Capítulo 68 - Jliaji iyomjetacada fa

1 Dio jinico watsa nakjoete njaji Lricoema; njite napito caotsa lrioya pjiomi njaji matsiperri icapaca Lrirso. 2 Icamitsa nañjacawa Dio ioya njaji inaiki matsiperrimi cayoji tiye iitaca sho caolri ideji teeco. 3 Mitsa njaji matsiaperritsa, icamitsaotsa catimacana Dio ipeyajle. Pakjamicaotsama itimati sho. 4 Icanta Dio irso. Icanta Lripitana matsiadalri naco. Ia matsiadalri Lrirso jliaji yajicadawa iyadaoca naco njite jliyapawa Ooni Jordán iicao macaitecawa jiipai. Icatimatacawa Lripeyajle. 5 Njanirrica njaji mjanirripemi, icapacada narso njaji madoiyoanaipe, Dio cani Lriofacawa lrico corricawatsa pacapa imatsicanati. 6 Lricadaa naofacawa padapaneta lricotsa njaji yajicapewa apadatsa; icamitsa Jlitaca njaji presonai canción shotsa; mjita njaji mjepacaperri icamitsa naofacawa lri-ricoda jliaji jiipai corridalritsa iya jíwa mana iicao. 7 Njo-Diote, pikitsindata pjia njaji pinaikite namoto caojli pia Egipto lrikjoite, nacádanacoa jalrapocolri ricó, 8 canani pjia jiipai; njite iyao jiwa tsakjawa eenolrikjoite nacapa cádanaco Pjia, Piorroco caojli pia Jiipana Sinai naco, canani tsakjani nacapa cádanaco Pjia, Iraelnai i-Diote. 9 Pjia Dio, Picadaa iyao jiwacawa lrinaco jliaji Pjipaite kjaidácarro tsenakjani, jliaji jiipai corricawetsa paniati imotocawa ima mjaidakenani. 10 Icapiatsa naofacawa niini njaji Pinaikite aimadan; jliaji jiipai pimatsietanda pimatsiaca ima narso njaji kjenaperritsa. 11 Dio inaana, njite aima inaiki njaji yalri icaite jliaji yácoti matsiadalri. 12 Njaji tsolrodaonai aimada nayaperrima njaji talricanatinai kjaidaperri, oopi napitoa, njite njaji inaitjepe iwapacapena panti ricó naaca narsowaca njaji njetaji naoya, njaji tsotsobo naijetaji inaco palrata sho njite owirro sho tsakja. 13 ¿Coada iofawa pirraiti iofacawa lrico sha iwapacapena? Irso pia tsakjanta iacawa oowi ricó nainai. 14 Jliaji Kjaidanalri ipocota pjiomi njaji talricanatinai ninperri pia, naa njitewa cayoji lria capisho pia jliaji itamana jiwalri pia Jiipana Salmón nacó. 15 Apana jiipana yenonni jiipanalrima cawa lrico Basán jipaite ricó; Jiipana yenonni icatsa Basán jipaiteca aimacawa jiipana. 16 ¿Coada pimatsica picapaca norso, pjia jiipai aimacawa jiipana yenonnipe, jliaji jiipana Dio iomacawa lriofacarrodawa niini?. Mitsa, ajadalrica, icatsaotsa Lriofacawa niini jliaji IMINALRITI caidalriwenatsa. 17 Njaji njecocarrofiape Dio iyarrope, aima sho naniwetacana; Lrino nanaco Jiipana Sinai nakjoite Lriipana lricojle Matsiadalri. 18 Oopi pjirrawa yenonrse, oopi pidee njaji presonai; njite naaca ofrenda Pirso njaji jalredaoca lricoperri, nja tsakja ya Pirso ofrenda njaji inoacacaperri pia Pilkjote, piofá carroatsa nire, Pjia wa--Diote. 19 Matsiadalrica caidalritsa jliaji IMINALRITI, lridee capoa waoya jalredaoca icoam wadecalre, jliatsa jliaji Dio imanacotacada fa. 20 Jliaji wa-Diote, icatsa Dio imanacotacadaca fa; icamitsa jliaji Iminalriti itaitalri iyomjetaca fa mayamicalri ioya. 21 Mitsa Dio inocaotsa njewida naco njaji Lricoema, njaji catsicolrenepa yajicapewa Lrikjoete. 22 Lriaco jliaji Iminalriti: ''Nodeeca tsenakjaotsa njaji Nocoema Basán lrikjoite; Nodecaotsana Ooni macapawani itjewacaca lrikjoitena, nadawacalri nirse 23 iwayaketa carroatsa matsiape njaji icoema, ipjoá carroatsa jípa nerrana naco, njite itsinon iperrocaotsa neenene sho nairrana njaji icoema. 24 Dio, nacapjen coaji nacawa papocoa njapodawaca, Nácadanacoa pikjaote Dio, Pjia no-Talricana, njewa cádanacoa piipana lrico. 25 Njaji icantacape inita shewacawa, njite naawa njapodamtja njaji ikjematacape jaicoita, njite napecolrico naawa njaji inaitjepe walridarrope nanirrinaipe toa iñacape pandero. 26 Icaite matsia Dio naco iwacacalriwa nini; iá matsiadalri wa-Minalri irso, sha ijádalripe Irael inakjoiteperri. 27 Iníta sha Benjamín poco, sha tsoperritsa imaimaca naoya njaji ikitsiñape, njiteotsa njaji caconaperri Judá poco inakjoiteperri, njite ikitsiñape imaimaca tsakja, cayo tsakja njewidapo njaji Zabolón poco njite Neftalí poco tsakja. 28 Pjia Dio, Picañjata Irael icapa pjiida kjaidadalri; jliaji picañjatalri nacapa oopi waferrinaipemi irso. 29 Picañjta wacapácarro Pjiida piorroco cádanacoatsa Jerosalén lricojle, naderri nirse Pirso aima matsiaperri njaji talricanantinai. 30 Iwana kjaida oowi iyarrokja lrico nakjoete njaji Egipto lricope njaji maficalri kerroaperri icayosho iofacape awacada lrico, njaji inaiki aimadan kjaidaperri toro icayoshoperricana. Pikjenatana njite picadaa nadeca Pirso mashopa pirso matsiadalri; Pipocota njaji inaiki aimadan ipeyocape nanaitjaca oowi apana ikjoete. 31 Naawatsa njaji caconaperri yenipe Egipto lrikjoitepe; njite njaji Etiopia njiteperri nakjeyapitacaotsa naacawa nácarro na matsiadalri Dio irso. 32 Icanta Dio irso, pjiomi sha talricanatinai iwapacawa lrico jalredaoca lricope; iaca matsiadalri icantanda ricó Dio irso. 33 Icanta Lrirso Jliaji Yajicadawa eenocoma iicao, jliaji eeno miyacatsa; picapa coajica Cácocani kjaida jídati sho. 34 Dio iyadaca jliaji jidati; Jliatsa italricanataca Irael naco, njite Lricañjata tsakja nacapa Jlida enolricojle. 35 Dio, corrin coca itaita imafiocaca Pjia Piofacawa lrico mamatsicana cawa tsa; jliaji Iraelnai iDiote, Jliatsa icadaa njaidawa njite itaitakjeti narso njaji lrinaikite aimadan. Matsia wacaiteca wa-Diote naco.