1 Pjia Dio, Pjia iofacada Sión lrico, piwapa waoya wacawa Pirso matsiadalri; njite piwapa wanaitjaca njaji yácoti wacaiterri wanaitjaca Pirso. 2 Pjia jimicada coajica watatjaca piinai; njite naaca pikjaolre pjiomi inaiki jalredaoca lricoperri. 3 Cayoca faji panaya wamatsicana shama capisho fa; njite picada wamatsicana jiyapaca Pioya padenirri. 4 Catimaperrica njaji inaiki piniwananipe natsomitácarro Pjia, naofácarro Picodapi. Corrin coca canacaica warso Piipana mamatsicanadalri ricó. 5 Matsia capoa Pjia wapiya Pinaitja warso njaji matsiaperri, Pjia Dio iyomjetacaita fa; Pjia nacadanda nacaolre inaco pjiomi njaji jalredaoca lricoperri njite njaji iofacape teeco ooni macapawan pemajle. 6 Ima icatsa Pjia icadalri nemawa taimi njaji jiipana, Picañjata nacapa kjaidadalrica Pjia. 7 Pimananita macapawan ifaina keñokja cádanaco, njite Picada tsakja namaodaca njaji matsi cádanaco njaji inaiki napiyawacana. 8 Pjiomi njaji iofacape teeco lri-ricoda jiipaica jliaji njite nafiocawa nacapa cádanaco njaji Lrinaitjalri; Picadaa catimaca pjiomi njaji inaiki jalredaoca lricoperri. 9 Pino pikitsindata jliaji jiipai; Pjiatsa icadaa ooni yarrocawa; Pjiatsa icadaa paniati ishi narso njaji inaiki jalredaoca lricoperri Pimatsieta cádanaco jliaji jiipai. 10 Pipotsieta jliaji jiipai pimatsietaji, pipacoacata jiipai; pimoyeta jliaji jiipai iyao sho; Picada matsia nataoñaca lri-ricodaperri. 11 Picada matsia paniati inacaca año icoam; njite iyyao jiwacawa nanaco. 12 Aima itamana jiwacawa malritsi naco, njite catima nacaolre njaji jiipana catima capisho inaiki. 13 Aima oveja itaca jliaji malritsi coa cayoji tsaya capisho lrirso; aima tsakja lripaniana jliaji jiipai ioyawacadalri; iwana kjaida catima capoa sha, njite icanta tsakja.