¹ Nowapa wia jliaji IMINALRITI; njite Jlimica njoa njite jlimi tsakja coajica noiyaca. ² Jlita njoa njecaniapji matsidalri ioya, lrioya jliaji caalri jotojotó dalri, njite lricadaa nofacawa Lriinai matsia nomaodacatsa. ³ lricadaa noají apapeco canción walridalri, noácarro Lrirso matsiadalri lrirso jliaji wa-Minalri Dio. Aimaotsa inaiki jimiotsa norso njite nají watsa coaji piaca Lrinaitjaca Jliaji IMINALRITI. ⁴ Catimadalrica jliaji atsia icadacada icaolre Dio naco njite corrin lricatimataca njaji padalreperrimi, corrin tsakja njaji idiacaperri Lrioya naikjaote njaji idolonai. ⁵ Aima njaji pinaitjaji matsiaperri, no-Minalri Dio, corrin coca itatita iniwetaca njaji Pirsolri Piwaopiakje lrico waikjaote; nocaitepe cadaa nanaco coanperricana, corritsantja notaitenatsa noniwetanaca ima aima pjaca nowaopiakje ioya. ⁶ Corrin joiwica Pjia naikjaote njaji ofrenda njite naikjaote njaji maficalri nainoji Pirso, mitsa opi Pimjeco njaji njonacolrico; ima corrin Pitatja nainócarro maficalri corrin tsakja namjaitácarro maficalri namatsicana ikjaote ⁷ Njite noaco: ''Ivcapa coajica nonokena, nadana pia nonaco paperra lrico oopi. ⁸ Catima nocaolre nonaitjácarro cayoji pioma capisho, Pjia no-Diote; nocaolre ricó nomatsieta Piaco kjaidaperri.'' ⁹ Nocaite nawacaaca cawa lrico njaji aimadan lrinaco Jliaji Yácoti matsiadalri; no-Minalri Piajintsa corrica yami caacoca njoa Pinaco. ¹⁰ Corrin nodawaca Pimatsiaca naco nocaolre ricó; nocaite coajica corrica Pimacaca njoa njite coajica Pimanacotaca njoa; nocaite narso pjiomi njaji inaiki iwacaacacapewa coajica ajádalrica pjia ajádalrica pacadaca pacaolrewa Pinaco. ¹¹ Maifarrotsa noya no-Minalri kjenacawa Picapaca norso. Pimatsieta njoa lrisho jliaji ipeyokjeti Pinakjoitedalri caidalritsa. ¹² Aima njaji imatsucanati idanatalri njoa; oopi naoca noikjaolre njaji imatsicanati nonaitjalri, corrinatsa notaita nocapaca matsia; ima aima pjacana naoya njaji tsicolreti njowida nacoperri, njite corrinatsa matsiaca nocaolre. ¹³ Pinaitja matsia Pirsowaca, no-Minalri; Pino kjeya noikjaolre Pikitsindatácarro njoa no-Minalri. ¹⁴ Picada napaimanietacawa matsia njite corrinatsaotsa kjaida shocana, njaji ipinetacaperri nainó-carro njoa. Piamita naoya jliaji naomalri nadejica, njite Picadaa matsi-perricana cvatjinaa, njaji joiwí-perri inaitjaca norso matsi. ¹⁵ Picada nacapaca catjina coajica capaimanicana, njaji icaitecape norso: ''Pjia midalritsa.'' ¹⁶ Mitsa Picadaa catimaca pjiomi njaji iomacaperri Pjia, njaji icatimataaca capewa Pikjaote; Picadaa nacaiteca caidalritsa Pinaco njaji iomacaperri manacocalri Piinai cayoji: ''Jliatsa wa irso matsiadalri Jliaji IMINALRITI.'' ¹⁷ Kjenadalrica njoa, apada canacaidalri irso pjiomi; mitsa no-Diote iwaopioatsa nonaco. Icatsa Pjia ikitsindatacadaca njoa, Pino piyokjkeyta njoa; kjeyua pinoca, Pjia no-Diote.