Capítulo 21 - Iraelnai shameta njaji Homá lricoperri
1
Jliaji talricanaati Canaán Arad lricoda iofacada Neguev lricó, jlimi cádanco iraelitanai jiyapacawa inipolrico iácadawa Atarim ikjaolre, lrinoacawa nakjoete njaji iraelitanai njite lridee apepena presowa nanakjoite njaji iraelitanai.
2
Irael iorsoawa tewacajle lrinoma jiipai nacojle Diio ipeyajle, lriaco Dio irsho: ''Picadaa cadaa njoama njaji inakica njaji, ninotsa nowayaketaotsa pjiomi nayacalre matsiape.''
3
Njite Dio jimica Irael irsho niini Lricadaam Irael shamaca lricoema, njaji cananeonai. Napeeco nayacalre jiwao pjiomi. Niini nacadaaca lriipitanao niini Horma.
4
Ikena naacawa jiipana Hor nakjoite lri-ricokja jlia inipo iácadawa Manoa Junco ikjaolre nayofietá-carro jliaji jiipai Edom iyada. Njite naacayao inipolrico maapjica njaji inaiki.
5
Niini caacocana Dio nakjoite njite Moise nakjoite tsakja, naaco: Corrin pacapa waijao, corrin pacapa ooni njite mapjina waiñjaca jliaji injaodati maatsidalri.''
6
Njite Dio imeenaca ápi naikjaolre njaji Iraelnai aimadan. Ápi imjoa aima nanakjoite niini mayamicana.
7
Niini naacawa njaji inaiki aimadan Moise ikjaolre, naaco lrirso: ''Wanaitjaca wamatsicanao caaco capoa fa Dio ikjoete njite pikjoete. Pitatja Dio iinai jlienitá-carro waoya njaji ápi.'' Njite Moise itatja Dio inai nanaco.
8
Dio icaite Moise irso cayoji: ''Pinaitja pakja ápi njite pipapiotsa apana jaico nacó. Ninjotsa caafica pjiomi njaji ápi imjoanipe nacapa cada lrikjaolre.''
9
Ikena Moise inaitjaca pakja ápi broncepe shó njite lripapini jaico naó yeenon. Niini cocacada nanakjoite njaji ápi imjoanipe nacapá cadaa lrikjaolre yomjecaotsani.
10
Njite naapjawa njaji Iraelnai niini naocacawa Obot lrico, icatsa naofa catoa niini.
11
Naawa niteo, njite naocawa Iyé Abarin lricojle jalrapocolri ricó, Moab icoawajli jérri imotokema nacojle.
12
Nawa njiteo njite naocawa Pacoacaitacawa lrico jiipai Zeret lricó.
13
Njitedalri naawa njite naocawa Ooni Armón pemajle, jalrapocolri ricó i itacadawa njepaite iocacawa njaji amorreonai. Ooni Armón icatsa lritjinaaca njaji jiipai nayada njaji amonitanai njite amorreonai.
14
Icatsa jliaji lricaiterrica inaco lricaite cádanacó jliaji paperra icaitecada coaji piaca Dio inaitjaca oowi: ''Paoketaca Vaheb Sufa ricó, pacoacaita cawa ricó jiipai Armón lricó,
15
njite nanomapi iocawa yacaalre Ar lrico njite lriocawa Moab jipaite iocacawa.
16
Njitedalri napjawa Beer ikjaolre, paoketalri niini jliaji oniapji Dio icaitecarrom pia Moise irso cayoji: ''Piwaketa naji inaiki aimadan Noá-carro nairrao ooni.''
17
Njite Irael icanta cayoji: ''Oniapji, pjinicoa.'' icaitepe lrinaco icantanialre nacó.
18
Jliaji oniapji njecaniapji njaji fewidapo, oniapji njecaniapji njaji wapiyawanai caconaperri napjeco sho.'' Njite jalrapocolri lrikjoite nawa Mataná lricojle.
