¹ Cayo pia noeve walria oonia lri talricanaca naco jliaji talricanaati Sedequia, diepi kerri naco, die cadaa jalredaoca, lríno jliaji talricanaati Nabocodonosor, Babilonia italricanaa lrinai pjiomi njaji lri tsolrodaoperre aimadan Jerosalén icjoete. Naoca naofawa Jerosalén icoemjete njite njerreta nadanawa lriwaida naco. ² Niini nacoema idanata jliaji yacaalre once walria naco talricanaati caami Jedequia. ³ Noeve jalredaoca naco coatropi kerri naco lri rico walriatsa, mawitacai pekirri dalri iniitawa nayacalre rico, corrin pia pacapa injaodati narso njaji jalredaoca lricoperri. ⁴ Niinina njaji tsolrodao babilonionai njewawa yacaalre rico, njite pjiomi njaji tsolrodaonai niniperri napitocawa deepi rico inipo lrico lri ricjoite jliaji pantinoma yacaalre iwai ioyawaca cawa, paniapjida talricanaati dapana iyada icodapi. Nayofieta cadanatja yacaalre njaji nacoema, jliaji talricanaati Sedequia iawa Arabá icjaolre. ⁵ Mitsa njaji tsolrodaonai aimadan babilonionai napinieta jliaji talricanaati Sedequia atee naoketacani pacoacaita cawa naco jiipai Ooni Jordán nindalri, tsoomi Jericó ioya. Pjiomi njaji lri tsolrodaonai napocotacawa teeco lrioya. ⁶ Njepa jliaji talricanaati Sedequia njite nadeeni Babilonia italricanaa iderse, Ribla lricojle, nacaité carroena coan caotsa nanaitjaca lriapiya. ⁷ Njite njaji Sedequia ienipe, nainona lricapatsa. Njite Babilonia italricanaa jita Sedequia itjí, lripapini cadena bronce cja sho lridee carroni Babilonia lricojlen. ⁸ Njite cinco kerripi naco, siete jalredaoca naco, diecinoeve walria oonia talricanaati caami Nabocodonosor, Babilonia italricanaa, jliaji Nabozaradan, talricanaati Nabocodonosor irsodalri, comamdante tsacja narso njaji iwapacape jliaji talricanaati, iawa Jerosalén lricojle. ⁹ Lrimjaita jliaji Dio iipana, talricanaati dapana, pjiomi njaji panti Jerosalén lricope; lrimjaita tsacja njaji panti caconaadapana yacaalre ricope. ¹⁰ Njite jliaji yacaalre Jerosalén iwaimi, pjiomi njaji tsolrodaonai Babilonia lricope, narsoperri njaji comandantenai iwapacape talricanaati nawayaketa pjiomini. ¹¹ Njite njaji inaiki namacaji yacaalre rico toa, njite njaji ipitocapem pia tjatoa Babilonia italricanaa ioya, pjiomi njaji neetepem, Nabozaradan, comandante narso njaji iwapacape talricanaati, lrideena Jerosalén lricjoite Babilonia lricojle. ¹² Mitsa jliaji comandante narso njaji iwapacape talricanaati, icaamitsa lrimacalrica njaji kjenaaperri nadenji carro uvapji njite paana na kiníkerre. ¹³ Njite njaji panti ipje macanipe bronce nape wa Minalri iipana lricope, nja tsacja njaji ooni iarrona njite njaji naofacawa nacope tsacja Dio iipana lricope pia, nja caldeonai namatsiketa pjiomi paitapena njite nawakje nadee nja bronce Babilonia lricojle. ¹⁴ Na palanganani, na palani, na lamparan, na cucharani, pjiomi njaji nanaitjaji bronce sho nadenjishopa njaji sacerdotenai Dio iipana lrico, caldeonai idee pjiomina. ¹⁵ Nja tsipalraapi na peeco carroda palripocjoa, nja tsacja njaji ponchera-pipe nanaitjaji owirro sho, njite njaji nanaitjaji palraatape sho, na capitama njaji iwapacape talricanaati oopi lridee pjiomina. ¹⁶ Njaji yaamana panti ipje macanipe, ooni iarrona, njite njaji naofacawa nacope pia njaji ooni iarrona Salomón inaitjaji wa Minalri iipana icaonape aima pia narsoca bronce corri-penatsa pataita panjii coshoca njamiñaca. ¹⁷ Jliaji apana panti ipje lrirsoca ocho metro inacojle