¹ No-Minalri, Picapjenina njoa matsia, njite Piají pjiomi coandalrica njoa. ² Piajintsa nofá cádanaco njite nodiá cádanaco njonicowa; Piajintsa tekjoite toa pjiomi nowaopiakje. ³ Piwapa picapa matsia njaji nonaitjalri njite coajica nonaitjaca nowafeta cádanaco; Piajintsa matsia pjiomi nonaco coajica nofacawa. ⁴ Lripjeya toa niinica apada yacoti nonoma lrico, Pjia no-Minalri, opina Piají coajídalricani. ⁵ Pjiatsa yemawa pjiomi nowaida naco, njoapodjete njite nopeyajle tsakja, njite Picadaa picapi nonaco. ⁶ Corrin notaita noajica lrinaco jliaji yajikjeti Pirsolri; corrin noocawa lriocalri nirse jliaji Piajikje. ⁷ ¿A kjerrentja notaita nopitocawa Picaolrini ioya? ¿A kjerrentja notaita noaca nodawacawa Pioya? ⁸ Njorra cadantja eenolricojle, nirsetsa Pjia; nórroco cadantja tjewaca jiipai ricó, nirsetsa Pjia? ⁹ Noarra cadantja kjeya jérri icananialre ricó lrimoto cádanaco toa piyompinaco, noácarro nofawa jérri shewalri nirse, manoa pemajle, ¹⁰ nirse tsakja pjipa njoa Picapi piyekema sho picadacarro nonaitjaca matsia. ¹¹ Nocaite cadantja: ''Cadaocadalri watsa idanata njoa Lrioya, o lripadama cadantja deepiwa jliaji camarrai nowaida naco,'' ¹² jliaji cadaocadalri corriotsa lridawá carroca njoa Pioya. Jliaji cadaocadalri pacoaca lricanaca Pirso cayoji camarrai sho, ima pacoacaca Pirso jliaji cadaocadalri jalrewerrico shotsa. ¹³ Pjiatsa inaitja pjiomi njaji nowawa lricope; Pinaitja njoa njodoa iwawa lrico. ¹⁴ Noaca matsiadalri Pirso, ima Pinaitjaca njoa matsia. Jliaji nocafica lriají matsia cayoca. ¹⁵ Corrin nadawacawa Pioya njaji noapi Picadaa cádanaco nonaitjacawa corricawatsa coca icapa njoa, jiipai icaolre rico capisho Pinaitja njoa. ¹⁶ Pitji icapa njoa coajica noinitawa njodoa iwawa lrico; Pidana pipaperran lrico pjiomi coaiicaotsa njoa, picadaa tsakja njonaana jalredaoca lrico, Pinaitja pjiomi matsia corri cadana toa nomoto nocapa jalredaoca. ¹⁷ Corrin notaita noají coanshopaca njaji Piwaopiakje, no-Diote. ¹⁸ Aimacalretsa nooya njaji Piwaopiakje. Noma cadantja noniwetacana, corrin notaita, ima aima pjacana naoya njaji caida manoa lricoperri. Njite noniweta cadantja icamitsa daimjica notji, njite nodiantja nocafiawa icamitsa Pjiacatsa noinai. ¹⁹ No-Minalri, icamitsantja noma pjienitaca nooya njaji inaiki matsiperri; pjienita nooya teeco njaji inocape inaiki. ²⁰ Ima nemaca Pikjoete njite icamitsa najica namañeta inaiki; cashaperrimca njaji Picoema. ²¹ Piajintsa, no-Minalri, kerroaca nocapaca narso njaji matsiperri icapaca Pirso; corrin noma njaji inaiki corriperri ioma pjia. ²² Matsi nocapaca narso nocaolre rikjoite; nocoemaca njaji Picoema. ²³ Picapa njoa matsia, noDiote, noma piajica matsia nocaolre; Piwi picapao njoa njite noma piajica matsia nowaopiakje ricó. ²⁴ Picapa nini cada toa iwaopiakjeti matsiperri nonaco, njite Picananta njoa nonaitjacarro matsia cayoji Pioma capisho, njaji corripetsa iwayacawa.