¹ Iminalriti catsa jliaji italricanata wanaco; catimaca jliaji jiipai; catima tsakja njaji Manoa inomapi. ² Corrin wataita wacapacani ima iyadaoca njite cadaocadalri idanata waoya. Lritalricanataca matsia njite corrin Lrimatadaca. ³ Tiyé iawa Lripeyajle njite Lrimjaitaca pjiomi njaji Lricoema lriacawa lrico. ⁴ Eeno iperro capisho njaji imotolri Lrioshete lricanacarro jalredaoca lrico; niini cananica jliaji jiipai lricapa cádanacon. ⁵ Njaji jiipana yenomperri nacodocawa mapadoña sho nacapa cádanaco Jliaji Iminalriti, jliaji jalredaoca iminalri. ⁶ Njaji enocoma nacaite Lrimatsiaca naco, njite pjiomi njaji jalredaoca lricoperri nacapa Lrimatsiaca melremelredalri. ⁷ Capaimani caotsa naicao pjiomi njaji iacape matsiadalri narsotsa njaji idolo nanaitjajitsa, njaji matsiaperri sho iajiacacawa naikjaote njaji idolonai miperritsa. Icoajawa Lrikjaolre pjiomi sha idolonaitsa, pjiomi sha dionai. ⁸ Catimaca Sión jlimi cádanaco cayo, catima tsakja njaji Judá lricoperri naikjaote njaji yacoti Picaiterri, no-Minalri. ⁹ Ima pjia wa-Minalri, icatsa Pjia Yenonrsedalri pja pjiomi ioya jalredaoca lrico. Icatsa Pjia njerretanda naaco sho yenonrse pja naoya njaji nacaiterri dioca. ¹⁰ Sha ipeyocape wa-Minalri, matsi icapaca imatsicanati irso. Jliatsa iwapa njaji jlienitaji Lrirsowawa, corrin Lricadaa matsiperri inaitjaca narso maatsi. ¹¹ Inaiki matsiaperri irsoca jliaji camartrai njite jliaji itimati narsowalre njaji inaiki corripetsa ipeyo ishati. ¹² Sha inaitjacape matsia, icatimatacawa wa-Minalri naco; ia matsiadalri Lrirso jliaji mamatsicanadalritsa.