الأَصْحَاحْ 3
1
وِيَا إِخْوَةْ، صَلُّو مِنْ أَجْلِنَا، عَلَشَانْ تِتْوَسَّعْ كِلْمِةْ الْرَّبْ بِسُرْعَةْ وِتِتْمَجَّدْ زَيْ مَا هِيَ عِنْدِيكُمْ،
2
وِعَلَشَانْ يِنَجِّينَا اللهْ مِنْ الْنَّاسْ الأَرْدِيَا الأَشْرَارْ، عَلَشَانْ الإِيْمَانْ مِشْ مِنْ نَصِيبْ كُلْ الْنَّاسْ.
3
إِلَّا أَنِّ الْرَّبْ أَمِينْ، وِهُوَ هَيِثَبِّتْكُم وِيِحْمِيكُمْ مِنْ الْشَّرْ.
4
وِلِينَا فِي الْرَّبْ كُلْ الْثِّجَةْ مِنْ جِهَتْكُمْ بِأَنِّكُمْ بِتَعْمِلُو إِللِّي بِنْوَصِّيكُمْ بِيهْ، وِهَتَعْمِلُو بِيهْ كَمَانْ.
5
وِاللهْ يِهْدِي جِلُوبْكُمْ لِلْمَحَبَّةْ إِللِّي مِنْ اللهْ وِالْصَّبْرْ إِللِّي عَنْدْ الْمَسِيحْ!
6
وِكَمَانْ بِنْوَصِّيكُمْ، يَا إِخْوَةْ، بِاسْمْ رَبَّنَا يَسُوعْ الْمَسِيحْ، أَنِّكُمْ تِتْبَعَّدُو عَنْ كُلْ أَخْ يِسْلُكْ سِلُوكْ هَرْجَلَةْ، وِمِشْ بِحَسَبْ تَعْلِيمْ إِللِّي عَلَّمْنَاكُمْ إِيَّاهْ.
7
وِانْتُو نَفْسِيكُمْ عَارْفِينْ كِيفْ لَازِمْ تِتْبَعُو تَعْلِيمْنَا، عَلَشَانْ سِلُوكْنَا بِيْنَاتْكُمْ مَا كَانْ بِهَرْجَلَةْ،
8
وَلَا كَلْنَا لُجْمَةْ مِنْ عَنْدْ حَدْ مَجَّانَاً، لَكِنْ كُنَّا بِنِشْتِغِلْ بِتَعَبْ وِجُهْدْ لِيْلْ وِنْهَارْ، عَلَشَانْ مَا انْكُونْ عِبْء تَجِيلْ عَلَى أَيْ وَاحِدْ مِنِّيكُمْ.
9
وِدَايْتِي مِشْ مَعْنَاهْ إِنُّهْ مَالْنَاشْ حَجْ، لَكِنْ عَلَشَانْ نِجْعَلْ نَفْسِينَا مَثَلْ لِيكُمْ عَلَشَانْ تِتْبَعُو خَطَوَاتْنَا وِتِجْتِدُو بِينَا.
10
وِلَمَّا كُنَّا عَنْدِيكُمْ، وَصِّيْنَاكُمْ بِالْمَبْدَأَ دَايْتِي: لَوْ فِي وَاحِدْ مَا بِيرِيدْ يِشْتِغِلْ، مَا بِيَاكُلْ كَمَانْ!
11
وِاسْمِعْنَا أَنِّ بِيْنَاتْكُمْ نَاسْ سَالْكِينْ فِي فَوْضَى وِمَا بِيِشْتِغْلُو أَيْ شَيْ وِهُمَّ مَشْغُولِينْ بِشِؤُونْ غِيْرْهُمْ.
12
وِإِللِّي زَيْ دُولْ نِوَصِّيهُمْ وِنَّاشِدْهُمْ، فِي الْرَّبْ يَسُوعْ الْمَسِيحْ، أَنَّهُمْ يِكْسَبُو جُوتْهُمْ بِنَفْسِيهُمْ، وِيِشْتِغْلُو بِهِدُوءْ.
13
لَكِنْ أَنْتُو يَا إِخْوَةْ، مَا تِمِلُّو مِنْ عَمَلْ الْخِيْرْ.
14
وِأِنْ كَانْ حَدَاً مَا يِطَاوِعْ كِلْمِتْنَا فِي الْرِّسَالَةْ دَايْتِي، أَعْرِفُوهْ وِمَا تِتْعَامَلُو مَعَاهْ، عَلَشَانْ تِخَلُّو يِخْجَلْ.
15
وِلَكِنْ، مَا تِعْتِبْرُو عَدُو لِيكُمْ، لَكِنْ إِرْشِدُوهْ بِاعْتِبَارُهْ أَخْ لِيكُمْ.
16
وِيُعْطِيكُمْ رَبْ الْسَّلَامْ نَفْسُهْ الْسَّلَامْ الْدَّايِمْ وِفِي كُلْ الْحَالْ! ويكُونْ الْرَّبْ مَعَاكُمْ كِلَّاتْكُمْ!
17
وِدَا سَلَامِي، أَنَا بُولِسْ، بِخَطْ يَدِّي. وِهُوَ الْعَلَامَةْ الْمُمَيَّزَةْ فِي كُلْ رِسَالَةْ مِنْ رَسَايْلِي. وِأَنَا بَاكْتِبْ بِالْطَرِيجَةْ دَايْتِي.
18
وِتْكُونْ نَعْمِةْ رَبِّنَا يَسُوعْ الْمَسِيحْ مَعَاكُمْ كِلَّّاتْكُمْ!