¹ Trenta sei walria naco Asa italricanaaca lrico, Baasa, Irael italricanaa, iema maatsicalri rico Juda ikjoete, niini Baasa inaitja Ramá, lridaanatá carro njaji inaiki wadee namotocawa o njewaca Judá lrico, talricanaati Asa iyacalre. ² Njite Asa jipa iniwa pjiomi njaji palrata, owirro namatsietacawa lrico Dio iipana lricope, njite talricanaati dapana lrico tsacja, njite lrimeenaca Ben Adad irso, Aram italricanaa, iofaacada Damasco lrico, lrimeenaca iacoti lrirso cayoji: ³ ''Warsa wanaitja pada yacoti warsowaaca, cayoji njonirri irso capisho pia pjinirri iapiya. Nomeenaca pirso palrata, owirro tsakja. Ajena pirsoca iacoti Baasa iapiya, Irael italricanaa, lricadaa carro nofáa nomaodaca tsa.'' ⁴ Ben Adad jimi lrirso jliaji talricanaati Asa, niini lrimeenaca njaji lritsolrodao icomandantenai nainoacá carro nakjoete njaji yacaalre Irael ricope. Nainoaca nacjoete njaji inaiki iofaacape Ijón rico, Dan rico, Bet Main ricope, njite pjiomi njaji yacaalre namatsietacawa lrico nanaani njepaite rico njaji Neftalí poco. ⁵ Niini Baasa jimi cádanaco coanca, yaami lrinaitjaca Ramá, Icaamitsa lriyamitaca jliaji idenjikjeti. ⁶ Njite jliaji talricanaati Asa iinai pjiomi njaji Judánai. Niini njewajica pemajle njaji jiipada, jaico tsacja Ramá lricjoite Baasa inaa shopam nanaitjaca jliaji yacaalre Ramá. Nasho njaji lrinaitja shopamtja jliaji yacaalre Ramá, Asa inaa nanaitjaca njaji yacaalre Geba njite Mizpa tsacja. ⁷ Jliawajli, jliaji inoparrotacada Hanani iawa Asa iderse, Judá italricanaa, njite lriaco lrirso: ''Coada picadaa pja picaolre Aram italricanaa naco, corricantja picadaa picaolre pi-Minalri Dio naco. Corritsa pitaitá carroca pjia cantja ianjí nanaco njaji Aram italricanaa itsolrodaoperre naco. ⁸ ¿Corri pianji aimadan pjapiaca njaji tsolrodaonai Etiopia njite Libia lricopepia, aima pja pia narsoca carrofiape, njite njaji atsianai jiecocapewa caballo naco? Njite picadaa capoa picaolre Dio naco, Lricadaa pjiamá carrona. ⁹ Wa-Minalri icapa pjiomi njaji jiyapalriwa jalredaoca lrico, njite lrikitsindata jlíida sho njaji inaitjacape cayoji lrioma capisho. Mitsa pjia, pjiwacatsa icapacawa aji. Niini panaya nakjoite, caidalritsaotsa pirsoca oowicalri.'' ¹⁰ Njite kerroaca Asa inoparrotacada ikjoete; jlietani presodapana lrico, ima kerroacani lriapiya pjiomi ikjaotetsa. Jliapodamtsa, Asa icadaa nadenji kjaida njaji padapena inaiki lriyacalre ricope. ¹¹ Njaji Asa inaitjaji lriinita, njite njaji lrinaitjaji pikeetem, paoketacana nadananda lrico lrirricoda jliaji paperra nadana cawa nanaco njaji talricanaatinai Judá lricopenjite Irael tsakja. ¹² Trenta noeve walria Asa italricanaaca naco, pada irrenati matsinaadalri jipa jliipa naco, njite cayo cadaanatsan, corrin lritatja Dio iinai lrikitsindatá carroni, icaamitsa lriomaca njaji atsianai itapecape. ¹³ Mayami Asa lriferrinaipe iinai; mayamini cuarenta uno walria lritalricanaaca naco. ¹⁴ Nadawani lrirricodatsa jliaji irrirri lrinaitjandatsa lrirsowao David iyacalre ricó. Njetani lriarrona lrico ketandalri pootiyaperri sho, aima pomeniajao tsakja nanaitjaji njaji ianjicapenatsa inaitjaca pomeniajaipe. Nawaca tsakja tiyee pekirridalri liipitana naco.