¹ Josia inaitja naapiya Pascua wa-Minalri iipitana nacó Jerosalén lrico, naino jliaji cordero Pascua icaonada catorce jalredaoca naco lriniita carropi pawalria irso. ² Lricadaa nadeji njaji sacerdotenai nadejicawa lrico njite lricatiimatana nadejicarro matsia Dio iipana lrico. ³ Lriaco narso njaji levitanai, njaji icanantacape njaji Iraelnai, njaji jienitaacacapewa wa-Minalri irso: ''Icadaa jliaji Dio ipatowani jlienitanda lrirsowawa lri-ricoda jliaji panti lrinaitjanda jliaji David irri Salomón, Irael italricanaa. Corrinatsaotsa iwakje carrocani iteda naco. Panaya iáa matsiadalri iMinalri Dio irso, njite idenji narso njaji inaiki aimadan Irael lricope. ⁴ Imatsietaacawa papocope jiwaacatsa coanca iferrinaipemi iipaneta naco coca iinai piaca nerroa, icapa iicawa coanca David, Irael italricanaa icaite piaca lridananda lrico, njite njaji lrirri Salomón idanaji tsakja ⁵ Yemenawa papocotsawa iyarropoco iinai Dio iipana lrico, cayotsa iipaneta ínocapisho, catjinaa-carro tskjaotsa jia poco nakjoete njaji apapoco ikitsiñape iraelitanai inakjoité perri, neemá-carroatsa papocopewa njaji Levitanai cayoji naferrinaipemi iipaneta íno capishopia. ⁶ Íino jliaji cordero Pascua icaonada, jienitaacawa jiwacawaacatsa, imatsieta njaji cordero narso njaji ikitsiñape, inaitja cayoji wa-Minalri iaco icaite capisho Moise nakjoite. ⁷ Josia iáa narso njaji inaiki aimadan trean mil cordero, lria tsakja cabra ienipe lritañaji ofrenda icaona Pascua lrioda nacoana njaji inaki niinirri. Lria tsakja mil toro; pjiomi njaji maaficalri lriyaapecatsa jliaji talricanaati. ⁸ Njaji caconaaperri idejicape lriinai naa tsakja ofrenda nacaolre rikjoitédalri narso njaji inaiki aimadan, sacerdotenai irso, Levitanai irso. Njite Hilcia, Zacaria, njite Jehiel, njaji caaconaperri iajicape Dio iipana naco, naa tsakja narso njaji sacerdotenai ofrendawa Pascua icaonada dos mil seiciento vaken, njite treciento buey. ⁹ Conanía tsakja, Smaía njite lriwerri Natanael, Hasabía, Jeiel, njite Josabad, Levitanai iapiyawalre, lriáa levitanai irso ofrenda Pascua icaonada cinco mil vaken, njite quiniento buey. ¹⁰ Ikena namatsietacawa matsia, njite njaji sacerdotenai nemawa nema carroda lrico, cayo tsakja njaji Levitanai nayarropoco iinai nacoamitsa, njeepa capoa jliaji talricanaati inaalri nanaitjaca. ¹¹ Naino njaji cordero Pascua icaonada, njite njaji levitanai náa sacerdotenai irso nerranape njaji cordero nainoji nawitsiketa-carro altar nacó. ¹² Njite naa narsowaca njaji maaficalri namjaitaji papocope irso nacoana njaji naferrinaipe iipaneta ino caposho, náacarrona Dio irso, cayotsa Moisé idananda icaite capisho. Caitsakja nanaitjaca nasho naja toro. ¹³ Namitsirri nja cordero Pascua icaoyanaperri cayotsaji Dio inaa capisho nanaitjaca lripaperran lrico. Njite njaji maaficalri ofrenda icaitecada njenacawa namatsicana ioya Dio irso, nayanana palangana lrico, natsietashopa lrico nanee-carro kjeya narso njaji inaiki. ¹⁴ Njapodamjitena, njaji levitanai nanaitja ofrenda naikjaotewacatsa njite nanaco njaji sacerdotenai, ima njaji sacerdotenai Aarón inakjoite perri corripiatoa nanaita aima capoatoa nadejicalre, namjaitaca maaficalri, njite neeti tsakja