¹ Dio icaolrini ino Asaria naco, Obed irri. ² Asaria iawa lrioketaaca carro Asa iapiya, njite lriaco lrirso: ''Panaya pjia, Asa, pjiomi Judá njite Benjamín tsakja, jimi norso: Piinai catsa jliaji wa-Minalri, corri capoa pimacani. Pioma cadaotsani, piinai catsaotsani; mitsa pimaca cadaani, lrimaca tsakjaotsa pjia. ³ Aima jalredaoca naco, njaji Iraelnai corri pia njeepa Dio iaco, corrin narsoca pada sacerdote icanantacaodana, corrin narsoca iacoti ianjicada nanaco. ⁴ Mitsa, aima capoa njerrapitaca, njite nadia naoma Dio, na-Diote njaji Iraelnai, naoma capoani, oopi tsenakja naoketani. ⁵ Jliawajli pia, corri piatsa lrimaodacaca jliaji ianjicadawa, corrin tsakja lrimaodacaca jliaji inolri lriocá carro ajerreji; icaamitsa aima narsoca maatsicalri njaji jalredaoca lricoperri. ⁶ Pacoa jiipai nacope, njite naji pacoa yacaalre lricope njaama piacana, ima Dio icadaa piaca njerrapita pjiomi jirrapita kjeti sho. ⁷ Ikjaidatakeenawa, macadatsa mjaidaca nja inaapa, ima cacoada caotsa pjiomi njaji pinaitjalri. ⁸ Asa jimi cádanaco njaji iacoti, inoparrotacaita Obed inoparrotanda, lrikjaidatacawa njite lripeeco pjiomi njaji mapeyocanaaperritsa pacapaca pjiomi Judá lrico njite Benjamín lrico tsakja, njite naoya tsakja njaji yacaalre jlitanipe lrirsowao oowi rico awacada Efraín lricope, njite lrinaitja altar Dio irso, jliaji iemalri lritsipenapji icoemjete Dio iipana irso. ⁹ Lriwaketa pjiomi njaji Judánai, Benjamínai, njite nanacope njaji iofalri nainai Efraín inakjoite perri, Manases njite Simeón tsakja. Ima nano piaca Irael lrikjoite aimadan Asa ikjaolre, nacapa cádanaco wa-Minalri Dio ikitsindatani. ¹⁰ Niini nawacaacawa Jerosalén lrico madalripi naco, quince walria naco Asa italricanaaca naco. ¹¹ Jliada pia naino maaficalri Dio irso nanakjoite njaji maaficalri njetaji naoya njaji nadeeji paana ioya: naino seteciento buey, njite siete mil oveja njite cabra tsakja. ¹² Nanaitja narsowaaca pada iacoti naoma carro pja narsowao Dio, naDiote njaji naferrinaipemi, naoma carroni nacaolre rikjoite njite nacafica sho tsakja. ¹³ Pacoaca pia nawaopiakje nacaitecawa narsowaaca, lrirsocatsa mayamica jliaji corridalri ioma lrirsowawa Dio, na Diote njaji Iraelnai, nacaite corricatsa coadaca tsodalri cadaa o macani cada jliaji inaiki, o atsia cada o iinarro cadaa. ¹⁴ Nacaite iacoti ajadalri sho njemí werrico pjiomi, nawana kjaida, njite napjia tsakja trompeta njite vaaca itsowam. ¹⁵ Catiima pjiomi njaji Judánai lrikjaotejliaji iacoti ajádalri nanaitjalri, ima nacaite ajádalri sho nacaolre rikjoite, njite naoma Dio matsia, njite Dio icadaa naoketacani. Wa-Minalri icadaa narso imaodaca kjeti pjiomi nawaida naco. ¹⁶ Lriyaamita tsakja jlirroitami Maaca lricadaa cawa piano talricanaati carrono lriinai, ronaitja capoa rsonapjiami sroaji mapeyo canaadarro Asera, Asa iyaamita jinapjiami mapeyo canaadarro, lriwititano njite lrimjaitano onipaokja Cedron dalri rico. ¹⁷ Mitsa corrin njetaca njaji yenondalripe Irael lrikjoite, mitsa Asa icaolre lricadaani Dio irso caafi cádanaconi. ¹⁸ Lridee Dio iipana lricojle njaji jlinirri iyarroaji, njite njaji lrirsompe Dio iyaarrotsa: owirroitape njite palrataitape tskja. ¹⁹ Corri pienatsa paca owicalri trenta cinco walria naco Asa italricanaaca naco.