¹ Nodawacawa pinacojle no-Minalri; macadatsa napaimanietaca njoa coancaojli cantja. ² Piyomjeta njoa njite Picadaa nofawa nomaodacatsa Pimatsiaca ikjaote; Picadaa pjinacolrico noikjaolre njite Piyomjeta njoa. ³ Nooma Pidanataca njoa cayoji jiipada macadalri idanata capisho njoa nocoema ioya nayometá-carro njoa naoya, Picaitjenina yomjécarro njoa, ima icacatsa Pjia idanatacadaca njoa matsidalri ioya njite Pikjaidataca njoa. ⁴ Piyomjeta njoa DIo, naoya njaji matsiperritsa idejica, naoya njaji corripetsa inaitja matsia njite naoya njaji inaitjacape maatsi apjetsida irso. ⁵ Ima Pinacoca nowapa nocapa matsiaperri, no-Minalri. Nocadaa nocaolre Pinaco noyempetica nakjoite toa. ⁶ Ima Piwapa piaca njoa njodoa iwawa lrikjoite toa; Pjiatsa jita njoa njodoa iwawa lrikjoite; Noa watsa matsiadalri Pinaco minitsa caidalritsa. ⁷ Pada nacanpadaca naicaowa njoa njaji inaiki; icatsa Pjia iwapacadaca njoa kjaidadalri. ⁸ Caidalritsaotsa nocaiteca matsiadalrica Pjia, jalredaoca icoam nonaitjaca matsia Pimatsiaca ikjaote. ⁹ Maatsawa noya tecoa pekirri cádanacoenaotsa njoa; mamacatsa njoa mjaida cádanacoenaotsa njoa. ¹⁰ Ima cacoca matsi nonaco njaji nocoema; njaji iwapa cada icapa njoa nanaitja nawaopiakje coajicarro nanaitjaca norso matsi padenirri. ¹¹ Naaco nonaco: ''Dio imacandamina; iomani inocarroni, ima corritsa pacapa iyomjetacadani.'' ¹² Dio, maofatsawa teeco noya; no-Diote, kjeya pinoca Piyomjetácarro njoa. ¹³ Pipaimanietana njite piwayaketa njaji yemalri mana nokjoete; Picadaa pjiomi icoitana njite corriotsa coca inaitja matsia narso pjiomi njaji iomacape inaitja norso maatsi. ¹⁴ Mitsa njoa caidalritsa nowapacaotsa Pinaco njite noa caotsa matsiadalri Pirso pekirri pja. ¹⁵ Nocaitecaotsa nonoma sho Pinaitja capoa matsia njite Piyomjetaca njoa jalredaoca icoam, corri cadanatsa noaji coanshopaca. ¹⁶ Nocaiteotsa nanaco njaji Pinaitjaji Pjida sho; nocaiteotsa Pinaitjanda inaco matsia, icamitsa Pinaco watsa nocaite. ¹⁷ Dio, Picanantjenina njoa noyempetica nakjoite ; Panashete nocaite Pidejicalre matsiaperri naco. ¹⁸ Ajádalri nocaite, pekirri cádanacoatsa njoa, Dio, njite jalrenatsa notsicolre, macatsaotsa njoa, ima nocaiteca coanfdalrica Pjida najícarro njaji walricomanai, nocaite Pjiida naco narso najícarro pjiomi njaji inolri naikjaolre. ¹⁹ Yenondalrica Pimatsiaca, Dio, Pjia inaitjacada aima Pidejicalre macadalripe, ¿coca itaita inaitjaca cayoji Pinaitja capisho? ²⁰ Picadaa feyapawa aima jirrapitinaperri naco matsinaperri, njite Picadaa wacafiawa tsenakja mayamicalri ioya, Picadaa fenicocawa irrirri-rikjoite. ²¹ Picadaotsa norso aima itaitakjeti, njite Picatimata tsenakja njoa. ²² Noá tsakjaotsa Pirso matsiadalri arpa sho nocadaa capoa nocaolre Poinaco, nocanta caotsa noácarro matsiadalri Pirso, no-Diote, arpa sho, Pjia mamatsicanadalritsa Irael lricoda. ²³ Kjemaotsa nocantaca Pirso itimatsi ricó, nocafica sho tsakja, njaji Piwentaji. ²⁴ Caaco tsakjaotsa njoa nanaco njaji Pinaitjalri inaco matsia jalredaoca icoam; njite capaimanicaotsa pjiomi njaji iomacape piatja njorrapitaca.