¹ Jliadaa deepi, pjiomi naji iofacapewa papocotsao naiyaca kjaida. ² Pjiomi njaji inaiki aimadan cacopecana Moise nacó njite Aarón nacó tsaskja, niini naaco narso cayoji: ''Matsia piantja mayamica fa Egipto jipaite lricotsa, o anji lri-ricoda jalrapocolri-ca jliaji. ³ ¿Coada wa-Diote idee fa ajerriji nainó-carro fa matseeta sho? Ima nainocaotsa njaji wenipe njite njaji waninai. ¿Capja corrica matsia pjaaca warso wadiacawa Egipto lricojle?'' ⁴ Njite naaco pja narsowaaca: ''Picadaa waniwanaca warsowao padenakja wapiyawalrewa, njite picadaa wadiá carroa Egipto lricojle.'' ⁵ Niini Moise njite Aarón njewaca narsoawa tjewacajle nanoma jiipai nacojle napeyajle njaji iwacaacacapewa Iraelnai. ⁶ Josue, Nún irri njite Caleb, Jefone irri, nanakjoite perrica njaji yácape pia icapa jliaji jiipai, natsafá natsayani. ⁷ Caacona narso njaji iwacaacacapewa Iraelnai. Naaco narso: ''Jliaji jiipai waalri wacapa njite feyapacawa lrico jiipai matsiadalricani. ⁸ Njite catiima cada Dio icapaca warso, niniotsa Jliá watsa idee fa lrinacojle jliaji jiipai njite Lriá watsa warsoni. Jliaji jiipai matsiadalri pataoñaca pirraiti njite matsiacawa paapanaca.'' ⁹ Mitsa meematsa wa-MINALRI ikjoete, mafiotsawa nakjoete njaji inaiki iofalri niiniwa. Mjerrapitinawatsa wawayaketacana cayoji pawayaketa capisho painjaoda painjácádanaco. Corriotsa Dio idanatá carrocana ina wainaica jliaji wa-MINALRI. Mafiotsawa nakjoete.'' ¹⁰ Mitsa pjiomi njaji lriofacawenai napaolre nainocana jiipada sho. Jliada nacotsa Dio imatsiaca melremelredalri icañjataacawa nacapao nawacaaca carrida lrico njaji Iraelnai. ¹¹ JLIAJI IMINALRITI iaco Moise irso: ''¿Coancaojli pjenaotsa yamiotsa namenataca Njoa njaji inaiki aimadan canjaji? ¿Coancaojli pjenaotsa njepaotsa ajádalri Nonaco, nacapjen cadanena coajica Njoida Nocadalri nacapa nasho njaji Nonaitjalri.'' ¹² Nocadaotsa ipoati ínocana, corriotsa cocá carrocaotsa narsolri piinai. Piipaneta nakjoitetsa nocadaotsa aimá-carro njaji inaiki pacoa yacaalre macacoé-carrona njite kjaidaperri naoya njaji.'' ¹³ Njite Moise iaco Dio irso cayoji: ''Pinaitja cadaa cayó, njaji Egipto lricope njemiotsa jliaji pinaitjalri, ima Pjitaca njaji inaiki naoya Pjida kjaidadalri shó. ¹⁴ Njite nacaiteotsa njemi lrinaco narso njaji jalredaoca lricoperri. Ima njemikena Pjiacatsa nainai njaji iraelitanai ima picadaaca nacapaca Pjia. Njite Pjiatsa jliaji iofalri iyadaoca shó naicao njaji Pinaikite. Pjiatsa jliaji yaalri napjeya iyadaoca macadalri sho jaalrewe-ricó, njite tiyé kerradalri macadalri sho deepi ricó.'' ¹⁵ Njite píno cada papiatsa pjiomi njaji inaiki, niniotsa pjiomi njaji inaiki jalredaoca lricoperri jimi caperri pinaco nacaiteotsa pinaco cayoji: ¹⁶ Jliaji Dio, corri capoa lritaita lrideeca njaji inaiki lrinacojle jliaji jiipai Lricaiterri iacoti ajadalri sho Lriacaotsa narson, niini Lrinocana jalrapocolri ricó.'' ¹⁷ Panaya notatjaca piinai caiwi ricotsa, Picadaa tsenakja nacapa Pjiida. Ima Picaiteca: ¹⁸ ''Jliaji IMINALRI merroadalritsa kjeya njite kjena dalritsa icapaca narso njaji jalredaoca lricoperri. Lricadaa jliyapaca Lrioya njaji inaiki imjepacan neema cádanaco nakjoete. MItsa lricadaa njerrapitaca namatsicanaa ikjaote njaji inaitjacape maatsi, namatsicanaa njaji njanirrinaipemi atee nadekenai idakenai imatsicanaa ikjaote.'' ¹⁹ Niini notatjaca piinai caiwi ricotsa pjiyapetá-carro namatsicanaa nanaitjalri pikjoete njaji inaiki aimadan, cayotsaji pinaitja capisho namoto cayami Egipto lrikjoite atee panashete toa. ²⁰ Niini jliepacan jliaji IMINALRITI: ''Nocadaa peda namatsicanaa jiyapacawa Nooya cayoji pitatja capisho noinai, ²¹ mitsa, ajádalri capoa