¹ Josía irsopiakena ochowalria lriniita caojli lritalricanaataca; trenta uno walria lritalricanata piaca Jerosalén lrico. ² Lrinatja matsia Dio ipeyajle. Cayotsa lrinaitjaca lriferrim David inaitja capisho, corrin jlienawa Dio ioya. ³ Ima ocho walria naco lritalricanaaca lrico, yempeti cadana toani, lriniitena lriomaca lrirsowawa lriferrim David iDiote. Doce walria nacojle, Josia iniita ipiyoca Judá njite Jerosalén naoya njaji yenondalripe, naoya tsakja njaji Asera iemacarronape, pjiomi njaji njenapjiami nanaitjaji jaico sho njite nanaitjaji tsipalra sho. ⁴ Njaji inaiki aimadan napeeco njaji Baal ialtarni lricapa cadanatsa jliaji talricanaati; lrinaa nabolrontaca matsia njaji altar mamjaitacawa incienso. Lrinaa nabititaca njaji Asera iemacarronape njite njaji njenapjiampe nanaitjaji, pjiomi tsakja njaji nanaitjaji jinapjiami tsipalra sho, Natalripenatsa iofaa naoya. Lripatjaa natalripem naicaonan naco njaji imjaitacapem maaficalri nanaco. ⁵ Lrimjaita naapipem njaji sacerdotenai baalnai irsoperri nanaco njaji altar. Cayotsa Jisia ipiyo matsia Judánai njite Jerosalén lricope tsakja. ⁶ Cayo tsakja lrinaitjaca Manasenai iyacalre rico, Efraín, Simeón, njite Nestalí tsakja, njite pjiomi nanaco njaji naofacawapem pia nawaida naco. ⁷ Josia ipeeco pjiomi njaji altar imaimaca, lripeeco njewao njaji Asera iemacarronape, nja tsakja njaji njenapjiami nanaitjaji, icaamitsa iofalrica naoya natalripenatsa, lripeeco pjiomi njaji altar namjaita carrona naco incienso pjiomi Iraelnai jipaite rico; Njitena lridiawa Jerosalén lricojle. ⁸ Njite Die walria talricanaati caamini, lritaita cayamina lripiyoca matsia njepaite njite templo tsakja, lrimeenaca Safán, Azalía irri, Manase irso tsakja, jliaji iwapacada yacaalre, njite Joa irso, Joacaz irri jliaji idanacaita, namatsietá-carro matsicawape na-Minalri Dio iipana. ⁹ Naawa Hilcia ikjaolre, jliaji sacerdotenai iapiyawalri, njite náa lrirso njaji palraata nadeji Dio iipana lricojle, Levitanai njite njaji iwapacaperri pantinoma iwaketalri nainai tjaji Manasénai, njite Efraín, Iraelnai itepem ioya tsakja, Judánai ioya, Benjamín poco ioya njite naoya njaji inaiki aimadan Jerosalén lricoperri. ¹⁰ Nacadaa nja palraata narso njaji atsianai iwapacape icapa njaji üidejicape Dio iipana lrico. Njeena njaji atsianai nacaoña njaji idejicaperri namatsietá-carro pjiomi coancawapeca maatsi lri-ricoda jliaji panti macade. ¹¹ Nacaoña carrapinanai ianjicape inaitjaca panti nawenta-carro jiipada nayoaji matsia, nawenta shopa tsakja jaico nemeta shopa, nanaitjá-carro tsakja panti-ipje nacadaalri jiwawa njaji padapena talricanaatinai Judá lricope. ¹² Njaji atsianai nanaitja njaji idejikjeti matsiatsa. Njaji icapacepe naicawa Jahat njite Abdia, Levitanai, Merari ienipenaipe inakjoite perri; Mesulam njite Zacaria, Coat ienipe nakjoite perri. Paana tsakja Levitanai matsiaperri itoocaca, atsa neema nainai njaji idejicaperri. ¹³ Icatsa njaji levitanai iajirrica nanaco njaji atsianai jiwajicape nadejishopa jliaji panti, mitsa najíi tsakja nanaco pjiomi njaji idejicaperri coancawaca nadeji. Njaji Levitanai, padape nanakjoite nini idanacape, iwapacada njaji idejicaperri njite padape iwapacape pantinoma. ¹⁴ Nadee cádanaco njaji palraata naderri pia Dio iipana lricojle, Hilcías, sacerdotenai iapiyawalri iketaca jliaji Paperra pacapacawa njaji iacoti Kjaida perri wa-Minalri icadanda pia narso Moisé inakjoite. ¹⁵ Niini Hilcías iaco Safán irso jliaji idanacaita: ''Nooketaca jliaji Paperra pacapacawa njaji iacoti Kjaida perri wa-Minalri iipana lrico.'' Niini Hilcías iaca jliaji Paperra Safán irso. ¹⁶ Njite Safán idee jliaji Paperra talricanaati irson, njite lricaite pja lrirso nanaco njaji idejicaperri, cayoji: '' Njaji pirsoperri nadejintsa pjiomi cayoji picadaa capisho nadejicarro. ¹⁷ Nawaketa pjiomi njaji palraata naoketaji Dio iipana lrico, njite nacadaa nacaapi rico njaji iwapacape icapa njaji idejicape njite narso tsakja njaji idejicaperri.'' ¹⁸ Njite Safán, idanacaita iaco tsakja talricanaati irso: ''Jliaji sacerdote Hilcías lricadaa norso pada Paperra.'' Niini Safán ileecani talricanaati irson. ¹⁹ Niini talricanaati jimi cádanaco njaji iacoti kjaidaperri naco, lritsafaa lritsayani. ²⁰ Niini jliaji talricanaati inaaca jliaji sacerdote Hicías, Ahicam irso, Safán irri, Abdó, Micaías irri, Safán, jliaji idanacaita, njite lrirso jliaji talricanaati irsodalri Asaía, lriaco narso cayoji: ²¹ ''Warsa iáwa itatjá carro jimio Dio iinai noikjaote, njite nanaco njaji neetepem Irael lricope njite Judá lrico, wanjíi carro nanaco njaji iacoti lri-ricodape jliaji paperra waoketanda. Ima oopica wakerroata jliaji wa-Minalri wakjoete. Matsinaadalrica lriirroa jliaji wa-Minalri, ima njaji waferrinaipemi corrin njemica njaji iacoti lricaiterri jliaji paperra, neepa cantja njaji iacoti nadanalri lri-ricoda''. ²² Niini jliaji sacerdote Hilcías, njite njaji talricanaati imenacaji naacarroa, naawa Hulda ikjaolre, rsoaji inoparrotacada, Salum iino, Ticva irri, Harhas irri, jliaji iwapacada nacadacawa tsaya, rofaa piawa walricoe cawa nanaitjaca Jerosalén lrico, ikena caacocana roapiya lrinaco jliaji naalri ikjaote. ²³ Niini roaco narso: ''Cayo lricaiteca jliaji wa-Minalri, na Diote njaji Iraelnai, picaiteotsa lrirso jliaji atsia imeenacalri jia noderse, ²⁴ cayo wa-Minalri icaiteca: ''Wadepena nodeeca maatsidalri lrinaco jliaji jiipai, njite nanaco njaji lrinaikitena, pjiomi njaji maatsirri nadanaji lri-ricoda jliaji paperra nalrerri talricanaati Judá lricoda ipeyajle. ²⁵ Ima namacaca njoa njite namjaita tsakja incienso narso njaji idolonai, nakerroataca njoa nasho njaji maatsirri nanaitjalri nasho njaji nanaitjalri. Niini opica nakerroata njoa naikjaolrewa naofacawa lrico, njite corriotsa yaami carroca njoa noirroa ioya.'' ²⁶ Mitsa lrirso jliaji Judá italricanaa, jliaji imeenacalri jia ajerreji lritatjá carro jlimio cocaca lrirsotsa lrinaitjaca Dio irso, icaiteotsa lrirso cayoji: ''Jliaji wa-Minalri, na Diote njaji Iraelnai, cayo lricaiteca nanaco njaji iacoti pjimirri ianaco, ²⁷ Corri capoa padalre pjia picaolre rico, pianjiaca capoa corricatsa coca pjia Dio ipeyajle, pjimi cádanaco njaji jliaji Iacoti lrikjioete jliaji jiipai njite njaji lrinaiki, njite piajii capoa corricatsa coca pjia Dio ikjoete, njite pitsafaa pitsayani coyolre capoa pjia, njite pjiemata Noikjaolre caiwi-ricotsa, niini Njomica pirso; niini ikatsa wa-Minalri icaiteca cayoji. ²⁸ Nocadaotsa pioketaaca carroatsa nainai njaji piferrinaipemi. Mayamiotsa pjia imawadacakjeti rico, corriotsa picapá carroca njaji maatsirri noderriotsa lrinacojle jliaji jiipai, njite nanaco njaji lrinaikitena.'' Icaamitsa nadiacawa talricanaati iderse. ²⁹ Njite jliaji talricanaati, lrimeenaca inaiki ideecape iacoti narso njaji pekipenai caconaaperri Judá lricope njite Jerosalén nawacaacacarrowa. ³⁰ Njite jliaji talricanaati iawa Dio iipana lricojle, naa tsakja lriinai njai atsianai Judá lricope njite Jerosalén lricope tsakja iawa lriinai; nja tsacja njaji sacerdotenai, levitanai, pjiomi njaji inaiki pekipenai, tsooperri tsakja. Ikena lrileeca narso jliaji Paperra naoketanda Dio iipana lrico coanca nacaiteca njaji iacoti Lriacoam nacope naapiya. ³¹ Ikena talricanaati jinicoca iemawa lriema carrojitsa njite lrinaitja pada iacoti Dio ipeyajle, lricaitecawa Dio irso, lrinaitja caotsa cayoji Dio iaco icaite capisho, Lriaco inaalri panaitjaca, njite njaji iacoti icaitecape coan carro paofacawa matsia lricaolre rikjoite, njite pjiomi lricafica sho, jliepa-carro njaji iacoti Dio iacoam nadananda lri ricoda jliaji Paperra. ³² Talricanaati inaa tsakja njaji inaiki Jerosalén lricope njite Benjamín lricope tsakja njeepá-carro nainai jliaji iacoti Dio iacoam naco. Njaji inaiki Jerosalén lricope nanaitja cayoji lricaite capisho jliaji Dio iacoam, naferrinaipemi iDiote. ³³ Josia ipeeco pjiomi njaji dofenaperrimi Irael jipaite lricoperri ioya. Lricadaa naacarro matsiadari na-Minalri Dio irso pjiomi njaji inaiki. Caafi cádanacotoani, corrin yamicana na-Minalri Dio ioya, naferrinaipemi iDiote.