Capítulo 17 - Aarón ipjeeco
1
Caaco JLIAJI IMINALRITI Moise irso, Lriaco:
2
''Caaco pjia narso njaji Iraelnai aimadan nadécarro apaapope jaicoapo nacoanaa njaji Iraelnai iapiyawanai. Doce watsa namaimaca pjiomi njite nadanaotsa neepitana nacoana njeecote nacó.
3
Njite pidanaotsa Aarón iipitana Levi shecote nacó. Narsotsaotsa narsoca njeecote nacoanaa njaji Iraelnai yaapiyawanai poco naferrinaipemi iipaneta nakjoiteper.
4
Nacadaotsa njaji njecote iwacaaca carroda lricó, lricoemjete jliaji nerrocwa njaji yácoti kjaidaperri wanaitja shopa yácoti, Nowacaaca carroji manawa piapiya.
5
Niniotsa catjiwi caotsa jliecote jliaji atsia Noniwanalriotsa. Picadaa yamikena nacaitepeca pjia njaji Iraelnai, njaji caacoperri maatsi pikjoete.''
6
Niini Moise icaiteca narso njaji Iraelnai aimadan. Njite pjiomi njaji Irael poco yapiyawanai naaca nacoanaa apanape njeecote, naniwanaji nacoanaa naferrinaipemi iipaneta nakjoite. Doce namaimaca pjiiomi njaji jaicoapo. Aarón iyarroapo tsakja nainai.
7
Ikena Moise icadaa njaji njeecolre Dio ipeyajle pjewacawa lrirso jliaji Dio ipatowani yácoti kjaidaperri iarroda.
8
Njite tjewaiyojle, Moise shewawa nirse nacadaacawa jliaji Dio ipatowani, yacoti kjaidaperri
yárroda, njite lricapa Aarón shecolre, nayada njaji Leví poco catjiwi cani. Lripje itaoñawa, lriiwi itaoñawa njite lrirso tsakja lriinaca ipeperrina.
9
Njite Moise imotoita pjiomi njaji jaicoapo Dio ipeyajle-perri pia naikjaolre njaji Itraelnai aimadan, njite nacoanaa njaji Iraelnai yapiyawanai njepaca njecote.
10
JLIAJI IMINALRITI IACO Moise irso: ''Picadaa jliaji Aarón iyarroapo yácoti yarroda icoemjete. Icatsaotsa jliaji yanjirrica nanaco njaji yemalri inaiki aimadan mjepacaperri, yamí carroena caacocana maatsi Nokjoete njitenantja wadee mayamicana.''
11
Moise inaitja cayotsaji Dio inaa capisho lrinaitjaca.
12
Caaco njaji Iraelnai aimadan Moise irso, naaco lrirso: ''Icatsaotsa mayamica faa. Wawayaaca caotsawa pjiomi anji.
13
Ima pjiomi njaji itsomitalri jliaji wa-MINALRI iipana, mayamicaotsana. ¿Coadaotsa mayamica pjiomi fá?"