Capítulo 13 - Apepena atsianai iá icapa dawacaitsa Canaán jipaite
1
Njite caaco tsenakja Dio Moise irso. Lriaco:
2
''Pimenaca apepena atsianai nácarro nacapa ipjeya Canaán jipaite, jliaji Nocadalri narso njaji iraelitanai. Pimenaca padape atsia nanakjoite njaji Irael poco inakjoité-perri. Pada nanakjoite njaji napaneta njewidaapo.''
3
Moise imeenacana jalrapocolri Parán lrikjoite, nataitá-carro nanaitjaca cayoji Dio inaa capisho nanaitjaca. Njawacatsa Iraelnai poco jiwidapo.
4
Icatsa nepitanaca njaji: Robén poco nakjoite, Samúa, Zacur irri;
5
Simeón poco nakjoite, Safat, Hori irri;
6
Judá poco nakjoite, Caleb, Jefone irri;
7
Isacar poco nakjoite, Igal, José irri;
8
Efraín poco nakjoite, Osea, Nún irri;
9
Bejami poco nakjoite, Palti, Rafú irri;
10
Zabolón poco nakjoite, Gadiel, Sodi irri;
11
Manase poco nakjoite, Gadi, Susi irri;
12
Dan poco nakjoite, Amiel, Gemadi irri;
13
Aser poco nakjoite, Setur, Micael irri;
14
Neftalí poco nakjoite, Nahbi, Vapsi irri;
15
Gad poco nakjoite, Geuel, Maqui irri.
16
Icatsa neepitanaca njaji atsianai Moise imenacalri ná nacapa jliaji jiipai. Moise icadaa Osea ipitanawa, jliaji Nún irri, Josué.
17
Moise imeenacana nácarro nacapa jliaji jiipai Canaán. Lriaco narso: ''Iá watsa Neguev ikjaolre iá carroatsa awacada lricocawa.
18
Icapaotsa coandalrica jliaji jiipai. Icapaotsa coanperrica njaji inaiki iofalri ninio, kjaidaperri cadaa o corri cadaa, aimadan cadaa o tsocatsana.
19
Icapaotsa matsia cada jliaji jiipai naofalri níini o corrica. Matsiadalri cadaa jliaji jiipai o corrica. Icapaotsa coanperrica nayacalre; pantitape cadatsa o taimí-perri cadaa.
20
Matsia cadatsa paapanaca niiní o corrin, niini cadaa jaico matsiaperri o corrica. Mafietaacatsawa, ideotsa wacapá-carro lripaniana njite-perri wacapá-carro.'' Icatsa njenaana ípekena nainitje njaji uva.
21
Ikena naacawa njaji atsianai nacapá-carro jliaji jiipai jalrapocolri Zin nakjoite Rehob nacojle, tsoomi Lebo Hamat ioya.
22
Naawa Neguev nakjoite njite naocawa Hebrón nacojle. Njite nacapa naofacawa niini Anac inakjoite-perri: Ahimán, Sesai, njite Talmai. Jliaji yacaalre Hebrón nanaitja pia siete walria lripéya pia nanaitjaca jliaji yacaalre Zoán Egipto lricoda.
23
Naoca cádanacowa pacoacaita cawa lrico jiipai Escol lrico, nayoa uva íki cainacane. Njite nawakje nadee jliaji lriinaca jaico sho yamadape. nadee tsakja higuera ínaca njite yorromo tsakja.
24
Nacadaa lripitanawa niini pacoacaita cawa jiipai Escol lricoda, ima macaneca nainaca njaji uva nederri njite njaji iraelitanai.
25
Njite coarenta jalredaoca shapodam, nadia tsenakja naocawa njaji yacape icapa jliaji jiipai.
26
Nadiawa Moise njite Aarón ikjaolre, njite naikjaolre njaji naofacawenai njaji inaiki aimadan Iraelnai jalrapocolri Parán, Cades lrico. Nadee yácoti narso. Njite nacañjata nacapa jliaji paniati nadenda njite.
27
Naaco Moise irso, ''Wen wacapa jliaji jiipai pinaalri waaca wacapa. Ajádalri matsiaca pataoñaca pirraiti niini njite matsia tsakja paapanaca niini. Icapa jliaji lriinaca wadenda njite.
28
Mitsa, kjaidaperrica njaji inaiki iofalri niini. Taimi-perri nayacalre njite macacoepe tsakja. Wacapa tsakja niini njaji Anac inakjoite-perri iofacape niniwa.
29
Njaji amalecitanai naofawa Neguev lricó. Njaji hititanai, jeboseonai njite njaji amorreonai nanaitja naapanawa awacada cawa lricó. Njaji cananeonai naofawa Manoa inomapi njite ooni Jordán yaalrapi ricó.
30
Njite Caleb yemacada Moise icoemjete
lrimacoitana, lriaco: ''Picadaa waacawa wá-carro feta wayadawa jliaji jiipai, ima wataitjen fetaca wayadawa jliaji jiipai.''
31
Mitsa njaji Caleb ikitsiñape naaco: ''Corritsa wataitá carroca nakjoete ima macanepe, kjaida-perri njaji inaiki niní-perri iofacawa.''
32
Njaji nacaite iacoti icadaalri ínonaaca njaji Iraelnai lrinaco jliaji jiipai naalri nacapa. Naaco narso: ''Iñjacapeca inaiki njaji inaiki iofalri níni. Inaiki macanepe njaji iofalri niiniwa.
33
Wacapa nirse inaiki jalripanepe, macanepe, Anac inakjoite-perri. Cayo wacapacawa napeyajle tacapa shó, njite tacapo shio tsakja nacapaca warso.