵ Ove ukuku handeka neni nakuhaka mezi mukanua keni, Ange njikukala kanua kove kaha nakanua keni, kaha Ange njikuleka viuayela kulinga. ¹⁶ Akukuhandekelako kuvantu. Akukala kanua kove, kaha ukukala kuli ikeye ngue yange, Njambi. ¹⁷ Ove ukambata mulivoko liove mulamu. ou ukapanga vintantekeyeso.'' ¹⁸ Kaha mosesa uaile uahilukile kuli semueno Yetelo na ku handeka kuli ikeye ngueni, ''Vandamena njiye Ange njihiluke kuli vantanga ziange vaze vali mu Ingito na kutala ngue vacili na miono.'' Yetelo ua lekele Mosesa ngueni, '''Hamoye mu ciyulu.'' ¹⁹ Yehova ua handekele kuli Mosesa mu Mindiane ngueni, ''Hamoye, hiluka ku Ingito, muomu vantu vose vaze vanakuesa kumbata muono uove vanatsi.'' ²⁰ Mosesa uatambuile mpueyeni na vana veni vava mala na kuvahaka ha cimulu. Ua hilukile ku cifuti ca Ingito, kaha uambatele mulamu ua Njambi mulivoko lieni. ²¹ Yahova ua handekele kuli Mosesa, ''Omu muukuhiluka ku Ingito, tala uatela kupanga kumeso a Falao viose vikomouesa vize Ange vinja hake mu ndzili ziovee. Vunoni Ange njika kolesa mutima ueni, kaha kali keca vantu kuya. ²² Ove uatela kuhandeka kuli Falao nguove, 'Omu mukeko Yehova muana handeka: Isaleli muanange ua yala, ua ntuantua, ²³ kaha Ange njiku handeka kuli ove nguange, ''Eca muanange ua yala aye, mangana anjizumbangeye ange.'' Vunoni uamukanesa kuya, Ange njika tsiha muanove, ua ntuantua.''' ²⁴ Vuno munjila, muvecele kuenda navutsiki, Yehova uauanene Mosesa uambele kumutsiha. ²⁵ Kaha Zipola uanonene mpoko nakumuteta cikova ca muaneni ua yala, na kucikuata kuvi liota vieni Kaha ua handekele ngueni, ''Muavusunga ove unanjikela yaliange ua maninga.'' ²⁶ Ngoco Yehova ua muecele likalieni. Ua handekele ngueni, ''Ove uyaliange ua maninga'' muomu kukuenga cize. ²⁷ Yehova ua handekele kuli Alone ngueni, ''Hamoye mumusenge na kuuana Mosesa.''Alone uaile, nakumuuana kumuncinda ua Njambi, na kumu tsuemba. ²⁸ Mosesa ua lekele Alone mezi ose a Yehova ngueni namutumu naku handeka viose vintantekeyeso via zindzili zia Yehova vize via mulekele kupanga. ²⁹ Kaha Mosesa na Alone vaile naku kunguluka hamo navose vakuluntu va Isaleli. ³⁰ Alone ua handekele mezi ose kuli Mosesa. Kaha naua uamuesele vintantekeyeso via zindzili zia Yehova mu meso avantu. ³¹ Kaha vantu vatsilielele. Omu muva muile nguavo Yehova uatalele va Isaaleli kaha uamuene kayando kavo, kaha vatsikamene na kumulemesa.