Capítulo 9 - Dio ipecocaotsa njaji inaikinai Canaán lricoperri
1
Jimi matsia Iraelnai; kjeyenatsa ipjeya iyoetá-carro jliaji ooni Jojrdán panaya, ia carroenaotsa shameta njaji inaki macacoeperri lricope pja ioya, njite kjaidaperri pjaca ioyana, yacaalre macacoeperri yenomperri idana,
2
nincawa inaiki macanepe, jalripanepe, njaji anaceonai inakjoiteperri, yajimpetsa inaco, njite jimi coajica nacaiteca nanaco njaji inaiki: ''¿Cocantja itaita nakjoete njaji anaceinai yénipe?''
3
Niini pirsotsa pianjica panaya, pi-MInalri Dio-ca Jliaji yalriwa pipeyajle tiyé kjaidadalri sho; Jlia watsa iwayaketana pipeyajlena, Jlia tsaotsa icadaa mjaidacana irso; njitenaotsa pjia, pipecocaotsana pioya njite picadaotsa nañacawa kjeya, cayoji IMINALRITI icaite capisho.
4
Macaite tsaotsa picaolre ricó, pi-MInalri Dio imotoets cayaminana pioya: ''matsiadalri capoa njoa Dio idee njoa ajerreji noyadá-carro jliaji jiipai,'' ima namatsica ikjaoteca Dio jita ioya njaji inaiki aperri piaji.
5
Corritsa pimatsia ikjaoteca, matsiadalri capoa picaolre jliaji piawatsa piofa lri-ricoda jliaji jiipai, namatsicana ikjaote njaji inaiki aimadan Dio jitana ipeyajle, njite lritaitá-carro lrinaitjaca cayoji Lricaite capisho pia yácoti ajádalri sho narso njaji iferinaipe Abraham, Isaac njite Jacob.
6
Niini piajiwatsa, Jliaji pi-MInalri Dio lriaca pirso jliaji jiipai piofá-carro niini matsia capoa pjia, ima
inaiki aimadan kerroaperrica shá.
7
Iwaopia manatsaotsa coajica imaca kerroaca Jliaji pi-MInalri Dio jalrapocolri ricó; imoto cayami pia Egipto jipaite lrikjoite akjerreca iocawa ajerriji, joiwiperrica yema mavawa Dio ikjoete mana shá.
8
Horeb lrico ikerroata pia tsakja Jliaji pi-MInalri Dio, njite kerroa pia matsina ikjoete wadee Lriwayaketaca shá.
9
Njorra caojli pia jiipana naco nocoadatá-carro njaji jiipada capatsitape, niinicawa poia nerroa njaji yácoti waMinalri inaitja shopa yácoti iapiya, nofá pia jiipana naco cuarenta jalredaoca njite cuarenta deepi; corrin coca noiñja, corrin tsakja coca noirra.
10
Jliaji Iminalriti ia norso njaji yamaita jipadaitape capatsitape lridanacawa inaco lricapipjiwida sho; nanaco njaji yamaitade jipada nini pia pjiomi njaji yácoti jimirri pia Lricaiterri irso Jliaji IMINALRITI jiipananaco pia tiyé kerradalri ipecolrikjoite iwacaaca caojlia niini.
11
Mitsa nawaca cádanacowa njaji cuarenta
jalredaoca njite njaji cuarenta deepi wa-Minalri ia piakena norso njaji yamaita jiipada, nerrocawa njaji yácoti waapiyawacadalri.
12
Lriaco norso Jliaji Iminalriti: ''Pjinocoa pidiá-carro kjeya ajaiteji, ima njaji pinaikite pjitaji Egipto lrikjoite, oopi namatsicaacawa. Kjeyacalretsa namacaca njaji Nonápoialri nanaitjaca. Nanaitjaca pada jinapjiami lriarropoco lricoda.
13
Njire Lricaite pja norso cayoji: ''Noají matsia coajica trrá-perrica jiwida lrico njaji inaikica njaji.
