¹ Roboam iawa Siquem ricojle, ima pjiomi njaji Iraelnai naaca Siquem ricojle nakeepitanatá carro nirse natalricanaawa. ² Mitsa Jeroboam, Nabat irrí jimi cádanaco cayo cana Egipto lricjoite, ima nirse catoani, lripitolri nirse talricanaati Salomón ioya, mitsa Jeroboam idiawa Egipto lrikjoite. ³ Niini njaji iwacaaca cápewa nameenaca iacoti Jeroboam irso lrinó carro naderse, niini naaco Roboam irso njaji inaiki: ⁴ ''Jliaji pjinirri icadaa aima calretsa wadenjicalreo nini picadaa tsoo carro pjatsa wadenjica lrioya jliaji pjinirri icadaalri warso njite wadenjicaotsa pirso cayo cadaa pinaitjaca warso.'' ⁵ Niini Roboam iaco narso: ''Madalridaa nacoatsa iino tsenacja noderse.'' Njite njaji inaiki nadiaca toa lrioya. ⁶ Niini jliaji talricanaati Roboam itatja jimio nainai njaji caconaaperri pequipenai idenjicapemi jlinirri Salomón ipeyajle caafi cádanacotoani, lriaco narso: ''Coanje icaiteca njoa njoepacaotsa njaji inaiki? ⁷ Njite naaco lrirso: ''Ajadalri cadantja piomaca pidenjica narso njaji inaiki panaya, njite picaite narso iacoti matsiadalri, niinintja pirsoperricantjana caidalritsana.'' ⁸ Mitsa corrim Roboam jiepa naaco njaji poekipenai, ima lrikenacja lritatja lrimio nainai njaji iempetipe lritaoñacaweenai, neema lripeyajle. ⁹ Lriaco narso: ''¿Coan icaiteca njoa njoepaca njaji inaiki icaitecape norso, naomaca noinai tsoo carro pjatsa nadenjica lrioya jliaji njonirri icadalri nadenjica?'' ¹⁰ Niini njaji iempetipe toa Roboam itaoñacawenai naaco lrirso: ''Picaite narso njaji inaiki icaitecape pjinirri Salomón icadaaca nadenjicalreo jamiñádalri, njite naoma picadaaca tamomi carro pjatsa jliaji idenjikjeti jamiñadalri. Picaitentja narso cayoji: Cotsa cocaca jliaji njonirri icadaalri irso lrioya jliaji nocadalriotsa irso. ¹¹ Niini panaya, jamiña cadanena ianji lriaji idenjikjeti njonirri icadalri irso, nocada pjatoatsa jlimiñaca irso nanaco, njonirri jirrapiteta piaca jia capee sho, mitsa njoa njorrapiteeta caotsa jia yalree sho.'' ¹² Niini Jeroboam njite pjiomi njaji inaiki aimadan nawacaacawa Roboam iderse madalridaa naco, cayotsa lricaite capisho narso, nanó carro lriderse madalridaa jalredaoca nacó. ¹³ Ninina caacoca Roboam narso kjaida sho, corrin jliepa naaco njaji pekipenai. ¹⁴ Lricaite narso naacoarrom njaji iempetipe toa, lriaco narso: ''Njonirri icadaa pia idenjicalre jamiñádalri, mitsa njoa nocadaa pjatoatsa idenjicalre lrinaco pja. Njonirri jirrapiteta piaca jia capee sho, mitsa njoa njorrapiteeta caotsa jia yalree sho.'' ¹⁵ Corri talricanaati jimica narso njaji inaiki aimafdan, ima jorreca njaji jiyapalrio nanacowaaca cayotsa wa Minalri icadaa capisho, lrimotó carrotsa cayoji Lricaite capisho Jeroboam irso, Nabat irrí Ahias silonita inoma lricjoite. ¹⁶ Nacapa cádanaco njaji Iraelnai corrica talricanaati jiepana, naaco lrirso: ''¡Corriotsa waa carroca nainai njaji David inacjoite perri! ¡Corriotsa wanjíi carroca lrinaco jliaji Isai irrí! Warsa wadiawa waapana lricojle, Iraelnai. Panaya pjia, David inacjoite dalri, picapa pjiwaacatsa jliaji pitalricanaaca naapiya njaji pikitsiñape. Cayotsa nadiacawa njaji Iraelnai naapana lricojle. ¹⁷ Mitsa njaji Iraelitanai iofaacape nerricoda njaji yacaalre Judá jipaite ricope, icatsa Roboam italricanaataca nanaco. ¹⁸ Njitedalri talricanaati Roboam imeenaca Adoram, jliaji ianjirri nanaco njaji idenjikjeti jamiñaperri, mitsa njaji Iraelitanai njepa nainon jiipada sho. Njite jliaji talricanaati Roboam jlirra kjeyao lricaballon naco irsocada carreta lriá carro Jerosalén ricojle. ¹⁹ Cayotsa Iraelnai iemaca David iipaneta ikjoete atee panajiete.