¹ Aima walria pia narsoca maatsicalri naapiyawaaca njaji Saul iipaneta David iipaneta ikjoete. David ikjaidataacawa pja caidalritsa, njite Saul iipaneta corrinatsa kjaidana. ² Jiico pia njaji David yeenipe Hebrón lrico. Amnón jliaji lrirri pjerriti roapiya rsoaji Ahinoam, Jezreel-darro. ³ Njite lrirri iwerriti, Quileab, roapiya rsoaji Abigail, Carmel-darro, Nabal iinom. Lrinacojledatsa Absalón, roapiya rsoaji Maaca, Talmai iito, Gesur italricanaa. ⁴ Pada tsakja David irri, lriipitana Adonia, roapiya rsoaji Haguit. Njite-dalri Sefatia, roinai rsoaji abital, ⁵ njite-dalri Itream, David yeenipe roapiya rsoaji lriino Egla. Icatsa njaji David yeenipe jiicolri Hebrón lrico. ⁶ Niini aima jalredaoca shapodamina nainoaca cawa njaji Saul iipaneta David iipaneta ikjoete njite Abner-ca jliaji kjaidalri David iipaneta nacó. ⁷ Saul irso pia aapama lriinaidarro roipitana pia Rizpa, aja iito. Isboset iaco Abner irso: ''¿Coada pimaa roapiya rsoaji njonirri inarrotem?'' ⁸ Ikena keerroaca Abner lrikjaote jliaji Isboset icaiterri lrirso, niini lriaco: ''Cotsa midalrim catsa njoa idejicada Judánai irso. Matsiaca njoa pjinirri Saul iipaneta irso, picapa corrica nocadaaca pjia David iinó-carro pjia. Njite panaya picaite nomaaca roapiya rsoaji iinarro. ⁹ Dio watsa jirrapiteeta njoa corri cadaa nonaitjaca Cayoji wa-Minalri icaite capisho pia David irso yaacoti ajádalri sho, ¹⁰ jliyapeetá-carro jliaji saul iipaneta italricanaaca Davidcarro italricanata Irael nacó njite Judá, Dan nakjoite Bersebá nacojle.'' ¹¹ Corrinatsa coaji Isboset icaiteca Abner irso pada yaacoti, ima lrifioca lriiwana. ¹² Niini Abner imeenaca iacoti paana iinai caacó carrona David inai lrikjaote, cayoji: ''Ajá-dalri pjiaca yaají lrinaco jliaji jiipai. Pinaitja pada yaacoti noinai, njitenaotsa piajíwatsa piinai catsa njoa, nodee-carro pirso piomi njaji Iraelnai. ¹³ David idieta lrirso yaacoti, cayoji: ''Matsiatsa, nonaitjeniotsa piinai yaacoti. Mitsa notatjaca piinai pada, corriotsa pinó carroca noderse corri-cadaa pidee norso rsoaji Saul iito Mical.'' ¹⁴ David imeenaca ideecaperri iacoti Saul irri irso, Isboset: ''Piá norso rsoaji noino Mical, rsoaji nocaoñalri icoada cien nadadam iyam nakjoite njaji filisteonai.'' ¹⁵ Niini Isboset imeenaca njaji lrirsoperri naa-carro njeta Mical roinirri Paltiel ioya, Lais irri. ¹⁶ Roinirri iawa roinai lriiyacayawa naacadanacoa inipolrico, lriá rsoapodami Bahurim lricojle. Njite Abner iaco roinirri irso: ''Warsena pidiawa piipana lricojle panaya jliaji.'' Ikena lridiacawa. ¹⁷ Caaco abner naapiya njaji caconaaperri pekipenai Irael lricoperri cayoji: ''Oopi rikjoite piena, ioma pia italricanaaca jliaji David. ¹⁸ Niini panaya icadeena David-carro italricanaata inaco. Ima wa-Minalri icaite pia David naco cayoji: ''norsodalri David inakjoite noyomjetacaotsa njaji nonaikite aimadan Iraelnai naoya njaji filisteonai, njite naoya njaji nacoema pjiomi.'' ¹⁹ Caaco tsakja jliwaacatsa jliaji Abner narso njaji inaiki aimadan Benjamínai. Njitena Abner yaawa David iderse caacó-carro lriapiyani Hebrón lricojle, lricaité-carro jlimi coanca Iraelnai njite Benjaminai iomalri. ²⁰ Abner iocawa Hebrón lricojle lricapá-carro David iderse, njite lridee vente atsianai lrirsoperri, David inaitja cadaana aima injaodati napiá. ²¹ Abner iaco David irso: ''Picadaa njoá-carro iwakeeta pirso, pjia no-talricanaa pjiomi njaji Iraelnai, nanaitjá-carro