¹ Madalriwalria oonia jiyapawa corricawatsa Irael inaitja oowi Aram icjoete. ² Njite madalri walria oonia jiapodam, Josafat, Judá italricanaa iáa icapa Irael italricanaa iderse. ³ Njite jliaji talricanaati Irael ricoda iaco lrirsoperri irso: ''¿Capja ianjíi wayadaca jliaji Ramot Galaat ricoda, mitsa faa corri coca wanaitja fetá carro lrioya jlaiji talricanaati Aram ricoda?'' ⁴ Niini lriaco Josafat irso: ''Capaotsa pinoca noinai oowi rico Ramot Galaat ricoda lricojle?'' njite Josafat jiepani: ''Pjia capishotsa njoa, njaji nonaikite pinaikitecana shocatsana, njaji no caballon caitsacjana piyaape capishotsana.'' ⁵ Niini Josafat iaco pja lrirso jliaji talricanaati Irael ricoda: ''Pinaitja matsiacalri pitatja wa Minalri iinai lricaité carro pirso cocaca jliaji pirsolritsa piinita pinaitjca.'' ⁶ Niini Irael italricanaa iwakeeta cuatrociento atsianai inoparrotacape, lriaco narso: ''Icaite njomi, ¿Capja matsiatsa noaca oowipeca njoa Ramot Galaat ricoda lricojle?'' Njite naaco lrirso: Piena pinaitja oowi nacjoete, ima wa Minalri icadaacaotsa poicaapi ricon, pjia talricanaati.'' ⁷ Njite Josafat jiepani, lriaco: ''¿Corrinatsa pacapa anji pada pja inoparrotacada wa Minalri irsodalri watatjaoda femí carro pja waicao?'' ⁸ Nini Irael itarlianaa lriaco lriepaca Josafat: ''Niini toa pada atsia watatjá carro wa Minalri iinai lrikitsindatá carro fa, lriipitana Micaia, Imla irrí, mitsa maatsi nocapaca lrirso ima corritsa coancadanaco-ca lrinoparrotá nonaco matsia, icaamitsa lricaiteca iñaakjeti naco.'' Nini Josafat iaco lrirso wadee caacoca cayo jliaji talricanaati. ⁹ Njité dalri jliaji talricanaati Irael ricoda iwana pada caconaite lrinaa carro, lriacarro lriwana Micaia, Imla irri lricjaolre. ¹⁰ Cayocadanatoa Acab, Irael Italricanaa njite Josafat, Judá italricanaa naofaa catoa nacoana naofaa carroda naco caconaadalri. Natsayan caacona carroda lricona, njite pantinomajle, pjeewá carro Samaria lrico neemao njaji iniparrotacaperri nanoparrotaca napeyajle njaji talricanaatinai. ¹¹ Njite Sedequia, Quenana irrí inaitja lritsowao tsípalra sho, njite lriaco: ''Cayo wa Minalri icaiteca: ''Nasho njaji, itodacaotsa njaji arameonai a kjerrecatsa iwayakeetana.'' ¹² Njite pjiomi njaji inoparrotacape nacaite tsacja cayo: ''Iáa iino njajji Ramot ricope Galaad ricoda ima jiameeta caotsana, ima wa Minalri icadaacana talricanaati icaapi ricona.'' ¹³ Njite jliaji ideecada iacoti Micaia irso, iaco lrirso cayoji: ''Picapakjee, pjiome njaji inoparrotacaperri nacaite iacoti matsiaperri pacoacatsa wa talricanaa irso. Pinaitja matsiacalri picaite tsacja iacoti matsiaperri cayotsa nacayosho.'' ¹⁴ Mitsa Micaia icaite cayoji: ''Ajádalrica caafidalricatsa jliaji wa Minalri, coca cadaa no Minalri icadaa nocaite carro icatsaotsa njaji nocaiterrica.'' ¹⁵ Njite Micaia ioca cádanaco talricanaati ipjeya, talricanaati iaco lrirso: ''¿Micaia, capja warsotsa waaca oowi rico Ramot ricojle Galaad ricoda o corrim?'' Njite Micaia jiepani, lriaco: ''Pia piinoacawa panaya, ima wa Minalri icada picaapi ricona.'' ¹⁶ Njite talricanaati iaco lrirso: ''Caidalri manatsa nocaiteca pirso picaité carro norso iacoti ajádalri sho wa Minalri iipitana nacó.'' ¹⁷ Niini Micaia iaco jiepacan: ''Nocapa pjiomi njaji Iraelnai macada nanjicawa awacadalrico, cayoji oveja maminalripem sho, njite wa Minalri iaco cayoji: ''Njaji, corritsa narsoenca iwapacadana. Warsa wacadaa nadiá carro naapana lricojle matsiatsa.'' ¹⁸ Nini jliaji Irael italricanaa iaco Josafat irso: ''Nocaite capa pjia, corritsa lricaité carroca nonaco iacoti mtsiadalri, icaamitsa iacoti maatsí perri.'' Ikeena Micaia icaite paaca, lriaco: '' ¹⁹ Pjimica njaji iacoti Dio icadaalri pisowalrepe: Nocapa wa Minalri iofacawa lriofa carroda naco, njite pjiomi njaji inoaca cápewa lrirsoperri neemacawa Lripeyajle lriyekema nacó njite lripatolriema naco tsacja. ²⁰ Nini lriaco jliaji wa Minalri: ¿''Coca itaita iacawa lrimanalrietá carro Acab iwaopiakje, lriá carro lrinoacawa Ramot Galaad ricoda icjoete nainó carro nirsen? Niini nja paana nacaite pada iacoti, njite