¹ Njite Salomón icaite cayoji: ''Jliaji wa-Minalri Lricaite pia lriofacaotsa cadaocadalri jipanda dalri rico ² mitsa nonaitja pirso pada pana panti matsiadalri piofacarroatsa niinio caidalriwetsa.'' ³ Njite jliaji talricanaati icaboco naikjaolre njaji iraelitanai iwacaaca cápewa iemalri niini. ⁴ Salomón icaite : ''Waca matsiadalri wa Minalri irso na Diote njaji Iraelnai, caacolri pia njonirri David irso, njite lrinaitja cayoji lricaite capisho pia jliida kjaidádalri sho, lriaco: ⁵ ''Jliadaa nacjoitetsa njotaca njaji nonaikite aimadan Egipto lricjoite, corri noanjica nooma nayacale rico nja apaana inaiki tsa naoya najai Iraelnai nonaitjá carronta noopanao niini, niiní carro Noipitana caidalriwetsa. Corrin tjakja noniwanaca coandalricatsa jlia carro ianjíi nanaco njaji nonaikite aimadan Iraelnai. ⁶ Mitsa, icamitsa Noniwanaca jliaji yacaalre Jerosalén, niini carro noipitana iofaawa, njite noniwana David jlia carro italricanaata nanaconjaji nonaikite aimadan Iraelnai.'' ⁷ Njite njonirri David icaolre ricó, lrioma pia lrinaitjaca pada pana panti wa Minalri iipitana icaoya, na Diote njaji Iraelnai. ⁸ Mitsa wa Minalri icaite njonirri David irso: ''Matsia jliaji piwaopialri picaolre ricó piomacawa pianitjaca pada pana panti noipitana icaoya, ⁹ mitsa, corriotsa pjia carrocaotsa inaitjani, pada pienipe inocada pinakjoite, ljiá watsa inaitja jliaji panti Noipitana icaoya.'' ¹⁰ Opi wa Minalri inaitja cayoji lriacoarrom shotsa, ima njoaca njonirri David jiapodadaca italricanaataca Irael nacó, cayotsa wa Minalri icaite capisho pia. Nonaitjenina jliaji panti wa Minalri iipitana icaoya, na Diote njaji Iraelnai. ¹¹ Nocadenina nirse wa Minalri ipatowa lriofalri niini Lriacoarrom lrinaitjalri naapiya njaji Iraenai.'' ¹² Ikena Salomón iemawa wa Minalri ialtarni ipeyajle nacapawerrico pjiomi njaji Iraelitanai iwacaacalrio, njite lripiajleta nja lricaapi. ¹³ Salomón inaa pia nanaitjaca neema carronawa bronce sho lripamoyoaca lrico jliaji Dio iipana iyacalrecoa irsocada pia yamaita metro njite paita pacaapi jliwalripaca, cayo tsakja lrimacaiteca njite paita metro trenta cinco centimetro lriyenonca. Icatsa lriemacawa lrinaco lricadaa carro iacoti matsiaperri nanaco njaji Iraelnai iwacaacalrio niini, ikeena lripiajletaca nja lrinaapa yenonrse. ¹⁴ lriaco cayoji: ''Nominalri, na Diote njaji Iraelnai, corrim pacapaca pada caidalrimtja picayosho eenocoma lrico o jiipai nacojle cantja, jliaji corridalritsa imatadaca lriacoam narso njaji lrirsoperri inaitjacape nacaolre ricjoite cayoji pioma capisho. ¹⁵ Pjiatsa ikjaidata pia jliaji njonirri, pirsodalri David, Njaji Picaitejim Pinoma sho, oopina pinaitjana picaapi kjaidaadalri sho panaya. ¹⁶ Niini panaya no Minalri, na Diote njaji Iraelnai, pinaitja jliaji picaitenda pirsodalri David irso, jliaji njonirri picaite cádanaco cayoji: ''Matsia cadaotsa njaji pinacjoite perrii njeepaca noaco cayio picayosho, nanaitja cadaa cayoji Nooma capisho, corriotsa coancaojlica pacapaotsa pada pinacjoite dalri