¹ Ngue akakatuka hakati kava polofeto cipue mukaku lota vilota, kaha ngue akakuhia cintantekeyeso cipue cimueso, ² kaha cintantekeyeso cipue cikomouesa cize cikasoloka, cize ca handekele kulienu, Tuyenu kulu va njambi veka, vaze vamuahano kantakeya, kaha tuvazumbangeye, ³ 'kati mualakane mezi avaze tupolofeto, cipue kuli va vakakulota volota; muomu Yehova Njambi yenu anamialakana enu kuntantekeya ngue mualema Yehova Njambi yenu namitima yenu yose na miono yenu yose. ⁴ Mukakava Yehova Njambi yenu, kamumuilenu vuoma, nakuniunga masiko eni, na kuononoka kulizi lieni kaha muka mupangela nakumukakatela. ⁵ Kaha kapolofeto uze cipue mukakulota vilota muka mutsiha, muomu ua handekele viaku viana hali Yehova Njambi yenu, uze uamifumisile mucifuti ca Ingito, kaha uze amifusile mundzivo ya kayando. Kaha uze kapolofeto akutonda kumifumisa minjila ize Yehova Njambi yenu yamisikile enu kuenda. Ngecize kumisenu kufumisa vupi hakati kenu. ⁶ Ngue muanoka, muana noko, cipue muanove uampuevo, cipue mpuevo ya uaha ntolo yove, cipue kavusamba uze nalifu ngue muanove, aku suangeyelesa kukusuekesa naku handeka ngueni, 'Tuyenu tukazumbangeye va njambi veka' vaze vamuahono kuntantekeye, cipue va kukuenu kavava ntantekeyele - ⁷ vaku va njambi va vantu vaze vana mizingiulika, kuhiehi cipue vali halako nenu, kufuma haze halenga mavu nakuheta zaze halenga mavu.' ⁸ Kati ukamutave cipue kumuhalakana, kaha kauatela kutavesa liso liove kumutetela ikeye, kauatela kutetela cipue kumuohiela. ⁹ Vunoni, uamutsiha vene; livoko liove likakala liakavanga kukuata hali ikeye nakutsa, kufuma haze navantu vose. ¹⁰ Mukamuasa mavue nakutsa, muomu namifumisa kuli Yehova Njambi yenu, uze amifumisile mucifuti ca Ingito, namu ndzivo yavu ndungo. ¹¹ Vose va Isaleli vakemua na navuoma, kaha kava katualelelaho nakuli evi viavipi hakati kavo. ¹² Ngue ukuivua umo aku handeka halimo limbo liove, lize Yehova Njambi yenu liamihiele kuyoyelamo: ¹³ Vamosi vantu vangoco vanafumu hakati kove kaha vana tangula vandambo va limbo, Tuyenu nakuzambangeya va njambi veka vaze kamuantantekeyele.' ¹⁴ Kaha ukahula mucili nakutla muacili cili. Ngue uauana vusunga cuma eci capua cizila hakati kavo, kaha ukalinga cimo. ¹⁵ Muavusunga ukaveta vandambo valimbo olio kuntsongo ya vutuesi vua kuale, kumanesa kuvenieka na vantu vose vaze valimo, namuhita vimuna, navutuesi vua mukuale. ¹⁶ Kaha kungulula voise vialio kufuma hakati ka tapalo nakutsimika limbo lialio na tuhia na viose vialio ngue cikombelo ca Yehova Njambi. kaha likahipuka mutumbo kumiaka yose kavaka litunga naua. ¹⁷ Kaha nakamo kahi kakuvize kaka katela mulivoko liove. linga Yehova alumuke kuvukalu, kusoluesa ngozi, mangana njili na cikeketima haliove, nakukulingisa kulana, ngue muze mulisingile kuli vaiso. ¹⁸ Akalinga eci muomu ualakanene kulize lia Yehova Njambi yenu, nakuniunga masiko aze anja misikile lelo, kulinga via kuoloka kumeso a Yehova Njambi.