¹ Coré, Ithaer irri, Coat irri, Leví irri nainai njaji Datán njite Abiram, Eliab yenipenaipe; nainai tsakja On, Pelet irri, Robén inakjoite-perri, njite nawakeeta apepena atsianai. ² Nemawa Moise ikjoete, njite nainai tsakja apepena atsianai iraelitanai, dociento cincoenta namaimaca njewidaapo njaji Iraelnai, nanjenipe matsia inacó pjiomi. ³ Nawacaacawa njaji nácarro Moise ikjoete njite Aarón tsakja. Naaco narso: ''¡Aima calretsa pidejica naapiya! Pjiomi njaji inaiki njenitaacawa Dio irso nacoanamtsa, njite Dio iofawa Dio napecolrico. ¿Cpadao ioma shaaca yanjí nanaco njaji Dio inaikite? ⁴ Moise jimi cádanaco jliaji nacaiterri, icaamitsa jliwacawa jiipai nacojle, tjewacajle lrinoma jiipai nacojle. ⁵ Lriaco Coré irso njite narso pjiomi njaji lriinaiperri: ''Piyompinacojle watsa Dio icadaotsa wanjí kjaitenaica njaji Dio iyarrope njaji shenitaaca capewa Lrirso. Lrideewatsa lricodapi njaji inaiki. Njatsa njaji Lriniwanaji, icatsaotsa njaji Lrideeri Lrikjaolrewa. ⁶ Cayoatsa pinaitjaca, Coré njite pjiomi njaji piinaiperri. Pjipaotsa lampara yemacarrodawa ⁷ tjewena njite pikerrataotsana njite picadaotsa incienso nanaco pidee carrona Dio ipwyajle. Coandalri cadaa Dio iniwana, icatsaotsa jliaji inaiki Dio iniwanalrica Lrirsowao. Ima ioma shaaca yanjí nanaco njaji inaiki, shaa Leví inakjoité-perri.'' ⁸ Moise iaco tsenakja Coré irso: ''Panaya, jimi matsia sha Leví inakjoité-perri: ⁹ ¿Capja midalri shoca irso Iraelnai iDiote shenitaca sha Iraelnai ioya idenjí-carro tsoomi Lrioya lriipana matsiadalri lrico, njite idejí-carro narso njaji Iraelnai? ¹⁰ Dio-tsa ideeca pjia tsomi Lrioya, njite njaji pikitsiñape tsakja, njaji Leví inakjoite-perri, njite panaya ¡pioma tsakja sacerdoté-carro pjia! ¹¹ Cayo inaitjaca iwacaaca capoa yemá-carro Dio ikjoete. ¿Coada caaco pjia maatsi Aarón nacó, jliaji shepacada matsia DIo iaco? ¹² Njite Moise iwana Datan njite Abiram, njaji Eliab ienipe, mitsa naaco: ''Cotsa waaca pikjaolre. ¹³ ¿Capja midalri shoca picapa pjita capoa fa lrioya jlia jiipai matsiacawa paapanaca, matsiacawa tsakja pataoñaca pirraiti tsakja? ¡Njite panaya pioma pjiaca watalricana! ¹⁴ Njite corritsa pideeca fa lri-ricoda jliaji jiipai matsiacawa paapanaca, matsiacawa tsakja pataoñaca pirraiti tsakja, corrin tsakja pia fepaitewa wanaitjacawa lricontja wakiníkerre. Njite panaya pjioma pja picaiteca warso yacoti mikjapandalritsa. Corrinatsa waaca piinai.'' ¹⁵ Kerroa Moise pékirritsa niini lriaco Dio irso cayoji: ''Macoadatáotsa nakjoete na-ofrendani. Cotsa njotenca naoya na-borroni, corritsa coca nonaitja narso maatsi.'' ¹⁶ Njite Moise iaco Coré irshó: ''Tewenaotsa piyompinaco piawatsa Dio ipeyajle naapiya njaji piinaiperri. ¹⁷ Icoanamiotsa