¹ Ngecize, cakatete cose, Ange njami vulukisa nguange kulambelela, kuvundila, kuhakuila kutsantsela, na kuhana cikale mulienu vose, ² kuli va muangana vose na vaze vali navukame, tuatela kuyoya muciyulo na kuunda muose nakulemesa Njambi na vantu vakuovo. ³ Eci caviuka naua catavesua kumeso a Njambi Muovole uetu. ⁴ Uazangele kuovola vantu vose na kuiza kumana a vusunga. ⁵ Vunoni kuli kaha Njambi umo lika, kaha kuli naua muka kuovola ua Njambi na muntu, muntu ikeye Kilisitu Yesu. ⁶ Uali hanene evene ngue ndando yaku tuovolo etu vose, ngue vukaleho vuaha tsimbu ya cili. ⁷ Vunoni eci Ange vanjihanguile kukala mukakuzimbula na kukapositolo - Ange njinakumileka vusunga, Ange kanjesi nakulionga - mulongesi uava kavifuti muku tsiliela na muvusunga. ⁸ Ngecize, Ange njazange vantu muvihela viose kuvindila na kukatula livoko helu lia kulela cakuhona vutenu cipue kuhamika. ⁹ Vakamana vampuevo valilenge na vuzolo vua vapande, nantsoni na kuli pokuesa kati na zinkundu zia kuvinda cipue olu na zimpota cipue vuzolu vua mutengo cikuma, ¹⁰ vunoni muatela vampuevo vali tumbula vaka kulemesa Njambi navipangi via cili. ¹¹ Mpuevo uatela kulilongesa mu kuholoka na kuononoka. ¹² Ange kanjiku tavesa mpuevo kulongesa cipue kukala nazindzili hali yala, vunoni kuyoya mu kuholoka. ¹³ Muomu Andama vamutengele ha katete, kaha Eva. ¹⁴ Andama kava muongele, vunoni mpuevo va muomngele kaha halikukala na civulumuna. ¹⁵ Vunoni, ikeye akovoka hakusema vana, ngue vakutualelelaho kutsiliela na cilemo na kulela hamo na kulipokuesa.