¹ Wa-Minalri Dio, icatsa jliaji iomacada wacoadawa, Dio ioma wacoadawa, Picada nacapa Pjiaca wainai. ² Pjinicoenawa, Picaitena naacona njaji inaiki jalredaoca lricoperri, picadena njerrapitaca njaji inaiki padalreperrimi nanaitjanda ikjaote. ³ Aimena jalredaoca piwapaca no-Minalri, aimena jalredaoca Piwapaca yomjecarro njaji inaiki matsiperri. ⁴ Namotoita aima yacoti shametakjeti naco, matsia sho najiacacawa nasho njaji matsirri nanaitjalri. ⁵ Opi napirseta njaji Pinaikite, Iminalriti; opi njerrapiteta njaji inaiki iofacape Pjipaite lricoperri. ⁶ Naino njaji madoiyoanaipe njite njaji pada jiipai nakjoiteperri iofacape Pjipaite lrico, njite naino tskja njaji maoñjerrinai. ⁷ Ima naco cayoji: ''Corriotsa Iminalriti icapá carrocana, corriotsa Jacob i-Diote yajícarro coajica njeyapacao.'' ⁸ Yanji watsa coajica, sha inaiki macadawanaitsa. ¿Inaiki matsilriperrimi, coancaojli pjenaotsa yanji jalredaoca? ⁹ Dio inaitja jinacolricowa jimicarro njite Lrinaitja tsakja itjí icapácarro; niini ajena inaitjaca cayoji corri capisho jimi njite corri capisho icapa tsakja. ¹⁰ Niini watsa pjiomi njaji corriperri ioma yajica, nawada corricaotsa Dio jirrapitetacaotsana. ¹¹ Dio yajintsa nawaopiakje lricoperri njaji atsianai; corri petsa coadacana ima caolri catsana. ¹² Matsiadalrica jliaji Picanantalri , no-Minalri, jliaji Picanantalri Piaco naco. ¹³ Jirrapitakjeti ino cádanaco lrikjaolre corriotsa jlirrapitá carroca a kjerreca Pino njaji inaiki matsiperritsa. ¹⁴ Ima corriotsa Dio imacá carroca njaji Lrinaikite, njaji Lriyarrope. ¹⁵ Ima njaji caconaperri icaitecape naacona njaji inaiki nadejiwatsa matsia; Njite nawatsa jliapodam pjiomi njaji matsiaperri icaolre ricó. ¹⁶ ¿Cocaotsa jinicoa idanacaoda njoa naoya njaji inaiki matsiperri? ¿Cocaotsa jinicoa matsiperri ikjoete noikjaote? ¹⁷ Corri cada pia Dio ikitsindata njoa opi pienantja mayamki njoa. ¹⁸ Nocaite cádanaco, ''nopjoaca keti cawa niini wapekena njowacawa,'' no-Minalri, macadatsa njowawa, ikena Pinaitjaca norso cayoji Picaite capisho, corrin Picadaa njowacawa. ¹⁹ Njota cádanaco nocaolre aima ikjaote, ikena Pimaiyaketaca njoa njite Picadaa catima nofacawa. ²⁰ Corrin nataita Pikitsindajica njaji talricanatinai inaitjacape yacoti kjaidaperri matsiperritsa. ²¹ Nawacacawa papocoa dawacalri ricotsa nanaitjácarro nawaopiakje coajícarro naino jliaji inaitjacada matsia naoya, njite nacaite lriacona matsitsa jliaji mamatsicanadalritsa nainó carrotsani. ²² Mitsa no-Minalri iwapa njoa naoya njaji nocoema, njite no-Diote iwapa njoa Jliida sho caishopa yomjeca njoa. ²³ Lricadaotsa namatsicanatsa jiwacawa nanacotsa, njite nanaitja capoa matsi namatsicana tsaotsa inona. Wa-Minalri Dio tsaotsa inona.