¹ Dio-ca Jliaji idanatacada fa njite Jliatsa jliaji ikjaidatacadaca fa, njite corrin tecoca waoyani feyapa cádanaco maatsi. ² Caishopa fa, corrin coada wafiocawa, canani cadaa jiipai, o canani cadaa njaji jiipana njite macapawani tsa, ³ cafaina cadaa njaji oniñokja, njite canani cadaa njaji jiipana lriñokja jiida sho, corriuotsa wafio carroca. ⁴ Njaji imaodacacapetsa iofacawa napiyawaca nacadaa catima naofacawa nayacalre-ricó njaji Dio inaikite, Lriofacawa lrico jliaji Yenonrse-dalri Pja pjiomi ioya jlienitanda Lrirsowawa. ⁵ Icatsa Dio iofacawa niini; corrin coca itaita shenitacan njite; Dio ikitsindataotsani tsomica jalrecani. ⁶ Cafainaca narsowaca njaji talricanatinai jalredaoca lricoperri njite pacoa iinoca njaji pacoa lricope; Ikena Jliemataca kjaida, ikena jiipai icodocawa. ⁷ Wainai catsa Jliaji Tsolrodao aimadan Italricana; jliaji waferrim i-Diote icatsa Jliaji idanatacadaca fa. ⁸ Inoena, icapácarro coajica Dio idejica, coajica Lrimatsiketaca jliaji jecoapi. ⁹ Lricada yamicarro nanaitjaca oowi pjiomi jalredaoca lrico; Lrimatsiketa naoya pjiomi nainoaca shopawa; njite lrimjaita naoya pjiomi nadanaita. ¹⁰ Maco toa sha itaitácarro yajica icacatsa Dio-ca Njoa; Nacaiteotsa nonaco kjaida pjiomi njaji jalredaoca lricoperri naofacawa lrico. ¹¹ Wainai catsa Jliaji Tsolrodao aimadan Italricana; jliaji waferrim i-Diote icatsa Jliaji idanatacadaca fa.