¹ Icaite matsiadalrica jlia Iminalriti, ima matsiadalricani, njite corrin coancaojlica yami Lripeyoca fa. ² Caaco sha Dio iyomjetanipem icoema ioya. ³ Lriwaketaca sha njepaite rikjoite njaji apanatsa inaiki, jérri imotokema lrikjoite njite jliewacawa nakjoite tsakja; jérri iparrema atsiakema nakjoite njite inarroema nakjoite tsakja. ⁴ Najiwa macadatsa inipolrico jalrapocolri rico maninalri cawa lricotsa njite corrin naoketa pada yacaalre naofacarrodawa niini. ⁵ Njite mjaida nadada lrico corri capoa naoketa naiñjao, nairrao tsakja. ⁶ Ikena, mjaida cádanacoenana icamina nawanaca jliaji Iminalriti, njite Lriyomjetana lrioya jliaji njerrapitalri. ⁷ Lricadaa nacarroa apakja inipo lrico idecadana mayacan lrinacojle jliaji yacalre naofa lriotsa nini. ⁸ Ajadalrica, nácadantja matsiadalri Dio irso njaji inaiki corri capoa yami napeyocani cayoji Lricaite capisho narso, njite naikjaote njaji matsiaperri Lrinaitjalri narso njaji inaiki jalredaoca lrico. ⁹ Ninintja lricada nairrao ooni njaji iomacape irrao meta capoa naolre, njite Lricadaa tsakjantja naiñjao njaji iomacape iñjaca, Lrántjanarso nananio aima matsiaperri. ¹⁰ Padape nanakjoite naofa piacawa cadaoca cawa lrico, presocana, inona lrico njerrapita capoa njite napapiji tsipalrakja sho. ¹¹ Cayo njeyapacawa corri capoa njeepa Dio iaco njite corrin njepa cayoji Lrinaa capisho nanaitjaca jliaji Yenonrsedalri pja pjiomi ioya. ¹² Dio icada njerrapita cayo naikjaote njaji nanaitjalri; njewawa njite corrin pacapa apada itaitacada ikitsindatacana njenicó carroa. ¹³ Ikena nawanaca Dio ikjaolre njerrapita cádanaco, njite Dio jitana lrioya jliaji njerrapitalri. ¹⁴ Dio jitana cadaoca cawa lrikjoite njite Lriwataca naoya napapi. ¹⁵ Ajadalrica, nácadantja matsiadalri Dio irso njaji inaiki corri capoa yami napeyocani cayoji Lricaite capisho narso, njite naikjaote njaji matsiaperri Lrinaitjalri narso njaji inaiki jalredaoca lrico. ¹⁶ Ima opica Lripeco jlkiwao jliaji pantinoma nanaitjanda bronce sho, njite Lritokjoa njaji cocolriede tsipalrape nataimita shopa pantinoma itaitácarro imotocawa. ¹⁷ Ima majicaperrim sho piaca naofacawa, njite jirrapitacapetsa namatsicana ikjaotetsa. ¹⁸ Corrinatsa naoma naiñjaca iñjaodati, njite wadepenatsamayamicana. ¹⁹ Ikena nawanaca Dio ikjaolre njerrapita cádanaco, njite lritana lrioya jliaji njerrapitalri. ²⁰ Caaco Dio matsia carrona, icamiotsa matsia kenana; Lriyomjetana lrioya jliaji inolritjana. ²¹ Ajadalrica, nácadantja matsiadalri Dio irso njaji inaiki corri capoa yami napeyocani cayoji Lricaite capisho narso, njite naikjaote njaji matsiaperri Lrinaitjalri narso njaji inaiki jalredaoca lrico. ²² Picada naeca lrirso lrirso maficalri nainoji nácarro Lrirso matsiadalri njite picadaa nacaiteca nanaco njaji Lrinaitjalri narso nacanta cádanaco. ²³ Apapena najicawa íta macafianipe lrico manoa lrico nácarro nawenta iyarroti pada jiipai nacojle. ²⁴ Njaji inaiki nacapa Dio idejicalre, njaji matsiaperri pacapaca manoa ikjoete naco. ²⁵ Caaco Dio lrinácarro caolkri kjaidadalri jiwacawa nanaco njite ikena oniñokja macadalri inaitjacacawa. ²⁶ Oniñokja jirreta yenonpena; njite nadia njewawa tjewacajle rse. Njite corrinatsa naji coajica nanaitjaca. ²⁷ Ikena natetjecawa, cadaipoalre nacapa cayoji idewanacape sho. Crri nají coajica nanaitjaca. ²⁸ Njite njerrapita capoa nawana Dio ikjaolre, njite Jlitana lrioya jliaji njerrapitalrio. ²⁹ lrimananita jliaji caolri, njite yami tsakja onoñokja naoya. ³⁰ Njite catimana pekitsa nacaolre ricó manani capoa manoa iñokja naoya, njite lricada naocawa nalri nirse. ³¹ Ajadalrica, nácadantja matsiadalri Dio irso njaji inaiki corri capoa yami napeyocani cayoji Lricaite capisho narso, njite naikjaote njaji matsiaperri Lrinaitjalri narso njaji inaiki jalredaoca lrico. ³² Njerreta Lriipitana yenonrse nawacaaca nacoa njaji inaiki aimadan, njite nawacaaca cádanaco njaji pekipenai caconaperri. ³³ Lritaita Lrimetata njaji ooni, njite Lritaita Lricadaca ooni imotocawa jalrapocolri ricó, ³⁴ njite Lritaita Lricadaca paniati itaoñacawa matsia lri-ricoda jliaji jiipai namacanda corri capoenatsa matsiani namatsicana ikjaote. ³⁵ Lritaita Lrinaitjaca calrita jliaji jalrapocolri, njite Lritaita Lricadaca ooni yarrocawa jalrapocolri ricó. ³⁶ Lricadaa naofacawa niini njaji mawitakjaita, njite nanaitja nayacalrewa niini. ³⁷ Nanaitja nayacalrewa niini nataitácarro naapanaca niini, nanaitjá-carro nakinikerrewa njite netácarro aima napania njite. ³⁸ Lrinaitja matsia narso aimacarrona. Corrin Lricadaa navacan iwayacacawa. ³⁹ Yomje nawayacacawa , aima njerrapitetacana, nainonatana maatsi nacada capoa njerrapita. ⁴⁰ Lricada nají corrica lrioma njaji napiwayawanai niini Lricada najicawa macadatsa jalrapocolri ricojle, corricawatsa pacapa inipo. ⁴¹ Mitsa Lriwapa njaji canacaiperri irso pjiomi inonacalri ioya njite Lriwapa neenipe cayoji pawapa capisho oveja. ⁴² Njaji inaitjacape matsia nacapaotsa njaji njite catimaotsa caolre pekirritsa, njite naitaotsa nanoma njaji inaiki matsiperri. ⁴³ Njaji cajikjeperri nadanaotsa nanaco njaji, njite nawaopia watsa nanaco njaji Dio inaitjalri matsiaperri Lripeyo capoana.