¹ Pwapa pjimi matsia picao Pjia Iwapacada njaji Iraelnai, Pjia njewidapo njaji José poco; Pjia iofacada naicao njaji querobinai, pia wacanarrawa. ² Piarro wanaco Pjiida nacapatsa njaji Efraín poco, Benjamín poco njite Mnasé poco; njite píno Pimanacota fa. ³ Dio, Pimatsieta tsenakja fa; Picañjata nacapa pjia catsa wainai, njite manaco caotsa fa cayo. ⁴ Pjia Iminalriti na-Diote njaji tsolrodaonai aimadan, ¿Coancaojli pjenaotsa yami kerroaca Pjkia nakjoete njaji Pinaikite aimadan, ima corrica pjimi narso natatja cádanaco Piinai? ⁵ Oopi Picada coyolreca nacaolre pekirridalri caidalritsa. ⁶ Opi Picadaa nainoacacawa waikjaote njaji wacodapi-perri, njite necaaca waicao njaji wacoema. ⁷ Pjia na-Diote njaji tsolridaonai aimadan, Pimatsieta tsenakja fa; Picañjata nacapa pjia catsa wainai, njite manaco caotsa fa cayo. ⁸ Pjita Egipto lrikjoite cayoji apana ova inana capisho fa; Pipeeco njepaite ioya njaji inaiki njite Picadaa waofácarro niiní ⁹ Pimatsieta matsia jliaji jiipai lripia jliaji ova inaná; lripakri itaoñawa niini lripakjamitaca jliaji jalredaoca. ¹⁰ Oopi lrita njaji jiipana jérri ioya njite lriita tsakja njaji cedrona Dio iyape náki sho. ¹¹ Lrikipe itaoñawa jalripa niini naocacawa macapawan ikjaolre njite njaji lritorro naocawa Ooni macapeki Eufrate nacojle. ¹² ¿Coada pipeco nawai njaji paniati nini njepaca nainaca lrioya pjiomi njaji jiyapacaperri niini? ¹³ Njaji apiya namatsicacana, njite njaji maficalri kerroaperri naiñjaca nainaca. ¹⁴ Piwapa pjatsa Picapa, Pjia Dio enocoma lricoda; Pioma picapa enocoma lrikjoite waikjaolre picapácarro njite piwapácarro jliaji Pipaniapji. ¹⁵ Icatsa jaicopaca jliaji piapananda, Pjia no-Diote, lritorro Picadanda itaoñawa. ¹⁶ Opi nayaoni njite njamjaitani tsakja; Opi nañawa Pjirrapiteta capoana. ¹⁷ Picadaa jlidawa jliaji Atsia Piniwananda, jliaji Atsia Yenipe Picadalri kjaidacani Pirsowawa. ¹⁸ Niini corriotsa fenacarroca Pioya; ferretaca tsenakjaotsawa, njite wawanacaotsa Pikjaolre Piipitana nacó. ¹⁹ Pjia Iminalriti na-Diote njaji tsolrodaonai aimadan, Pimatsieta tsenakja fa; Picañjata nacapa pjia catsa wainai, njite manaco caotsa fa cayo.