¹ Mamaodacatsa lrioya jliaji Inaitjacaita pjia caafi piyempetica lrico, lripjeya pékirrica pjia njite naoca cádanaco pinaco njaji talricai imjaidata cáda pja, picaite cáda nacoenaotsa: ''Corrinatsa joiwica njoa,'' ² pinaitja cayo lripjeya toa yalrimica jérri, kéerri njite njaji jiwirsida tsakja njite iyadaoca cadaocádalri ipieta tsenakja jinicocawa íya cayamina tsenakja. ³ Jliawajli, natetjecaotsa njaji iwapacape talricanati dapana, njite tsikerre caojlinaotsa nemacawa njaji atsianai kjaidaperri, njite corri kenaotsa nataita nawititaca cáana njaji inaitjepe ima nawayacacawa, njite corrinatsaotsa nataita nacapaca jalrami njaji icoanjetacape icapa ventana lrico. ⁴ Ikenaotsa jliawajli naitaaca caotsa njaji inipo ipananoma, njite corrinatsa njemí carroketsa matsia, corriotsa njemí carroketsa njaji yacapewa inipolrico, njite njaji itodacape ánada sho, corrinatsaotsa njemí carroca nacantaca njaji inaitjepedape toa, mitsa nacafietani njaji wipjiarro nacanta cádanaco deepi toa ima corriketsa nemaaca matsia. ⁵ Nafio ketsaotsa nerracawa, njite aimenatsa cafainaperri narso inipolrico, jáalre kenaotsa natsicolre cayoji jawaya íiwi sho, jamiña kenaotsa narso padecalre tsoperritsa, corri ketsaotsa naoma njaji canacaiperri padada icaona. Cayo cádanacoena lridiawa lrinolri njiteo jalredaoca mawayaca cádalri lricojle njite naiya ketsa lrinaco njaji lrikitsiñapemi. ⁶ Piwaada Pinaitja shona naco lrpjeya toa mjotónca piapiyao jliaji pipapí palratakja, lripjeya toa bolronca jliaji pirra carroapa owirroapi, lripjeya apada ipecoca bolromi jliaji taza torropeda ooni lricojle, lripjeya toa mjotonca lriñada jliaji jita shopa ooni jicaniapji lrikjoite. ⁷ Ima jliaji pidada lridiá caotsa jiipai ricojle tsenakja lrinolritsa njiteo, njite picafica lridia tsenakjaotsawa Dio ikjaolre ima jlica icadalri pirsoni. ⁸ Cayo lricaiteca jliaji icanantacaita: ''Mikjapantsa, miperri catsa pjiomi, itamana shocana.'' ⁹ Aimadalri pia irsoca yajikjeti jliaji icanantacaita niini lricanantca yajikjeti naco njaji lrinaikite aimadan. lricadaa njemica nanaco njite lricadaa nanjí coanshocana; lridana njite lrimatsieta aima yacoti lricananta shopana. ¹⁰ Jliaji icanantacaita lridana njatsa njaji yacoti matsiaperritsa pjemica, ajádalripe tsa, icaitecape mayacan. ¹¹ Awí sho perrica naaco njaji icanantacaperri. Nañáa capisho tapoa tjewaca padada naco icatsa cayoca naaco njaji icanantacaperri nadananda lrico, nacantalri inaco nawapampe irso njaji iwapacapena. ¹² Panaya, nirri, noma piawaopia lrinaco jliaji nocaiterri pirso: Piofá cadaotsa pidana aima paperra, corriotsa coancaojli yamiotsa pidanaca ima mawayacacadalricana; njite piá watsa maapji pjia aima cada calretsa picanantacacawa. ¹³ Njite nowayaketa carroena nanaco njai nodanalri inaco, jimirrina inaco, icamitsa nooma pifiocawa Dio iwana njite pimatsietaca Lriaco picaolre ricó, ima icacatsa jliaji narsolri catsa nanaitjaca njaji jalredaoca lricoperri. ¹⁴ Ima Dio watsa icaite nanaco njaji wanaitjalri jalredaoca lrico, matsiaperri cadaa o matsiperri cadaa. Lricaite tsakjaotsa naacona pjiomi njaji panaitjají dawacalri ricotsa.