pada yaacoti piapiya, pitaitá carroenaotsa pitalricanaataca nanaco pjiomi cayoji pioma capisho pia.'' Njite David imeenaca Abner lridiá-carroa matsiatsawa. ²² Njite Abner idia iocawa oowi lrikjoite naapiya njaji David itsolrodaonai, nadee nainaiwa aima nanaanipem njaji nainojimi. Mitsa corrinatsa pacapa Abner hebrón lrico David iinai, ima David imeenaca-ca Abner idiawa matsiatsawa. ²³ Joab ioca cádanacoa naapiya pjiomi njaji tsolrodaonai aimadan lrinaiperri, naaco Joab irso: ''Abner, Ner irri ino pia talricanaati iderse, njite jliaji talricanaati icadaa lridiawa matsiatsawa.'' ²⁴ Njite Joab ino David iderse, lriaco lrirso: ''¿Cocao jliaji pinaitjalri? ¡Abner ino piderse njite picadaa lridiawa matsiatsawa! ²⁵ ¿Corrim piajíi Abner, Ner irri ino catsa lricashaatá-carro pjia, lriajíicarrotsa njaji piomalri pinaitjaca njite lriajíi-carro matsia nanaco? ²⁶ Joab idia imoto David ioya, njite lrimeenaca njaji lrirsoperri naa-carro Abner shaapodam, njite nadieta Abner oniapji Sira lrikjoite, mitsa corrin David yajíi lrinaco jliaji Abner inaitjalri. ²⁷ Niini Abner idiawa Hebrón lricojle, Joab ideeni teecojletsani pantinoma macapeki ipamoyoaca lrico caacocarro lriapiya maacotsa. Icatasa Joab itodaca niinini malriye sho lriwawa naco njite lriinoni. Cayotsa Joab iinocani lriwerri Asael icoadao. ²⁸ Divid jimi cádanaco lrinaco, lriaco cayoji: ''Njoa njite jliaji notalricanaaca cotsa warsoenica maatsicalri Dio ipeyajle lrinaco jliaji coanca mayamica Abner, Ner irri. ²⁹ Joab inaco tsaotsa jliwao jliaji maatsirri, jlinirri iipaneta ikitsiñape naco tsakja lriino capoa Abner. Njaji Joab ikitsiñape caidatsitsaotsa napecoca iirranati, catserrecana, pokjo-pokjo caotsa naacawa, narsocaotsa napjeeco, mayamicaotsana matseeta sho, njite maawitacai caotsana.'' ³⁰ Cayotsa Joab njite lriwerri Abisai naino Abner, lriino capoa nakitsin Asael oowi rico Gabaón lrico. ³¹ David iaco Joab irso njite narso pjiomi njaji inaiki lrinaiperri: ''Itafaa itayan inacodalri, sheeta inacoa tsaco wanam itsayaniwa iiyácarro Abner idadam naco.''Njite talricanaati David iawa njaapodam njaji idecape Abner idadam nawa carroni. ³² Nadawa Abner Hebrón lrico. Talricanaati iiya njite jliemata kjaida Abner icaonam naco. Naiya tsakja njaji inaiki aimadan. ³³ Caiwi lriaca talricanaati naco Abner ikjaote niini lricantaca: ''Mayami Abner matsilrídalricapishontja.'' ³⁴ Corrin napapica nja picaapi, corrim tsakja napapica nja pjiipa cadena sho. Oopi naino pjia njaji atsianai corriperri yajíi inaitjaca matsia.'' Icaamitsa naiya pjaaca njaji inaiki Abner icaonam naco. ³⁵ 5Pjiomi njaji inaiki nacaite tjaa David irso lriñja-carro yeenom pjacatoa jeerri, mitsa David icaite iacoti ajadalri sho: ''Dio watsa jirrapiteeta njoa noiñja cadaotsa ijaodati lripjeyatoa deepicani.'' ³⁶ Pjiomi njaji inaiki aimadan nacapa coajica inonaca David, corrinatsa coajica nanaitjaca, icaamitsa catima-cana ima napeyo piaca nacapaca pjiomi njaji David inaitjalri. ³⁷ Pjiomi njaji Judánai, Iraelitanai nacapa corripiaca David ioma pia iinoca Abner, Ner irri. ³⁸ Talricanaati iaco narso njaji lrirsoperri: ''¿Capja corrica yajíi pada atsia caconaadalri, Iraelnai jiwidaapo-ca jliaji mayamirri oopica?'' ³⁹ Mjaidaca noajiacacawa panaya, talricanaati naniwananda cadana tja njoa. Maatsiperri catsa njaji Sarvia yenipe. Dio watsa icadaa njerrapita maatsidalri sho namatsicanaa ikjaote, naomandatsa.''