caafidalrica Njoa, njite pacamicaotsa jalredaoca lrico Nomatsiaca sho, ²² niini pjiomi njaji inaiki icapacape Nomatsiaca njite jliaji Njoida Nocadaalri nacapa Egipto lricó njite jalrapocolri ricó tsakja, njite aimena namatadaca Norso njite corrin naoma njemica Noaco matsia. ²³ Niini Nocaiteca nanaco, corriotsa nacapá carroca jliaji jiipai nocaiterri narso njaji iferrinaipemi oopi. Corriotsa pada nanakjoite njaji shenetalri Njoa naoyao nacapaotsan, ²⁴ icaamitsaotsa jliaji Norsodalri Caleb, ima teecojledalrica inaikica naoya. Jliepa Noaco matsia; nocadaotsa lriocacawa lrinacojle jliaji jiipai lrialri lricapa. Nayada tsakjaon njaji lridakenai jliapodamperri. ²⁵ (Njaji amalcitanai, cananeonai naofapiawa pacoacaita cawa lrico jiipai.) Tjewenaotsa piá tsenakjaotsa jalrapocolri lricojle, piáwatsa lri-rico jliaji inipo iácadawa Manoa Junco lricoda. ²⁶ Caaco JLIAJI IMINALRITI Moise njite Aarón irso. Lriaco narso: ²⁷ ''Maapjina Njoa notarrawataca naapiya njaji inaiki mátsiperri caacoperri mátsi Nokjoete. Njominina coajica caacocana Nokjoete njaji inaiki aimadan Iraelnai.'' ²⁸ Picaite narso: ''Caafidalri capoa Njoa IMINALRI'' caaco capoa Nonaco njomitsa, cayoatsa nonaitjaca sha: ²⁹ Icatsaotsa mayamica sha lri-ricoda jalrapocolrica jliaji, pjiomi shaa caacoperri Nokjoete, sha naniwetaji nadananda paperra lrico, pjiomi njaji irsocape vente walria napekirrica nakjoite. ³⁰ Corriotsa shewá carroca lri-ricoda jliaji jiipai nocaiterri irso iacaotsa iofawa nirse, icaamitsa Caleb, Jefone irri njite Josué, Nún irri. ³¹ Mitsa njaji yenipe, njaji icaiteji inaco nainocaotsana, Nodeotsana lri-ricoda jliaji jiipai. ¡Njawatsa icapa jliaji jiiapi imenatalri ioyawa! ³² Mitsa sha, icatsaotsa mayamica sha lri-ricoda jalrapocolri-ca jliaji. ³³ Coarenta walria watsa nawapaca nápirra jalrapocolri ricó. Njawatsa jirrapita imatsicana ikjaote a kjerreca mayamiotsa pjiomi shá jalrapocolri ricó. ³⁴ Cayoji lriwiaca capisho iaca icapa jliaji jiipai coarenta jalredaoca, corenta walria watsa njerrapitaca imatsicana ikjaote, pawalria watsa padaa jalredaoca icoada, yají carroatsa coajica nacoemaca Njoa. ³⁵ Icatsa nocaiterrica Njoa IMINALRITI. Ajádalri, cayoatsa nonaitjaca njaji aimadan iofacapewa papocotsao, njaji maatsipetsa yemalriwa Nokjoete. Nowayaketacaotsa pjiomina, icatsaotsa mayamicana.'''' ³⁶ Niini, pjiomi njaji átsianai Moise imenacalri pia ia icapa jliaji jiipai, mayamicana ipoati shó, Dio ipeyajle. ³⁷ Icapiatsa njaji átsianai idia cape icaite yacoti matsiperritsa lrinaco jliaji jiipai naalri nacapa. Cayo carro caacocana Moise ikjoete pjiomi njaji inaiki. ³⁸ Icaamitsa yomjerrica nanakjoite njaji ialri icapa jliaji jiipai, Josué, Nún irri, njite Caleb, Jefone irri. ³⁹ Moise icaite cádanaco njemi njaji inaiki Iraelnai, icaamitsa naiyaca pekirritsa. ⁴⁰ Nacafiawa piyonpinaco toa njite naawa jiipana ípolrico nacojle, nacco cayoji nirse: ''Icapa a kjerreca faji, njite waacawa a kjerreca Dio inaa waacawa, ima wanaitjaca wamatsicanao.'' ⁴¹ Mitsa Moise iaco narso: ¿Coada tsakjao imjepataca Dio iáco? Corriotsa matsia carroca shá. ⁴² Matsawa nirse, corritsa ínaica Dio wadee jipondape shametaca sha. ⁴³ Icatsa naofacawa nirse njaji amalecita njite njaji cananeonai, naino caotsa sha namatsetan sho imaca capoa Dio. Cayoshopa lrimacaca sha.'' ⁴⁴ Mitsa corrin njeepa, oopi nawa lrinacojle jliaji jiipana; mitsa Moise njite jliaji ipatowani corrin naacawa nainai naofacawa lrikjoite. ⁴⁵ Njite njaji amalecitanai njite njaji cananeonai, iofacape niini nainoacawa nakjoete njaji iraelitanai njite njamacana, coshoca lriwalripaca jliaji inipo iácadawa Horma ikjaolre cay tsakja nainocana.