pja nayenonca, njite pada pjaa lri tsapeewan nanaitjanda bronce sho lrinaco. Jliaji lri tsapeewan lrirsoca paita metro njite pamoyoa pja paita naco lri yenonca. Nanaitja lri matsiacao malla jinapjiam njite matojledadarrope tsacja lridajite naco, nanaitjacana bronce sho minitsa pjiomi. Caiminitsa nanaitjaca jliaji apana tsacja. ¹⁸ Jliaji na comandante njaji iwapacape talricanaati lridee Seraia, sacerdotenai iapiyawalri, lridee tsacja Sofonia, sacerdote iapiyawalri inacojleda, njite lridee tsacja njaji madalridadee iwapacape pantinoma. ¹⁹ Lridee tsacja presowa yacaalre ricjoite pada tsolrodao caconaite irsocada lri tsolrodaonai, lri dee pjaa cinco atsianai icaitecapepia talricanaati, njaji aperri piatoa yacaalre rico. Lridee tsacja presowa jliaji tsolrodao caconaite, talricanaati irsodalri, ianjicada iniwa inaiki tsolrodao-wa oowi icaona, njite sesenta pja atsianai caconaperri nanacjoite perritsa aperri piatoa nayacalre ricó. ²⁰ Niini Nabosaradan, na comandanten njaji iwapacape talricanaati, lrideena lricjaolre jliaji talricanaati Babilonia-dalri Ribla lricojle. ²¹ Njite jliaji talricanaati Babilonia-dalri lrinaa nadeecana Hamat jipaite rico Ribla lricotsa naino carrona nirse. Icapiatsa cayo, Judá imoto piacawa njepaite ioya pada jiipai nacojle. ²² Njite njaji inaiki iofaalritsao Judanai jipaite ricotsa, njaji Nabucodonosor, Babilonia italricanaa inaalri namacaca niini-tsa. Lricadaa Gedalia, Ahicam irri, Safan irri jliá carro naapiyawalrio. ²³ Niini njaji comandantenai njite njaji natsolrodaonai, njemi cádanaco Babilonia italricanaa icadaaca Gedalia talricanaati-sho niini, ikena nawa Gedalia icjaolre Mizpa lricojle. Icatsa njaji atsianai ialriwa lriderse: Ismael, Netania irri; Johanán, Carea irri; Seraia, Tanhumet irri Netofata inacjoite dalri, njite Jaazania, Maacateo irri, nadee tsacja nanaikite. ²⁴ Gedalia icaite iacoti ajádalri-sho narso, nanaikite irso tsacja, lriaco narso: ''Mafiotsawa nacjoete njaji tsolrodaonai caconaperri caldeonai. Iofenawa lri ricoda jliaji jiipai, idenji lrirso jliaji talricanaati Babilonia lricoda matsia-carroatsa jia.'' ²⁵ Mitsa, siete kerri jiapodam, jliaji Ismael, Netania irri, Elisama irri talricanaati iipaneta inacjoite dalri, lrino naicjaolre die atsianai iapiya lriinó carro Gedalia. Mayami Gedalia, mayami tsacja njaji atsianai Judá lricope; mayami tsacja njaji babilonionai lriinai perri pia Mizpa lrico. ²⁶ Niini pjiomi njaji inaiki iempetipe toa, njite njaji pekipenai, njaji comandantenai tsolrodaonai iapiyawanai njenico naawa Egipto lricojle nafio capoa naiwana njaji babilonionai. ²⁷ Njite trenta siete walria oonia nadee caami Joaquim, Judá irri jlipaite ioya, doce kerri naco, ventisiete jalredaoca naco lrinacopitsa kerri, Jliaji talricanaati Evil Mardoc, Babilonia italricanaa, lri motoeta Joaquim, Judá italricanaa preso dapana lricjoite. Cayo pia Evil Merodac inaitjaca lriinita caojli lri talricanaataca. ²⁸ Caaco lrirso matsiacalri rico njite lri cadaa lrirso lriofa-carroita matsiadalri pjaa naoya nja paana talricanaatinai lriinaiperri Babilonia lrico. ²⁹ 29Evil Merodac inaa na tojloetaca Joaquim ioya lri tsayani lriofa carrda preso dapana lrico ima corri ketsa presoni, njite lricadaa lrinjaca nainai talricanaati imesan naco caidalrinatsa caafi cádanaco toan. ³⁰ 30Njite lricaite narso nacadaa-carro lrinjaope jalredaoca icoam caidalritsa caafi cádanaco toani.