الأَصْحَاحْ 2
1
وِلَكِنْ بِالْنِسْبَةْ لِرِجُوعْ رَبَّنَا يَسُوعْ الْمَسِيحْ وِاجْتِمَاعْنَا لِيهْ مَعْ بَعْضِينَا، أَرْجُو مِنْكُمْ يَا إِخْوَةْ
2
مَا تِضْطِرِبْ أَفْكَارْكُمْ بِسُرْعَةْ وِمَا تِجْلَجُو، مِنْ إِيْحَاءْ وَلَا مِنْ خَبَرْ وَلَا مِنْ رِسَالَةْ مَنْسُوبَةْ لِينَا بِالْزُّورْ، مَكْتُوبْ فِيهَا أَنَّ يُوْمْ الْرَّبْ إِجَى فِعْلاً.
3
مَا اتْخَلُّو حَدْ يِخْدَعْكُمْ بَأَيْ وَسِيلَةْ! وِالْيُومْ دَايْتِي مَا بِيِجِي مِنْ غِيْرْ مَا يِسْبَجَهْ إِنْتِشَارْ الْعِصْيَانْ، وِظُهُورْ الإِنْسَانْ مِتْمَرِّدْ، وَلْدْ الْهَلاكْ،
4
إِللِّي بِيِتْحَدَّى كُلْ مَنْ يِتْسَمَّى إِلَهْ أَوْ مَعْبُودْ، وِيِعَادِيهْ وِيَعْلَى عَلِيْهْ. وِكَمَانْ يَاخُدْ مِنْ هِيْكَلْ اللهْ مَرْكَزْ لِيهْ، وِيِحَاوِلْ يِثْبِتْ أَنَّهْ إِلَهْ.
5
وِانْتُو مَا ابْتِفْتِكْرُو أَنِّي كَتِيرْ جُلْتْ لِيكُمْ الْكَلامْ دَايْتِي لَمَّا كُنْتْ عَنْدِيكُمْ؟
6
وِانْتُو دِلْوَكِيتِي عَارْفِينْ آيْهْ إِللِّي بِيِحْجِزَهْ عَلَشَانْ مَا يِظْهَرْ إِلَّا فِي وَكْتْ مُنَاسِبْ لِيهْ.
7
وِالْتَمَرُّدْ دِلْوَكِيتِي شَغَّالْ بِالخَفَى كَأَنَّهْ سِرّْ. وِلَكِنْ بَسْ لَحَدْ مَا يِتْرِفِعْ مِنْ الْوَسَطْ دَايْتِي إِللِّي حَاجِزْ الْمُتَمَرِّدْ.
8
وِسَاعِتْهَا هَيِظْهَرْ الإِنْسَانْ الْمُتَمَرِّدْ ظُهُورْ وَاضِحْ فَيِبِيِدَهْ الْرَّبْ يَسُوعْ بِنَفْخِةْ خَشْمُهْ وِيِخَلِّصْ عَلِيْهْ بِبَهَاءْ ظُهُورَهْ لَمَّا يِجِي.
9
لَكِنْ لَمَّا يِظْهَرْ الْمُتَمَرِّدْ، هَايِكُونْ كَدْةْ طَاجِةْ الْشِيْطَانْ عَلَى عَمَلْ الْمُعْجِزَاتْ وِالْعَلامَاتْ وِالْعَجَايِبْ الْمُزَيَّفَةْ كُلَّهَا،
10
وِعَلَى جَمِيعْ أَنْوَاعْ الْضَلالاتْ إِللِّي يِجْرِفْ الْهَالِكِينْ لِلْعِصْيَانْ، عَلَشَانْ هُمَّ مَا جِبْلُو مَحَبِّةْ الْحَجْ عَلَشَانْ يِخْلِصُو.
11
وِعَلَشَانْ الْسَّبَبْ دَايْتِي، هَيِبْعَتْ لِيهُمْ اللهْ طَاجَةْ ضَلالْ عَلَشَانْ يِصَدِّجُو كُلْ إِللِّي هُوَ ضَلالْ،
12
وِالْدَّيْنُونَةْ تَجَعْ عَلَى كُلْ إِللِّي مَا يِآمْنُو بِالْحَجْ لَكِنْ الْسِرّْ بِتَاعْهُمْ هُوَ الإِثْمْ.
13
لَكِنْ إِحْنَا، مِنْ وَاجِبْنَا نِشْكُرْ اللهْ عَلَى طُولْ مِنْ أَجْلِكُمْ، يَا إِخْوَةْ إِللِّي الْرَّبْ بِحِبِّهُمْ، عَلَشَانْ اللهْ اخْتَارْكُمْ مِنْ الْبِدَايَةْ لِلْخَلاصْ، بِتَجْدِيسْ الْرُّوحْ لِيكُمْ وِايْمَانْكُمْ بِالْحَجْ.
14
وِلِلْأَمْرْ دَايْتِي دَعَاكُمْ بِبِشَارِتْنَا لِيْكُمْ، عَلَشَانْ نَاخُدْ مَجْدْ رَبَّنَا يَسُوعْ الْمَسِيحْ.
15
إِثْبَتُو إِذَنْ، يَا إِخْوَةْ، وِاتْمَسَّكُو بِالْتَّعَالِيمْ إِللِّي خَدْتُوهَا مِنَّا، سِوَاءْ كَانْ بِالْكَلامْ أَوْ بِرِسَالِتْنَا لِيكُمْ.
16
وِيَارِيْتْ رَبَّنَا يَسُوعْ الْمَسِيحْ نَفْسَهْ، وِاللهْ أَبُونَا، إِللِّي حَبَّنَا وِوَهَبْنَا بِنَعْمَتَهْ رَاحَةْ أَبَدِيَّةْ وِرَجَاءْ صَالِحْ،
17
يِشَجِّعْ جِلُوبْكُمْ وِيِثَبِّتْكُمْ فِي كُلْ عَمَلْ صَالِحْ وِجُوْلْ مَلِيحْ!