¹ Piyomjeta njoa, Dio; ima aimaca ooni njite wade noaji noticocomacawa. ² Njoewacawa jotojitopalri lrico, corricawatsa pacapa tarracawa papjoa carro inaco; oopi njoewawa tjewaca ooni ricó, njite ooni jiyapacawa noicaona. ³ Mapjina noiyaca; meta ketsa nowedalrico; njite tamalrinatsa nocapaca nowapa cawiaca Dio. ⁴ Aimadan pjaca njaji nocoema naoya njaji tsicolre njowida nacope, matsiperri icapaca njoa mikjapantsa. Naoma nawayaketaca njoa niini nacashataca nonaco, nacaite noñaitoca, njite panaya norsotsa nodietaca njaji corripetsa noñaito naoya. ⁵ No-Diote, piajintsa pjiomi njaji imatsicanati nonaitjalri, corrin notaita nodawaca pioyana. ⁶ No-Minalri, macadatsa capaimanca najiacacawa njaji icadacape icaolre pinaco noikjaote, Pjia Iminalriti, Natalricana njaji tsolrodaonai aimadan, macadatsa Pipeco capisho njaji icadacape icaolre pinaco nomatsicana ikjaote, Pjia, Iraelnai i-Diote. ⁷ Cacoca matsi norso Pikjaote, njite kjenataca njoa naikjaote. ⁸ Njaji nokitsiñape nacapa njoa apada tairri capisho njoa, apama capishotsa rsoaji njodoa. ⁹ Catima pia nocapaca njaji Pinaikite mitsa panaya lriwayacakenawa, ima njaji icoitacape Pinacojle njewacawa nonacotsa. ¹⁰ Noiya cádanaco njite noita cádanacoa, icamitsa necaaca noicao. ¹¹ Inona cádanaco njoa cayoji mayami capisho nokitsinda, icamitsa necaca noicao naaco sho. ¹² Caaco matsi nonaco njaji iofacape yacalre ipananoma icodapi; njite njaji idewanacape nacanta nonaco. ¹³ Mitsa, no-Minalri, noytatjaca Piinai panaya, njite kjena capoa Picapaca norso, Pjiepena njoa; Piyomjetena njoa piinaiwa. ¹⁴ Pjita njoa jotojotópalr ioya, macadatsa njoewacawa lri-ricoda, Piyomjeta njoa nocoema ioya, njite lrioya jliaji ooni tjewacadalri. ¹⁵ Macadatsa ooni itarraca idee njoa wadentja tirrolri írraca njoa, wadee jlietaca njoa tjewacacawa lrico. Wadee tjewacadalri iñjaca njoa. ¹⁶ Pjiepena njoa, Dio, ima matsiadalrica Pjia noapiya; Kjena Picapaca norso, pinoena, Piyomjetá-carro njoa. ¹⁷ Mamacatsa njoa, njoa Pirsodalri, ima njorrapitaca jliaji; kjeya Pinoca piyomjetácarro njoa. ¹⁸ Pinoena Piyomjeta njoa; Piwataca njoa nocoema ioya. ¹⁹ Piajintsa coajica njorrapitaca, piajintsa coajica capaimanca noicao caco capoa matsi nonacona; piajintsa kjaitenaica njaji nocoemanaipe. ²⁰ Opoi namatsiketa njoa njaji cacoperri matsi nonaco; caifia kena njoa nama; noma tja cocaca kjena pjatsa icapaca norso, mitsa corrin pacapa apada icatimatacadantja njoa. ²¹ Icamitsa naaca noiñjawa namanjé, njite noma piatja noirrao, mitsa naaca noirrao jipitiajai. ²² Picadaa naijaoda inaitjaca maatsi narso; njite picadaa matsi njeyapacawa namaodaca cádanaco tja naofacawa. ²³ Picada yalrimica natji wadee nacapa catoa; Picadaa pitemica nainjapi ricó wade nanaitja minicatsa njaji nanaitjalri mana. ²⁴ No-Diote, Picadaa najícarro pirroa, macadatsa yomjecana Pirroa ioya. ²⁵ Picadaa maminalrica jliaji naofacawa lrico, wadee nini catoa iofacape lriricoda. ²⁶ Ima napinetaca jliaji atsia Pjirrapitetanda. Necaaca lricao jliaji Pjirrapitetanda. ²⁷ Picadaa njerrapitaca lrisho jliaji njerrapitalri njaji Picadaji jirrapitaca. Macadatsa napitocawa lrioya jliaji matsidalri nanaitjalri. ²⁸ Pjiata neepitana lrioya jliaji Pipaperran Cafidalri, wadee nepitana irrocawa nainai njaji inaiki matsiaperri. ²⁹ Inonaca njoa njite caifica njoa, no-Diote matsiadalri, pinoena Piyomjeta njoa. ³⁰ Noacaotsa matsiadalri Dio ipitana irso papeco canción sho njite njorretacaotsa Lriipitana yeno nocaite cádanaco lrinaco matsia. ³¹ Matsia pjaotsa wa-Minalri icapaca narso naoya njaji boey noinolri Lrirso, apana toro ioya tsakja, njaji maficalri catso´taperri njite catsowaperri. ³² Catima watsa njaji kjenaperri iwaopiakje nano capoa naa matsiadalri Dio irso catima capoa Lricapaca narso. ³³ Ima Dio jimica narso jaji canacaiperri irso pjiomi, njite corrin Lrimaodaca naoya njaji presonai. ³⁴ Jiipai, eeno, njite macapawan tsakja ia matsiadalri Dio irso, njite pjiomi njaji jirsacape icaolre iá tsakja matsiadalri Lrirso. ³⁵ Ima Dio iyomjetacaotsa Sión, njite Lridia tsenakjaotsa Jlirreta njaji yacalre Judá lricoperri naofácarro tsenakjaotsa nini. ³⁶ Nayadacaotsa niini njaji pinakjoiteperri, njite naofá tsakjaotsa lri-ricoda njaji ipeyocape Pjia.