corridalriotsa italricanaataca Irael naco. ¹⁷ Niini notatjaca piinai panaya, pjia na Diote njaji Iraelnai pinaitja carroena cayoji picaite capisho pia pirsodalri David irso. ¹⁸ Mitsa, ¿Capja ajadalrica Dios itaita iofaacawa anji jalredaoca lrico? Ima jliaji jalredoca cajliaji corri lritaita jlipaca pjia, corri tsacja eeno cantja? ¡Omami kena jliaji panti nonaitjanda! ¹⁹ Cayo cadanatsa, pinaitja matsiacalri, pjimi pirsodalri irso, njite jliaji lritatjalri piinai. Pjia no Minalri Dio; pjimi coanca, njoa pirsodalri iiyaca notatja cádanaco piinai paanaya. Nooma picapaca lricjaolre jliaji templo deepi rico njite jaalrewerrico, lrinacojle jliaji Picaitenda inaco niinicaotsa Picadaa Piipitana iofawa. ²⁰ Pjimica jjiaji notatjalri piinai kjema lrinao jliaji panti. ²¹ iini, pjimica pirsodalri irso njaji lritatjalri piinai, njite narso njaji pinaikite wa tatja cádanaco piinai lrinacojle jliaji panti. Pjimiotsa warso Piofalri njiteo, eeno lricjoite, njite njaji wacaitenda pirso, picadaotsa njeyapaca pjioya njaji imatsicanaati. ²² Pada atsia inaitja cadaa maatsi lricodapidalri irso njite lrinaa lricaiteca iacoti ajadalri sho, njite jliepa cadani jliaji lrinaalri lrinaitjaca lrinaco jliaji pi-altarni lrirricoda pantica jliaji, ²³ pjimiotsa lrirso eenolricjoite, njite pinaitja cayoji coanca picapaca nanaco njaji pirsoperri, cocacadaa irso maatsicalri, lrideecaotsa lrinacoa jliaji imatsicanaati, njite jliaji corridalritsa irso imatsicanaa, picadaa mamatsicanaatsani, ima corrica lrirso maatsicalri. ²⁴ Nacoema jiameeta cadaa njaji pinaikite aimadan Iraelnai nanaitja capoa maatsi Pirso, mitsa nadia cadaa naoma Pjia, nacaite carro ajádalricatsa Pjia, njite natatjaca piinai, njite nacaite pjiatjá carro naoya namatsicanaa lrirricoda pantica jliaji, ²⁵ pinaitja matsiacalri, pjimi narso eenolricjoite njite pjiatja naoya namatsicanaa njaji pinaikite aimadan Irael. Picadaa tsenacja nadiá carro njepaite ricojle Picadanda narso njite narso njaji naferrinaipemi pia. ²⁶ Piita cadaa njaji eenocoma njite corri iiya jiwacao jiipai nacojle nanaitja capoa maatsi Pirso njaji pinaikite aimadan, mitsa natatjá lrinacojle jliaji piinai, njite nacaite pada catsa Pjia, nadia naoma Pjia, namaca naoyao namatsicanaa pjirrapiteta caaminana, ²⁷ pjimica narso eenolricjoite, pjiatjaotsa naoya namatsicanaa njaji pirsoérri, njaji pinaikite aimadan Irael. Picananta caaminana coanca narsotsa nanaitjaca matsia. Picadenaotsa iiya jiwá carro njepaite naco, lrinaco jliaji jiipai picadanda narso njaji pinaikite aimadan nayadao. ²⁸ Niini cadantja maawitacai jalredaoca lrico, o ipoati cadantja, mayamicantja nja paniati o yorri injacape nja paniati; o icoema iomacadaa iinocana nayacalré ipananoma lrico, jipaite rico, o nini cadaa imatsikeetacape paniati o ipoati cadaa; ²⁹ njitentja padatsa inaiki o pjiomi njaji inaiki aimadan Iraelnai natatja piinai, njite nanjíi nacoanaa njaji imatsicanaati nacaolre ricoda njite napiajleta nacaapi lriemacawa icjaolre jliaji panti macadee. ³⁰ Pjimiotsa narso eenolricjoite, piofalri njiteo. Pjiataotsa naoya namatsicanaa njite pinaitja narso cayoji natatja capisho, njite picadaotsa nacoadao njaji inaiki nacioanaa nanaitjanda ikjaote. Pianjintsa nacaolre ricó, ima icaamitsa Pjia, padatsa Pjia ianjiicada nacaolre rico njaji inaiki jalredaoca lricope. ³¹ Pinaitja cayo nafió carroatsa piiwana caidalritsa naofaa cádanaco jalredaoca lrico lrirricoda jliaji jiipai Picadaalri narso njaji waferrinaipemi. ³² Njite Jjia jliaji inaiki corridalritsa wanacjoite dalri Irael, inocada pada jiipai nacjoite, mitsa lrino cadaa piipitana naco, mitsa pimatsiaca ikjaote picadanda pjiomi irso, njite lritatjaca lricjaolre jliaji panti, ³³ pinaitja matsiacalri pjimiotsa lrirso eenolricjoite, Piofalri njiteo, njite Pinaitja cayoji lritatja capisho Piinai inaiki pada jiipai nakjoite dalri. Pinaitja cayo naanjíi carroatsa Piipitana naco pjiomi njai inaiki aimadan jalredaoca lricoperri, cayotsa nanaitja capisho njaji pinaikite aimadan Iraelnai. Pinaitja cayo nanjíi carroatsa Pjiaca lriminalri jliaji panti nonaitjalri. ³⁴ Naa cadantja, nainoacawa njaji Pinaikite aimadan nacjoete njaji nacoema, akjerrecatsa pimeenaca naawaji, njite natatjanta piinai, lrinacojle jliaji yacaalre piniwananda pirsowao, lriikjaolre jliaji panti nonaitjanda Piipitana isro. ³⁵ Pjimiotsa eenolricojle jliaji natatjalri piinai, njite pikitsindatana nainoacalri icjaote. ³⁶ Wacadaa nanaitja capishontja namatsicanao Picjoete, ima corri catsa pacapa pada mamatsicanaalritsantja, njitentja keeroa capoa Pjia nacjoete picadana nacoema icaapi ricona, njite nacoema ideeca presona teeco o tsoomi. ³⁷ Njite nanjintja kjerrerseca nadeena njepaite ioya, njitentja nadia nawaopia namatadaca Pirso, njite nadia naoma Pikitsindatá carrona lririkjoite jliaji jiipai nadeecawajle presona njepaite ioya. ³⁸ Njite nadia nacaite: ''Ajádalri corrica wanaitja matsia niini wanaitjaca maatsi. Corritsa wanaitjenca matsia.'' Njite wacadantja nadiaca Pikjaolre nacaolre ricjoite njite nacafica sho njepaite rico njaji nacoema ideecapena, nacadaalri nirse preso carrona, njite natatja cádanaco, nacapa njepaite iokjaolre picadanda narso njaji naferrinaipemi, lriikjaolre jliaji yacaalre piniwananda pirsowao, lriemalri nirse jliaji panti nonaitjanda piipitana icaona. ³⁹ Pjimiotsa narso eenolrikjoite, piofacawa lrikjoite. Pjimi njaji natatjalri piinai ,njite pikitsindatana nanaco njaji naomalri piinai. ⁴⁰ Panaya Dio, notatja piinai caiwi ricotsa, pimjeco njaji Pitji matsia, picadaa Pjinacolrico matsia Picoadatá carro njaji natatjalri piinai lririkjoite jliaji panti. ⁴¹ Niini panaya, no-Minalri Dio, pjinicoenawa lri ricoda jliaji piwafeta carrodawa, Pjiá njite jliaji patowa kjaidadalri. No-Minalri Dio, picadaa manacocarro njaji sacerdotenai, njite picadaa nacatimatacawa pimatsiaca naco njaji pirsoperri. ⁴² No-Minalri Dio, macabocoetatsa teeco piecoa lrioya jliaji Piniwananda. Piwaadaca aialritsa jliaji iacoti picaitenda lrirso jliaji pirsodalri David.