iáwatsa jipa ilamparani iemacarrona njite icadaotsa nanaco incienso. Njitédalri nacoanamitsa njaji atsianai narsotsa nadeeca nalamparani Dio ipeyajle, dociento cincoenta lampara yarropoco. Cayo tsakjaotsa pjia, Aaró, idee tsakjaotsa ilamparani yarropoco.'' ¹⁸ Ikena nacoana njai atsianai njepa nalampara yarropoco, nakerratani, njite nacada incienso lri-ricoda, njite neemawa nawacaaca carroda ipananoma lricó Moise iapiya njite Aarón. ¹⁹ Coré iwakeeta pjiomi njaji inaiki Moise ikjoete njite Aarón ikjoete awacaaca carroda ipananoma lricó, ikena Dio imatsiaca melremelredalri icañjatacawa nacapo pjiomi njaji papocoperri. ²⁰ Ikena caacoca Dio Moise irso njite Aarón irso: ²¹ ''Shenawa naoya njaji inaiki papocoperri Noinó carrona papiatsa pjiomina.'' ²² Moise njite Aarón njewa naorsoawa jiipai nacojle tjewacajle nanoma njite naaco: ''Dio, Dio-ca pjia naminalrica Pjia narso njaji jalredaoca lricoperri, pada cadanatsa jliaji atsia imatada pirso, ¿coadamtja kerroaca Pjia nakjoete pjiomi?'' ²³ Dio sheepa Moise, Lriaco lrirso: ²⁴ ''Caaco pjia narso njaji papocoperri: ''Shenawa Coré, Datán njite Abiram ípana ioya.'''' ²⁵ Icaamitsa Moise jinico iawa Datán ikjaolre; njite Abiram; nja njaji caconaperri iraelitanai nawa jliapoam. ²⁶ Niini caacoca narso njaji papocoperri: ''Panaya, shenawa naapana ioyta njaji atsianai maatsíperrimi, manotatsa njaji nayarroaji corri cada ioma noinoca shaa namatsicanaa ikjaote.'' ²⁷ Niini pjiomi njaji iofacapewa nawaida naco njeenacawa Coré, Datán njite Abiram iofacawa naoya. Datán njite Abiram naofacatsawa naapana ipananoma lricotsa naninai iapiya njite neenipe iapiya tsakja. ²⁸ Njite Moise iaco narso: ''Icatsaotsa yanicaotsa Dio catsa jliaji inaalri njoa nonaitá-carro njaji idenjikjeti, corrintja njoa catsa inaitja cayoji nowaopiakje ioma capishó. ²⁹ Mayami cadaa njaji atsianai ipoati shotsa, niniotsa yanjí corrica Dio-ca jliaji imeenacalri njoa. ³⁰ Mitsa Dio icadaa cadaa jiipai imjecoca lrinoma macaite lrinjá carrona, naapaneta iapiya, njite caafitsa naorrocowa irri-rri lricó, niniotsa yanji namenata piaca Dio nja inaikica njaji.'' ³¹ Yami cádanaco catsa caacoca Moise, icamitsa jiipai imjecoca lrinoma napjite njaji atsianai. ³² Jiipai imjeco lrinomá lriñjá-carro njaji inaiki, naapaneta iapoiya njite pjiomi njaji inaiki Coré ikitsiñape, cosho catsakja njaji narsonipe. ³³ Pjiomi njaji, nakitsiñape iapiya naorrocowa cafitsa irrirrico. Jiipai ítacawa naicaonam, icatsa cayoji nañawa naofacawenai ioya. ³⁴ Pjiomi njaji Iraelnai nawaida nacope pia, njeeco napito naoya njemi cádanaco njemataca, naaco: ''Jiipai itaita tsakja tsakja fa.'' ³⁵ Ikena Dio imjaitaca njaji dociento cincoenta atsianai lrisho jliaji