¹ Femi matsia fenacolrico sho catsa, Dio; njaji fanirrinaipe nacaite femi coaji piaca Pinaitja nacapa yempeti caojli piatoana oopi. ² Pjita njepaite ioya njaji inaiki Pjida sho, njite Poicadaa nakja njaji wakitsiñape aimadan naofácarro njepaitemi lrico; pimatsiketa njaji iofacapempia niini, mitsa pimaimataca njaji wakitsiñape aimadan lri-ricoda jliaji jiipai. ³ Corrin narsoca jliaji jiipai naofalri irricoda panaya namatsetan sho, njaida sho cantjá; mitsa Pjiatsa ikitsindatana Pjida kjaidadalri sho, njite camarrana matsiadalri pinakjoitedalri ikitsindatana, ima matsiaca Picapaca narso. ⁴ Dio, icatsa no-Talricanaca Pjia; Picadena Jacob shametácarrona. ⁵ Pinakjote watsa wataitaotsa wapirsetaca njaji wacoema; Piipitana sho watsa wapjoa caotsa nanaco, njite pjiomi njaji yemalriotsa wakjoete tsakja. ⁶ Ima corriotsa nocada carroca nocaolre noyawitsioco naco, corrin tsakja nomatsetan naco nja cantja iyomjeta njoa. ⁷ Mitsa Pjiatsa imjomjeta fa wacoema ioya, njite Pipaimanieta njaji matsiperri icapaca warso. ⁸ Dio nacotsa matsia wanjiacacawa padaa naco jalredaoca, njite waaca matsiadalri piipitana irso irso caidalriwetsa. ⁹ Mitsa panaya opi Pimenata fa njite Picada caacoca wanaco matsitsa, njite corrinatsa Pjiaca nainai njaji wa-tsrolrodaonai nacádanacoa owi rico. ¹⁰ Picada wapitocawa naoya njaji wacoema njite njaji matsiperri icaáca warso njetaca nayadawa pjiomi inaniti wa-tsolrodaonai iniwalri piatja wacoema ioya. ¹¹ Opi Picadaa nainoca fa cayoji naino capisho oveja naiñjao njite picadaa nadeca fa padapena waoyawaca pada jiipai nacojle. ¹² Piwendeca njaji Pinaikite macoadatsa; corriotsa cayarroají carroca Pjia cayo capoa Pinaitjana. ¹³ Opi Pima namenataca fa njaji iofacape wacodapi, necaaca waicao njite kerroa warsona naji cádanaco wawaida naco. ¹⁴ Picadaa nacoitaca fa yacoti matsiperri njaji apana inaiki aimadan, njite Pima nadetsicaca njewida nacapa cádanaco fa. ¹⁵ Caidalritsaotsa nowadacaotsa coajica matsidalri ketsa njoa, njite capaimaniketsa njoa naoya ¹⁶ lricoita capoa njoa matsitsa njite matsi cacoca nonaco, naikjaote njaji nocoema njite lrikjaote jliaji iomalri inoca njoa nacoadao. ¹⁷ Cayo cada feyapacawa; corrin yami wawadaca Pjia, corrin tsakja wawita kjapan catsa jliaji yacoti Pinaitjalri wapiya. ¹⁸ Corrin yamica fa Pioya; corritoa yami wanaitjaca cayoji Pioma capisho wanaitjaca. ¹⁹ Mitsa, opi Pjirrapiteta fa matsina njite Picadaa waofacawa naofacawa lrico njaji yamapoipoi, njite opi Picada mayamica fa. ²⁰ Wamaodaca cadaa lriipitana ioya jliaji wa-Diote o waa cadawa njapodam njaji idolonai, ²¹ ¿opi tsantja Piaji coajica? Ima Piajica pjiomi njaji wadawalri wacaolre ricó. ²² Ajadalri, Pikjaoteca naino fa njaji inaki jalredaoca icoam; nacapa cafa cayoji pacapa capisho oveja nadeji nainocawa lricojlena. ²³ Picafiena, ¿Coada pima, no-Minalri? Pjinicoenawa, mamenatatsa fa pioyawa caidalritsa. ²⁴ ¿Coada Pidawacawa waoya njite corrin Pioma picapaca coajica ferrapita, coajica njerrapitetaca fa? ²⁵ Opina njama fa matsiape njaji wacoema; opi napjoeta fa jiipai nacojle. ²⁶ Pjinicoenawa pikitsindatá-carro fa njite Piyomjeta fa lrikjaotetsa jliaji yacoti Pinaitjalri wapiya corridalritsa pimaodaca ioya.