¹ Yaami cádanaco Salomón itatjaca Dio iinai, ikeena tiyee jiwacawa eenolrikjoite njite lrimjaita matsiape njaji maaficalri nainoji, namjaitaji piena, njite Dio imatsiaca melremelredalri ipakjantaca panti rico. ² Njaji sacerdotenai corripiatsa nataita njewacawa Dio iipana lrico ima pakjamicani lrimatsiaca melremelredalri sho. ³ Pjiomi njaji iraelitanai aimadan nacapaca tiyee iorroco cádanaco njite Dio imatsiaca melremelredalri irrocawa panti macade naco. Niini nacoajacawa necoa sho jiipai nacojle namatsietacawa jiipada sho, natoda naorsipada njite naaca matsiadalri wa-Minalri lrirso, naaco: ''Matsiadalrica wa-Diote, corricapoa jlienaca lrioya jliaji lriacoarrom icaamitsa lricadaacani caidalriwenatsa.'' ⁴ Ikena jliaji talricanaati, njite pjiomi njaji inaiki aimadan naino maaficalri wa-Minalri irso. ⁵ Salomón iinoca ventido mil buy, ciento vente mil oveja njite cabra tsakja. Cayotsa, jliaji talricanaati njite njaji inaiki aimadan nacadaaca jliaji panti waMinalri irso. ⁶ Nemacawa njaji sacerdotenai, nacoanam nadenjicawa lrico; cayo tsakja njaji levitanai nasho njaji natocaji Dio irso, njaji David inaitjaji inaitjaji naacarro matsiadalri Dio irso nacantanda lrico: ''Lrikjaote jliaji piacoarrom corridalritsa pimacacani caidalriwetsa.'' Pjiomi njaji sacerdotenai napjiaca natrompetan narso njite njenico nemawa pjiomi njaji inaiki aimadan. ⁷ Salomón iemawa yacalrecoa ipamoyoaca naco lricoemjete jliaji Dio iipana. Icatsa lrimjaitaca nja maaficalri niini njite neeti njaji maaficalri lrimjaitaji imaodacakjeti nacoda, ima jliaji altar lrinanda nanaitjaca corrin lritaitaca naapiya njaji maaficalri namjaitaope, njaji ofrenda comaanape njite njaji ofrenda maaficalri iiti sho. ⁸ Cayo piatsa, Salomón icatimataacawa jliawajli pia siete jalredaoca padenirri, lriinai pjiomi njaji Iraelnai, aima nawacaacawa, Lebo Hamat nakjoite, lriocawa lrinacojle jliaji onipaokja Egipto lricoda. ⁹ Ocho jalredaoca naco nawacaacawa nacadaa carro catjinaa, siete jalredaoca capoa nawacaacawa nacaite carro Dio irso lriipana njite nacatimataacawa capoa siete jalredaoca. ¹⁰ Njite venti tre jalredaoca naco, siete-pi naco, Salomón icadaa nadiawa njaji inaiki aimada nacaolre catiimadalri iapiya Dio imatsiaca ikjaote lricañjatalri nacapa David nacojle, Salomón njite lrinaikite aimadan nacojle Irael. ¹¹ Cayotsa Salomón itaita pia Dio iipana njite lriipanao tsakja. Coan piaca Salomón iwaopia pia lrinaitjaca jliaji Dio iipana njite lriipanao catsa, matsia namotoca lrirso pjiomi. ¹² Njite deepi rico, Dio icañjatacawa Salomón irso, lriaco lrirso: ''Njominina njaji pitatjalri noinai, niiní noniwanaca Norsowaotsa lriemalri niini jliaji panti nainocawa norso maaficalri. ¹³ Wacadaa noita capishontja njaji eenocoma wadentja iiyacani, o nocadaa cantja tacaapa injaca pjiomi njaji paniati jalredaoca lricope, o nocadaa cantja ipoati nanacojle njaji nonaikite aimadan, ¹⁴ njitemintja njaji nonaikite aimadan, inomatacape Noipitana, najiacawa njawacatsa corricatsa cocacana, natatjaa noinai, nadia naoma njoa njite namaca naoyao jliaji nanaitjanda maatsi, Njomintja narso eenolrikjoite, nocadaa jliyapaca nooya jliaji nanaitjanda norso maatsi, njite No-matsieta tjakja narso njepaite maatsidalri ioya. ¹⁵ Niini nowapaotsa nocapa naikjaolre njite nocadaa tsakja njonacolrico nanacojle njomicarroatsa njaji natatjalri noinai lri-ricoda pantica jliaji. ¹⁶ Ima Noniwanaca njite njoenitaca norsowao jliaji panti niiní carroatsa noipitana caidalriwetsa. Nopeyo capoa nowapacaotsani jalredaoca icoam. ¹⁷ Njite pjia, pinaitja cadaa norso matsia cayoji pjinirri David inaitja capisho pia, pjiepa cadaa pjiomi njaji Nonaalri pinaitjaca, piofaa cadaa cayoji nonaa capisho piofacawa, njaji iacoti nocadaji, ¹⁸ njitenaotsa Nocadaa matsia carro pitalricanaaca, cayoji nocadaa capisho noacoam pjinirri David irso, nocaite cádanaco lrirso cayoji: ''Corriotsa pacapa pada pinakjoitedalri corridalriotsa italricanaataca Irael lrico.'' ¹⁹ Mitsa corri cadaa pinaitja cayo, Corrin piofacawa cayoji nocaite capisho, corrin pinaitja njaji iacoti kjaida perri No cadaalri pinaitjá carro, njite piá matsiadalri narso njaji miperrimtsa dioca, pitoda piorsipadao narso, ²⁰ Njorracaotsa pjia lrioya jliaji njopaite nocadanda narso cayoji pjerrá capisho paniati lripalrida fie jiipai ioya. Jliaji panti Njoenitanda Norsowao, nopecoatsani teeco nooya, nocadaotsa pakja iacoti narso njaji inaiki necaacarro lriicao. ²¹ Jliaji panti macade yenondalri panaya, pjiomi njaji jiyapacapewa lricodapi corriotsa nanji coanca njite necaawatsa lriicao. Natatjacaotsa: '¿Coada pa cayo Dio inaitjaca jliaji panti lrirricoda jiipaica jliaji?' ²² Panaotsa jiepana: ''Namaca capoa na Minalri Dio, jliaji jitalri piana njepaite ricjoite njaji Egiptonai, njite naawa njapodam njaji corriperritsa diocana, natoda naorsipada naacarro narso matsiadalri. Cayoshopa Dio icadaa pjiomi njaji maatsirri nanaco'''.