tiyé lrinakjoité-dalri, pjiomi njaji atsianai icadaa incienso. ³⁶ Caaco tsenakja JLIAJI IMINALRITI Moise irso, lriaco: '' ³⁷ Picaite Eleazar irso, jliaji sacerdote Aarón irri, picadaa jlipá-carro jlienita njaji lampara yarropoco tiye ioya, ima Njoenitaca Norsowao njaji nárropoco. Njiteotsa picadaa lripocotá-carro njaji tiyemjen kerraperri toa teeco pja. ³⁸ Pjipaotsa na-lamparanipe yarropoco njaji mayamirri namatsicana ikjaote. Picadaotsa nanaitjaca parratoitape napatsicanada martillo sho naita shopa altar icao. Ima njaji atsianai nadee piacana Nopeyajle, cayoshopa njenitaji catsana Norsowaona. Icatsaotsa najishopa njaji Iraelnai Njoacatsa nainai.'' ³⁹ Ikena jliaji sacerdote Eleazar jipa njaji lámpara yarropoco nanaitjaji broncepe sho nayadami njaji atsianai Dio imjaitaji, njite nañá nerroa martillo shó lriicao jliaji altar, ⁴⁰ pada nawaada carrona njaji Iraelnai, wadee pada corridalritsa Irael, Aarón inakjoitedalri nanontja namjaita incienso Dio ipeyajle, wadentja nanoca nanaitjá-carro cayoji Coré njite njaji rikitsiñape inaitja capisho, cayoji Dio icaite capisho Moise nakjoite. ⁴¹ MItsa tjewaijletsa njaji papocoperri iofacawa iraelitanai caaco tsenakjana Moise ikjote njite Aarón ikjoete tsakja. Naaco: ''Oopo íno njaji Dio inaikite.'' ⁴² Cayo cádanaco, nawacaaca cádanaco Moise njite Aarón ikjoete njaji inaiki papoco-perri iofacawa, nacapoco cádanaco nacapa lripananoma ikjaolre jliaji nawacaaca carroda njite, iyadaoca itaca jliaji Dio ípana. Dio imatsiaca melremelredalri icañjatacawa narso, ⁴³ njite Moise, Aarón iapiya nacawa lricoemjeteo jliaji nawacaaca carrodawa. ⁴⁴ Iceena caacoca Dio Moise irso. Njite Lriaco: ⁴⁵ ''Shenawa naoya njaji inaiki papocoperri Noinó carrona papiatsa pjiomina.'' Ikema Moise njite Aarón njewa naorsoawa tjewacajle nanoma jiipai nacojle jliada nacotsa. ⁴⁶ Moise iaco Aarón irso: ''Pjipa jliaji lampara yarropoco, njite piwaca tiyé altar nacó, njite picadaa incienso lrinacó, pideotsa kjeyana naikjaolre njaji inaiki aimadan, pinaitjaotsa ipiyokjeti namatsicana ima, ima Dio írroa ínoca waikjaolre. Mayamicalri inokena wakjoete.'' ⁴⁷ Ikena Aarón shecoa kjeya napecolricojle njaji inaiki aimadan. Mayamicalri inita piakena ipocotacawa napecolrico njaji inaiki, lricadaa incienso, niini lrinaitjaca ipiyokjeti namatsicana ima njaji inaiki aimadan. ⁴⁸ Aarón yemamawa napecolrico njaji mayamperrim njite caafipetoa; icapiatsa cayoji yami mayamicalri iawa naoya. ⁴⁹ Njaji mayamirri jliada mayamicalri jiyapaji inaco catorce mil seteciento namaimaca, naoya tsakja njaji mayamirri Coré inaitjanda ikjaote. ⁵⁰ Aarón idiawa Moise ikjaolre nawacaaca carroda ipananoma nacojle, icaamitsa yamica naoya jliaji mayamicalri.