14
Picada Njowacatsa, Notaitá carroatsa nowayaketacana jalredaoca ioya, njite corrinatsaotsa coca yanjí nanaco, njite nonaitjenakjaotsa pinakjoite pacoa yacaalre macacoe pja njite kjaidaperri tsakja.''
15
Icamitsa nodiaca norrocowa jiipana nakjoite, njite kerraca tiyé sho jliaji jiipana. Njite nocapi ricoca njaji yamaitade jiipada wacoan Dio yacoam nacope waapiya.
16
Opi cayamina inaitja imatsicanawa i-Minalri Dio ipeyajle. Inaitja piaca irsowawa apana vaken jinapjia. kjeyacalrim imacaca njaji Dio inapialri inaitjaca.
17
Icamitsa nomacaca njaji yamitade jiipada nocapi rikjoite. Njite icapatsa coajica nomakjacana icapatsa.
18
Njite nopieta tsenakja nocoajacawa Dio ipeyajle cuarenta jalredaoca njite cuarenta deepi; corri noiñjaca, corrin tsakja noirraca ooni, naikjaote njaji imatsicanaa inaitjalri, inaitja capoa njaji maatsirri Dio ipeyajle, iometaca lrírroa.
19
Ima nofiocawa pekirritsa lrírroa ikjoete jliaji IMINALRITI ima kerroacani matsinaa ikjoete Lrioma pia lriwayaketaca shá. Mitsa Jlimitsa norso tsenakja jliada notatja cádanaco lriinai.
20
Kerroá piaca matsinaa Aarón ikjoete Jliaji wa-Minalri, wadeepe Lrinocani; Mitsa notatja Aarón ikjaote tsakja pacoa pacoacatsa.
21
Njopa jliaji nanaitjasopa namatsicana, jliaji vaken jinapjiami nanaitjalri, nomjaitani lricodó carrowa, njite nowititani matsia a kjerreca jliwaketsa lritaipe. Nopeco jliaji lritaipe onipao itarraca lrico jliaji iamarracadawa jiipana nakjoite.
22
Tabera lrico, Masah lrico njite Kibrot Hataava lrico, icatsa ikerroataca Jliaji IMINALRITI niini.
23
Dio imenaca caojli pia sha Cades Barnea lrikjoite, Lriaco cayoji: ''Warsena iawa iofá carroenaotsa lri-ricoda jliaji jiipai Noalri irso.´´ mitsa sha yemaca nakjoete njaji yácoti wa-Minalri Dio icadalri irso, corrin shepa njite corrin tsakja jimica lriaco irso.
24
Mjepacaperrica sha Dio ikjoete jliada nakjoitetsa noinita caojli pia nocapaca sha.
25
Niini nocoanjacawa Dio ipeyajle naikjaote cuarenta jalredaoca njite cuarenta deepi, ima Lricaite lriwayaketaca sha matsiape.
26
Notata Dio iinai cayoji: ''Pjia no-Minalri Dio matsiadalri, nawayaketatsa njaji pinaikite, njaji piyarrope, njaji piyometaji pjida kjaidadalri sho, njaji pjitaji Egipto lrikjoite picaapi kjaidadalri sho.
27
Piwaopia nanaco njaji Jinirrinaipemi Abraham,
Isaac njite Jacob; macapatsa namajican njaji inaiki, corrin tsakja namatsicana njaji pinaikite, coshoca
namatsicana,
28
ninintja nacaite njaji inaiki pjitaji ioya cayoji: ''Corri capoa Dio igtaita ideecana lrinacojle jliaji jiipai Lricaite pialri tsa narso lriacaotsa narso, njite maatsi capoa Lricapa narso, Lridee piacana Lrinó carrotsa jalrapocolri ricó.''
29
Pinakite catoana, piyarrope catsana, njaji pjitaji Egipto lrikjoite Pjida kjaidadalri shó.''