¹ Salomón, David irri, lrikjaidatacawa lritalricanaaca lrico njite lriinaicatsa lriMinalri Dio njite lricadaa kjaidacani. ² Caacoca Salomón narso pjiomi njaji Iraelnai, narso tsakja njaji comandantenai irsocape mil njite irsocape cien tsolrodaonai, narso njaji icaite cape nanaco, narso tsakja njaji caconaperri iempetipe toa Irael lricope, njite narso njaji njanirrinaipemi iipaneta tskja. ³ Niini Salomón, njite njaji iwacaaca caperri lriinai naawa lrinaco jliaji yenondalri Gabaón lrico, ima nirseca jliaji panti nawacaaca cawa Dio ipeyajle lrinaitjanda toa jliaji Dio irsodalri Moise jalrapocolri rico. ⁴ Mitsa David ideepiaca jliaji Dio ipatowan Quiriat Jearim lricojle, ima David inaitja piaca panti lriicaona Jerosalén lrico. ⁵ Lrinaa tsakja Bezalel, uri irri, Hur irri inaitjaca apana altar bronce sho, njite lricadaa lriemawa nawacaaca cawa Dio njaji inaiki Dio ipeyajle, niini Salomón njite njaji inaiki aimadan natsoomita niini. ⁶ Salomón itsoomita jliaji altar broncepe nacadanda nawacaaca cawa lrico, lriema carro Dio ipeyajle,njite lria ofrenda lrimjaitaji lrinaco. ⁷ Njite Dio icañjatacawa Salomón irso jliajda deepi, lriaco lrirso: ''Pitatjena noinai cocacatsa pioma Noaca pirso.'' ⁸ Njite Salomón iaco Dio irso: ''Ajadalri corrin pimacaca piacoami pinaitjanda njonirri David iapiya, ima picadaaca talricanaati carro njoa jliapodam. ⁹ Niini panaya, pjia no-Minalri Dio, pinaitjaotsa cayoji piacoam sho picaiterri pia njonirri David irso, ima picadaaca talricanaati carro njoa nanaco njaji inaiki aimadan. ¹⁰ Pia watsa norso ianjikjeti, iyeecati noanjíi carro coancaotsa nodeeca matsia njaji inaiki, ima ¿Coajintja notaita nodeeca matsia njaji inaiki aimadan, corri perrinatsa pataita paniweetaca? ¹¹ Niini Dio iaco Salomón irso: ''Cayo capoa piwaopiakje picaolre rico njite corri capoa pitatja pirsowao cacoadaperri, inaaniti, caconaa carro pjia, njite corri capoa pitatja noinai noinó carro pioya njaji pjipondape, corrin tsakja pitatja jalripa carro picafica jalredaoca lrico; mitsa pitatja pirsowao ianjikjeti, iyecati pitaitá carro pideeca matsia njaji ianaiki aimadan, nocadaalri inaco talricanaati carro pjia, cayoatsa Nonaitjaca pirso. ¹² Panaya nocadaaca pirso ianjikjeti njite iyecati. No'a tsakja pirso aima palraata, inaaniti, piaconawa tsakja. Corrin pacapa pada talricanaati pipjeyape, corrin tsakja pjiapodamperri irsocape njaji nocadaalri pirso.'' ¹³ Ikaamitsa Salomón idiacawa Jerosalén lricojle lrinakjoite jiaji yenondalri Gabaón lricoda, lrioya jliaji panti nawacaaca cawa Dio ipeyajle. Njite lritalricanaataca Irael naco. ¹⁴ Salomón iwaketa aima carrofiape njite jiecocaope nanaco, lrirso pia mil coatrociento carrofiape caballo nacope, njite mil inaiki jieco cape nanaco, njaji lricadaalri pacoa lrico yacaalre njite lriinaitsa nja paana, talricanaati iinai Jerosalén lrico. ¹⁵ Jliaji talricanaati lricadaa aima palraata, owirro tsakja Jerosalén lrico, njaji inaiki nacapacana pacapacaji jiipada, cedrona, pacapacaji njaji jaico sicómoro iemalriwa lripé rico. ¹⁶ Salomón idee pia nja caballo Egipto lrikjoite njite Coa lrikjoite tsakja. Ima njaji comerciantenai caconaaperri nirse mana naa nawenta. ¹⁷ Nadee Egipto lrikjoite nja carrofiape seiciento palraatape icoada, njite ciento cincuenta palraatape apana aballo icoada. Njaji nawentaji nadia nawendee narso njaji talricanaatinai hitita lricope njite narso njaji amorreonai.