deepitsa naicao; caishopa njaji Levitanai nanaitja ofrenda nanacotsa njite nanaco njaji sacerdotenai, Aarón inakjoiteperri. ¹⁵ Njaji icantacaperri, Asaf inakjoiteperrim, neemawa nemacawa lricotsa, cayotsa David icaitecapisho pia narso, Asaf, Heman njite Jedutun, inoparrotacaita talricanaati iirso , njite njaji iwapacaperri neemawa pantinoma icoam. Corrim namaca nadejicalre, ima njaji nakitsiñape levitanai nanaitja tsakja narsowalrepe nayadawa. ¹⁶ Niini jliawajli pia, nanaitjácarro pjiomi jliaji nadejirri Dio irso, nacadaa pjiomi njaji canacaiperri nanaitjácarro jliaji Pascua, namjaitácarro njaji maaficalri Dio irso lrialtarni naco, cayotsaji talricanaati Josia inaa capishona. ¹⁷ Pjiomi njaji iraelitanai inolri pia nirse nanaitja tsakja nainai jliaji Pascua jliawajli pia, njite nanaitja tsakja Nacatimataaca carroa nainjacawa Peetje Meewiperritsa siete jalredaoca icoa. ¹⁸ Piketem pia nanaitjaca Pascua cayoji nanaitja capisho cayoji nanaitja capisho Irael lrico profeta Samuel jiwajli pia, corrin tsakja pacapa pada talricanaati inaitjacada Pascua cayoji Josia inaitja capisho naapiya njaji sacerdotenai, levitanai, njite pjiomi njaji Judá lricope njite Iraelnai inolri pia nirse nainai, nja tsakja njaji iofacapewa Jerosalén lrico. ¹⁹ Jliaji Pascua nanaitjani diesiocho walria Josia italricanaaca lrico. ²⁰ Njapodamjitena pjiomi, Josia imtsietca cayami pjiomi templo lrico, Neco, Egipto italricanaa iáa inoacawa Carquemi ikjoete Ooni Eufrate lricojle, njite Josia iáa inoacawa Neco ikjoete. ²¹ Mitsa Neco imeenaca lrioyawalre ideecape lrmemorian Josia irso, lriaco lrirso cayoji: ''Corritsa pikjoeteca nono noinoacawa panaya, Judá italricanaa. Icaamitsa nonolrica ikjoete njaji noinoaccalri ikjoete. Diotsa jliaji inaalri nonoca, niini, meematsa Dio inaacalre ikjoete, imaa noinaicani panaya, corricadaa pjiepa njoa jliatsaotsa iwayaketa pjia.'' ²² Mitsa Josia corrin jiepani, corrin jlienaca lrioya. Niini Josia jietaacawa pada shotsa teecojlé-carro pacapani. Corrin jlimica njaji iacoti Neco icaiterri caaco cádanaco Dio lrinoma lrikjoite, icaamitsa lriaca lrinoacawa Neco ikjoete jiipai ioyawaacadalri Meguido lrico. ²³ Njaji iyawitacaperri nayawitaca jliaji talricanaati Josia, niini jliaji talricanaati iaco narso njaji lrirsoperri: ''Idee njoa ajaiteji, ima aimaca jliaji noyaoni.'' ²⁴ Niini njaji lrirsoperri naorrocoetani lrioya jliaji jlieco carrofia ioya nacadaacarroni pafia lricoenakjani. Nadeeni Jerosalén lricojle mayamirrina nirseni. Nadawani lriferrinaipemi irrirriapjirre rico. Pjiomi njaji Judánai njite Jerosalén lricoperri naoyaca Josia. ²⁵ Jeremia iya tsakja Josia; pjiomi njaji icantacaperri atsianai njite inaitjepe tsakja naiyaca Josia ikjaote atee panajiete. Jliaji nacantanialre lri-ricodadalri pia, nanaitja minicatsa njaji Iraelitanai, itaita icapaca jliaji nadanani nacantanda naiyacarropje rico. ²⁶ Njaji paana Josia inacoapanaperri, njaji lrinaitjaji matsia jliepa capoa jliaji nadananda wa-Minalri iaco kjaidaperri inaco. ²⁷ Pjiomi njaji lridejirri lriniita caojli nakjoite atee pikeetem nacojle, nadanana lri-ricoda jliaji paperra nanacoapanaperi njaji talricanaatinai Judá lricope njite Jerosalén.