¹ Iwana kjaida catiima capoa sha jalredaoca lricoperri Dio naco. ² Icanta kjaida Lriipitana imatsiaca ikjaote; icaite icanta cádanaco matsiadalrica Dio iipitana. ³ Icaite Dio irsio: Itaita cáda inaitjaca pjiomi Pjia. Kjaidadalri capoa Pjia Pitalricanata nanaco njaji picoema. ⁴ Náwatsa matsiadalri njite nacanta tsakjaotsa Pirso pjiomi njaji jalredaoca lricoperri; Nacantacaotsa piipitana irso.'' ⁵ Íno icapa Dio imatsiaca melremelredalri; Njaji inaiki jalredaoca lricoperri nafió lrikjoete nacapa cádanaco pjiomi njaji Lrinaitjaji. ⁶ Lrimjeco jliaji ooni macapawan jiipai nacojle; nayoeta njaipa sho jliaji ooni, njite wacatimatacawa Lrinaco. ⁷ Lritalricanatraca Jlida sho; njite lricapa pjiomi jalredaoca lricoperri; niini corrin matsiaca padalreca njaji imacoadatacaperri yácoti. ⁸ Icaite matsia Dio nacó, sha inaiki aimadan, icada njemica kjaida coajica iaca matsiadalri Lrirso. ⁹ lricada cafitsa fa nainai njaji cafiperri, njite corrin Lricada fewacawa. ¹⁰ Ima Pjia, Dio, opina piwi Picapao fa; Piowica fa cayoji pawi capisho ajádalri cada jliaji palarata. ¹¹ Pjia wa-Diote, Picada njepaca fa cayoji njepa capisho copje toda lrico; Picada wadeca jamiñaperri wanaco. ¹² Picada napjoetaca fa; Piticometa fa njite Picadaa tsakja feyapacawa tiyé ricó; mitsa piketem picadatsa fersaca wacaolrewa. ¹³ Njoewa caotsa Piipana lrico nodeca nirse ofrenda nomjaitanipe Pirso; njite nonaitjacaotsa pjiomi njaji nocaiteji nonaitjacaotsa Pirso ¹⁴ njaji yácoti nocaiterri Pirso noyami caapjite. ¹⁵ Node caotsa Pirso ofrenda maficalri nomjaitaji kepeperri njite nomjaita tsakjaotsa chivo joiwí carroatsa Piají; nodé tsakjaotsa Pirso toro njite cabra tsakja. ¹⁶ Inoena jimi icao, pjiomi sha ifiocaperri Dio iwana, njite nocaitecaotsa njaji Lrinaitjalri nocafica irso. ¹⁷ Nowana Lrikjaolre nonoma sho, njite caco njoa matsia lrinaco noenene sho. ¹⁸ Noají cadantja norsoca pecado nocaolre ricó, corri piatsantja Dio jimica norso. ¹⁹ Mitsa, ajádalri Dio jimica norso; Lriwapa jlimi norso coajica notatjaca Lriinai. ²⁰ Wacaite matsia Dio naco, corrin jliena Lrioya jliaji notatjalri Lriinai njite corrin yami kjenaca lricapaca norso.