Capítulo 10 - Walripe jipadaitape Moise idana shopa
1
Jliawajli pia DIo icaite norso cayoji: '' ''Pimatsieta yamaita jiipada nacayosho-perritsa njaji paana pia, njite pinoatsa Noikjaolre jiipana nacó, njite pinaitjaotsa apana patowa.
2
Nodaná carroatsa nanaco njaji yácoti nodanaji pia nanaco njaaca paana pia, njaji pimakjalri, njite picadaotsana patowa lricó.''
3
Niini nonaitjaca apana patowa jaico acacia sho
njite nomatsieta yamaita jiipadaita nacayosho njaji pana piatoa njite njorrawa jiipana naco naapiya njaji yamaita jipadaita nocaapi ricó.
4
Jliwacatsa idana cayo piatsa nacayosho njaji lrinitaji lridanaca, njaji die yacoti inakjeti nacoperri Jliaji Iminalriti icadapialri norso jiipana naco tiyé ipecolrikjoite wawacaaca caojliwa, njite Jliaji Iminalriti iaca norsona.
5
Ikena nodiaca norrocowa jiipana nakjoiyte, njite nocadaa njaji yamaita jipadaita nomatsietaji; icatsa nateji cayotsaji Dio inaa capisho njoa.
6
(Njaji Iraelnai naawa Beerot Bene Jaacán lrikjoite Mosera ikjaolre. Icatsa mayamica Aarón nirse, ninitsa nadawani; Njite lrirritsa Eleazar ideji sacerdote sho lriarrontacao.
7
Njitedalri naawa Gudgoda lricojle, Gudgoda naawa Jotbata lricojle, jliaji jiipai tarracacawa ooni.
8
Jliawajli pia Jliaji Iminalriti lriniwana pia njaji Leví poco njacarro iwakje jliaji patowa Yácoti i-patowani, nadejí-carro na-Minalri Dio ipeyajle, njite nácarro matsiadalri nanaco njaji inaiki Dio ipitana nacó, cayotsaji panashete toa.
9
Njite njaji Leví poco corri piatsa narsoca njepaitewa nainai njaji nakitsiñape njepaite ricó; ima Dio catsa jliaji narsolri nayadawa nainai, cayotsaji i-Minalri Dio icaite capisho piatsa irso.)
10
''Nofa pia lrinaco jliaji jiipana cuarenta jalredaoca njite cuarenta tsakja deepi cayotsaji noinita caojli pia. No-Minalri jimi pia norso jliawajli; Corri piatsa no-Minalri ioma pia ínoca njoa.
11
Lriano norso Jliaji Iminalriti: ''Warsa pjinicoa piá-carro napeyajle njaji inaiki, pjiá-carro ideena naacádanacoa; ima nacaotsa njite njepaotsa nayadawa jliaji jiipai nocaiterri pia narso njaji naferrinaipe oopi yácoti ajádalri shó.''
12
Panaya Iraelnai, ¿Cocao jliaji lritatjalri iinai Jliaji Iminalri Dio? lrioyatsa jliaji lricaitecawa irsocatsa ifioca i-Minalri Dio iwana, Inaitja cayoji Lrioma capisho, ipeyocani njite iáca matsiadalri lrirso Jliaji i-Minalri DIo icaolre lrikjoite njite pjiomi icafica iapiya,
13
iwapaca inacoa njaji Dio inashopa fá, njaji lridanaji warso, nonalri sha inaco panaya matsia carroatsa shá?
14
Jimi matsia, iMinalri Dio iyadaca jliaji eeno, njite njaji eeno icaoperri tsakja; jliaji jalredaoca njite pjiomi njaji lri-ricodaperri.
15
Mitsa Jliaji Iminalriti icaamitsa catima lricapaca jinirrinaipemi irso njite lripeyona niini lriniwanaca njaji nanakjoité-perri njapodamitsa, naoya njaji apjetsida inaiki, cayotsaji lrinaitja capisho panashete toa tsakja.
16
Niini irsotsa iyoaca icaolre iicao pjiomi matsiperri wadee majica catoa sha.
17
Ima Jliaji Iminalri, icatsa na-Dioteca njaji dionai njite talricanatinai Italricanaacani, DIO MACÁDALRI, KJAIDANALRI NAFIONDA NACAPACA, corridalritsa ipeyo pana tsa apjetsida ioya, corridalri tsakja pacaoñandaca lritecojletá-carrontja lriwaopiakje.
18
Lrinaitja matsia maojerrinaipe irso njite narso njaji madoiyoanaipe, njite lripeyo tsakja njaji apana tsakja inaikin ima lriaca naiñjawa njite natsayaniwa tsakja.
19
Niini irso tsakja ipeyoca njaji inaikitsa ioya; ima iofacape pia tsakja sha inaikinaitsa ioya Egipto jipaite ricó.
20
Ifio watsa i-Minalri Dio iwana; Lriso watsa ya irso matsiadalri. Padatsa Lrinaco icadaa icaolre, icaite lrirso yácoti ajádalri sho Lriipitana nacó cayo caotsa inaitjaca.
21
Icatsa piandaca irso matsiadalri, Icatsa pi-Dio-teca, jliaji icadalri icapa jlida, lrifaina, njaji icapalrina itji shó.
22
Naocapiawa Egipto lricojle njaji iferrinaipemi setenta namaimaca; Njite panaya oopi i-Minalri Dio imaimataca sha nacayosho njaji jirsida eeno yecoa nacoperri.