Capítulo 7 - Dio inaikiteca njaji Iraelnai
1
IMINALRI Dio idee caojlinaotsa sha lri-ricoda jliaji jiipai iofalriotsa irricoda, njite jitaotsa njite njaji aimadan inaiki ioyawa, njaji: hititanai, gergeseonai, amorreonai, cananeonai, derezeonai, heveonai njite jeboseonaio; siete coa jiipai macacoepe pja njite kjaidape pja ioya.
2
Njite Jliaji i-Minalri Dio icada kenaotsa shamana, icapaaca cádanacoa oowi rico, inoacaotsawa nakjoete njite irsotsa iwayaketacana pjiomi. Manaitjatsa yácoti naapiya, corrin tsakja kjenacantja icapaca narso.
3
Mjetatsaotsa ininaiwaca naapiya; maatsaotsa itonaipe neenipe irso, corrin tsakja jitaca naitonaipe yenipe inowa.
4
Ima namacaoltsa namacaca Njoa njaji yenipe nacarroenakja nadiote shapodam. Nininaotsa i-minalri írroa ipojlia caotsa ikjoete njite Lriwayaketacaotsa sha kjeya.
5
Mitsa inaitjaotsana cayoji: Pimatsicaotsa naoya naaltarni, ipecoatsa njewawa njaji nemacarrona nanaitjanda jiipada sho nawaketaji, imatsiketaotsa njaji njenapjiami narsolri, rsoaji nadiote Aserá, njite imjaitaotsa njaji idolonai.
6
Ima apacoa inaikica sha i-Minalri Dio shenitaji
Lrirsowawa. Lriniwanaca sha Lrirsowao-carro sha naoya njaji apjetsida inaiki jalredaoca lricoperri
7
JLIAJI IMINALRITI corrin lripeyoca sha, corrin tsakja Lripeyoca sha aimadan capoa pjantja sha naoya njaji apacoa inaikinai,
8
icamitsa Lripeyo capoa sha, njite jliatsa yácoti yapiya Lrinaitjalri yácoti ajádalri sho naapiya njaji jinirrinaipe oopi. Cayoshopa jliaji IMINALRITI jita sha Egipto lrikjoite Jlida Kjaidadalri sho lrioya jliaji njerrapitelri pia sha nirse, Faraón ioya, Egipto italricana.
9
Niini pirsotsa pianjica Lrinaco Jliaji pi-Minalri Dio, Dio caní, Jliaji Dio corridalritsa imatada, corridalritsa iyamitaca Lriacoam ioya, corrin Lrimacana aima, aima coma naco naapiya njaji ipeyocapeni njite nanaitja cayoji nacaite capisho njaji yácoti kjaidaperri,
10
mitsa Jlirrapiteta kjeya njaji imacoadatacapeni ate Lriwayaketana.
11
Niinicapa, pjiepaotsa njaji yácoti kjaidaperri, njaji nanacoapanaperri njite njaji yacoti Nocaiteji panaya inaitjá-carrona.
12
Pjimi cada njaji yácoti, njite pinaitja cayoji nacaite capisho, njiteotsa Jliaji pi-Minalri Dio jlinaitjaotsa njaji yácoti Lricaiterri pirso njite corriotsa Lrimacoadataca njaji Lricaiterri narso njaji
jinirrinaipemi.
13
Lripeyo catsaotsa sha, Lrinaitjaotsa pirso matsia njite Lrimaimataca sha; lricadaotsa matsia pidaki rico kenipe-carro pjia matsia, njite matsia watsa pipania iinaca, matsia tsakjaotsa pivacan, pjiomi pípirra, lri-ricoda jliaji jiipai Lricaiterri yácoti ajádalri sho pjinirrinaipe irso.
14
Matsia pjacaotsa pjia naoya njaji apjetsida inaiki; corriotsa pacapá carroca pada atsia o inarro corriperri itaita irsoca yenipe, coshoca njaji ivacan.
15
JLIAJI IMINALRITI jlienitaotsa ioya pjiomi ipoati; corriotsa Lricada carroca inaco njaji ipoati matsiperri icapalri pia Egipto lrico, mitsa Lricadacaotsa nanaco njaji matsíperri icapaca irso.
16
Shametacaotsa pjiomi njaji inaiki papocoperri iofacawa pi-Minalri Dio icadalri pjiamá-carrona. Njite corriotsa kjená carroca picapaca narso. Njite corriotsa iácarro matsiadalri narso njaji nadiote mikjapanperritsa. Mjewatsa naowetanda nacó.
17
Picaite cada picaolre ricó: ''Aimadan pjaca nooya njaji inaiki aimadan pacoa nacope; ¿Coajintja njoamana?
18
Mafiotsa naiwana; piwaopia watsa coaji piaca pi-Minalri Dio inaitjaca Faraón irso njite pjiomi Egipto tsakja;
19
Njaji picapalri coaji piaca njerrapitaca, njaji macapacanaperri, matsiaperri pacapa, Dio jíida kjaidadañri, njite coaji piaca Lripiajletaca ikjaolre njaji Lrinaapa, njaji Jlitalri sha isho Jliaji pi-Minalri Dio. Cayo tsakjaotsa lrinaitjacaotsa Jliaji pi-Minalri Dio narso njaji inaiki ifiolri Lriiwana.
20
Njite tsakjaotsa, Jliaji piMinalri Dio imenacaotsa aini napecolricojle, nawayaca carroatsa pjiomi njaji idawaacalri tja pioya.
21
Corrin noma pifiocawa, ima inai catsa Jliaji pi-Minalri Dio, Dio Macádalri, Nafooda iiwana,
22
Jliaji pi-Minalri Dio jitaotsa njaji inaiki aimadan pipeyajle tacatsa. Corriotsa piinó carrocana pjiomi papiatsa, wadentja natsomitaca sha njaji maficalri kerroaperri iwaipoco naco.
23
Mitsa Jliaji pi-Minalri Dio lricadaotsa shmá carrrona inoaca cádanacoa oowi ricó; lricadaotsa taniaca nacapaca a kjerrecaotsa nawayacawa pjiomi.
24
Lricadaotsa piapirse njaji natalricana, njite picadaotsa neepitana iñacawa jalredaoca ioya. Corriotsa cocá carroca itaita yemacawa pikjoete, a kjerreca piwayaketana.
25
Pimjaitaotsa nadiote jinapjia nanaitjaji, njaji mikjapamperritsa. Makemi tsaotsa njaji owirro nanacope wade pjipacana pirsowao, ima pinaitja cada cayo, wadentja ipeyoca irsowaona, ima Jliaji pi-Minalri Dio idofiandaca njaji cayoperri.
26
Madetsa njaji maatsiperri piipana lricojle wade iaca matsiadalri narso. Matsiotsa picapaca narso njajicadofialre perri, icamitsaotsa piwayaketacana.