19
Mataná lrikjoite naawa Nahaliel lricojle, njite Nahaliel lrikjoite naawa Bamot lricojle,
20
Bamot lrikjoite naawa pacoacaita cawa lricojle jiipai Moab lricó. Pacapacawa lrikjoite jalrapocolri lrinakjoite jliaji jiipana yenondalri Pisga.
21
Njitedalri Irael imeenaca njaji ideecape iacoti Sehón irso natalricanaa njaji Amorreonai, lriaco cayoji:
22
Picadaa feyapá carrowa pjipaite ricó. Corriotsa fepá carroca ikiníkerre o ipaniapji cada. Corriotsa fetá carroca wairrao ionite jicaniapji lrikjoite. Wawatsa piapowa lricotsa, pjia talricanaati a kjerre feyapawatsa pjipaite iocacawa pemajle.''
23
Mitsa jliaji talricanaati Sehón corrin lricadaa iraelitanai jiyapawa jlipaite ricó. Mitsa icamitsa lriwaketaca njaji lritsolrodaonai aimadan ná-carro naino njaji iraelitanai jalrapocolri rico. Lria lria naikjaolre Jahaza lricojle, icatsa lrinoacacawa Irael ikjoete nini.
24
Irael ino njaji Sehón itsolrodaonai matseta shó njite jlia lrirsowao njepaitemi Amón nakjoite teeco ooni Jabac lricojle, pjiomi njepaite njaji amonitanai. Njite njepaite njaji amonitanai nadanatanda piaca taimini padenirri.
25
Irael jipa lrirsowao pjiomi njaji yacaalre amorreonai njite naofacawa nerricoda, njite Hesbón tsakja pjiomi njaji yacalrewape lriwaida nacope.
26
Hesbón, icapiatsa lriyacalreca jliaji talricanaati Sehón, natalricanaa njaji amorreonai, jliaji inoacalri piatoa Moab italricanaa iapiya. Shehón jipa pia pjiomi njepaite njepaite iocacawa nakjoite teeco Ooni Amón ikjaolre.
27
Caishopa njaji cacoperri yacoti cajikjedalri ricó, nacaite: ''Inoena Hesbón lricojle. Icada njerreta catsenakja jliaji yacaalre lriemá-carro tsenakja.
28
Tiyé imotocawa Hesbón ioya, njite jliaji tiyé imotolri Hesbón ioya lrimjaitaca Ar Moab lricoda, njite lrimjaita tsakja naminanai njaji yenondalripe Armón lricoda.
29
¡Kjenádalrica pjia, Moab! Opi iwayacaacawa, sha idiotacape Quemos. Jliatsa icadaa yénipe ipitó-carroa, njite lricadaa amorreonai italricanaa Sehón ipresotaca njaji itonaipe.
30
Mitsa faa, oopi fama Sehón. Corrinatsa cocaca jliaji Hesbón teeco jlinaa Dibón nacojle. Teeco wapinetana Nofa nacojle, teeco jlionaa Medeba lricojle.''
31
Niini, iraelitanai iofacawa amorreonai jipaitemi ricó.
32
Njitedalri Moise imenaca apepena atsianai nácarro nacapanJazer. Njepa njaji yacalrewape lriwaida nacoperri njite napeeco nawa njaji amorreonai iofacapepia niniwa.
33
Njitedalri nayofiawa nácarroa Basán iapowa lricó. Jliaji talricanaati Og, Basán italricanaa, lrimoto nakjoetennjaji iraelitanai lritsolrodaonai iapiya lrinoacá carro nakjoete Edrei lricó.
34
Njite Dio iaco Moise irso: ''Mafiotsa naiwana, ima nocadacaotsa shametá carro jliaji talricanaati njite njuaji lritsolrodaonai njite pjiomi njepaite. Cayoatsa pinaitjacani cayoji pinaitja capisho Sehón, amorreonai italricanaa iofacada pia Hesbón lricó.''
35
Njite naino jliaji talricanaati, njaji lrienipe, pjiomi lritsolrodaonai corrin coca nacadaa caafi. Njepa nayadawa njepaitemi.