¹ Ecenu vose vaze vanapu vangamba vaku vundongu vayongole vasukuluavo vaku viukila kasingimiko kose. Vatela kulinga eci mangana lizina lia Njambi na longesi lihone kusahuka. ² Vangamba vaze vanakutsiliela vakuluntu kavatela kuhona kuvalemesa vakeko vanapu vamuanaye. Vunoni, vava pangele na cizango ca kama. Muomu vakuluntu vaze vava kuasele kuvipangi viavo vakele vaka kutsiliela nacilemo. Longesa nakuhandeka evi viuma. ³ Ngue umo aku longesa vihande vieka kaha nakuhona ku tavela mezi anamu longesa Muangana uetu Yesu Kilisitu na vihande vili mukulongesa, ⁴ Ikeye anaku livua novuo viana ntantekeya viahi. Vunoni na zalukila zimpande zia kuhandeka na zimpata zia mezi zikezio zie kuneha kuliveya, kuzoza, kasauntu, kuyongola ca cipi, ⁵ kaha kukandula zimpata kuvantu vaka kupihia kuvisinganieka viavo. Vazimbalea vusunga na kusinganieka nguavo kulamesa Njambi cikeko kunganiala zimbongo cikuma. ⁶ Vunoni kalemesa Njambi na vuhuanga cinapu nganio yakama, ⁷ muomu navio vituaneha mu cifuti viahi, kaha novio vitu kambataho viahi. ⁸ Vunoni, tukutienu na viakulia na vuzalo. ⁹ Muomu vaze vanakutonda kukala navupite vekulahukila mu ceseko, mu ciliva. Vekulahukila mu via kuhulama kaha vusungu, kaha muli viose vieka vivekulinga vantu vieku ziminina muciyulo ca kuvanongesa. ¹⁰ Muomu cilemo ca zimbongo ukeko muzi ua vupi vieka na vieka. Vantu vamo vaze vekuzanga vava tuamenena mueka kufuma kulutsilielo kaha valivangela vavene na vusiua. ¹¹ Vunoni ove, muntu ua Njambi, tina kuviuma evi. kavangeya vuviuke, kulemesa Njambi, lema, lukakatela, na ku konkama. ¹² Lua ndzita ize yaku tsiliela. Kuata kumuono uze uakuhana kuhua miaka yose kukeko kuvaku sanenene, kaha uze uvakuhiele kukualumuka kumeso a vakaleho vavengi. ¹³ Ange njikusika kumeso a Njambi, ou uekuhana muono kuviuma via vingi, na kumeso a Kilisitu Yesu, uze uali tavele muacili kumeso a Pontius Pilato, ¹⁴ kuniunga lizi lia siko cakuhona limpenga cipue kupaya noho halikasoloka Muangana uetu Yesu Kilisitu. ¹⁵ Njambi akasolola vaka kutsiliela ha tsimbu - Njambi, vavezikisile kaha umolika Uakusangaziala, Muangana uze uayulile kaha na Muangana mukakuyula. ¹⁶ Ikeye lika kesi na vutsi a tumama muceke cakuhona kusuenako. Na muntu umo uahi uamu muene cipue kumusolola ikeye. Kili ikeye kukale ksingimiko na zindzili zia miaka yose. Ame. ¹⁷ Sika vaze vaka vupite muli aua mezi kati valivue kaha kati valavelele mu vupite, vuakunonga. Vunoni, vatela, kulavelela muli Njambi. Uekutuhia etu vupite vuavu sunga kuku viukilila. ¹⁸ Sika linga valinge viacili, vakale navipangi via vupite via cili, kaha nacizango caku hana hana. ¹⁹ Munjila nkana ize valitulikila vavane viacili vikeza, mangana vakuate muono uze unapu ua vusunga. ²⁰ Timoteo, niunga cize civa kukundika ove. Ece kuhandeka viangoco kaha nakuviana ca mana aze amakuli. ²¹ Vamosi vambuluile evi viuma kaha vasalaho kutsiiela. Kavumbi kakale nenu.