nja papoco nacaite tsacja teecojle ²¹ Cayo cádamaco, pada caolriti ino iemao wa Minalri ipeyajle, lriaco cayoji: ''Njoa watsa imanalrieta lriwaopiakje.'' Njite wa Minalri iaco lrirso: ¿''Coanjeotsa pinaitjacan?'' ²² Nini jliaji caolriti jiepani: ''Caolriti cashadalrimca njoa, nini noawatsa nocadaa carroatsa namotoetaca ishaatitsa nanoma lricjoite njaji inoparrotacape lrirso. Njite wa Minalri jiepani: Pjia pedaotsa icadaa jliepaca ishaati, njite matsia caotsa lrimotoca pirso lrinaco jliaji pialriotsa pinaitja. Warsena pia pianitja jliaji picaiterri. ²³ Nini Panaya, wa Minalri icadaa pada caolriti cashaadalrim nacaite carro ishaatitsa njaji inoparrotacape pirso, njite wa Minalri icaite corricatsa matsiá carroca pjia.'' ²⁴ Nini Sedequi, Quenana irrí jinico iñaa Micaia icacoda naco, njite lriaco lrirso: ''¿Coandalri ricocja inipo lriawa jliaji Caolriti wa Minalri iyada lricadaa carro njoa caicarro caaco kenacja pirso?'' ²⁵ Njite Micaia jiepani: Enaotsa pianjíi jliadaotsa jalredaocaca pianji cádanacoenaotsa pjiewajiwa panticoam pianji capoa pioma pidawaca carrodao. ²⁶ Njite jliaji talricanaati Irael ricoda iaco narso njaji lrirsoperri: ''Jipa idee Micaia Amón iderse, jliaji yacaalre talricana, njite lriderse tsacja jliaji nirrí Joás, iempeti caaconaite. ²⁷ Icaite lrirso nonacjoite, cai lriaco jliaji talricanaati: Ipresota jliaji atsia njite jatjamitsaotsa iaca lrinjao, lriirrao tsacja a kjerrecaotsa nodia nocao matsiatsao.'' ²⁸ Njite Micaia icaite: ''Pidia cadaotsa matsiatsao, noanji pedaotsa corricatsa wa Minalrica jliaji caacolri norso ²⁹ Nini Acab, Irael italricanaa njite Josafat, Judá italricanaa, naawa Ramot Galaad ricoda icjaolre. ³⁰ Jliaji Irael italricanaa iaco Josafat irso: ''Noawatsa noinoacawa nainai, mitsa njotaotsa nooya notsayan talricanaati carroda njoa wadee naanjica njoa, mitsa pjia talricanaati sho catsaotsa pjietacawa.'' Cayotsa lrinaitjaca jliaji Irael italricanaa lriá carro lriinoacawa oowi ricó nainai. ³¹ Njite jliaji talricanaati Aram lricaite narso njaji trenta y do lricapitamanai jiecojicape caballo naco, irso cape carreta njapoda, wadee nainoca njaji coamperri catsa tsolrodaonai, icaamitsa lrinaa nainó carro jliaji talricanaati Irael ricoda. ³² Nini njaji capitamanai nacapa cádanaco Josafat iemacao njeeco lriicjaolre nainó carron nawada capoa jliaca Irael italricanaa. Mitsa Josafat jiemataca cjaida. ³³ Njite nacapa cádanaco njaji capitamanai corrica jliaca Irael italricanaa, nadia lrioya. ³⁴ Mitsa pada atsia iyawitaá macadatsa niini lriyawitaca jliaji Irael italricanaa lritsayan taimi dalri ipecolricotsa. Nini Acab iaco lrirso jliaji ideecada lriapiya, lridieta carroni nainoacalriwa njite ima nayawitacani matsinaa. ³⁵ Matsinaa nainoacacawa oowi rico jliadaa jeecoapi njite jliaji talricanaati Joab lriemacatsao lri carretan lrico nacjoete njaji arameonai. Mitsa jliadatsa dainoma mayamini. Corri pia yaami lrirrana imotocao lriyaoni ricjoiote niini lriarrocawa lricarretan iwawalrico. ³⁶ Njite tsomikena deepi carro naicao, cjaida nawanaca njaji tsolrodao Iraelitanai, naaco: ''Idienawa icoanaa iyacalre ricojle; jipaite ricojle.'' ³⁷ Cayotsa mayamica jliaji talricanaati Acab njite nadeecani samaria lricojle, nirsetsa nadawani. ³⁸ Nacotso lricarretanim nadanatanda rico ooni Samaria lrico, napitacawa lrico tsacja njaji inaitjepe ianjiicape idakitaacawa macadatsa, njite njaji tsiino naperroca lrirranam, cayotsa jliyapacao wa Minalri icaite capisho lrinaco. ³⁹ Njite njaji Acab inacoapana, pjiomi njaji lrinaitjalri, jliaji panti marfil dapana lrinaitjanda, njite nja yacaalre lrinaitjaji nadana paperra lrico nanacoapana lricoda njaji talricanaatinai Irael ricope. ⁴⁰ Cayotsa mayamica Acab njite nadawani nacodapitsa njaji lripjeyadampe pia, njite lrirri Ocozia italricanaata jliapodam. ⁴¹ Njite cadaa Judá lrico, Asa irri Josafat inita pia italricanaataca niini, cuatro oonia caamina talricanaatica lripjeya jliaji talricanaati Acab Irael ricó. ⁴² Lrirso piakena trenta cinco oonia lripekirrica naco jliaji Josafat lriniita caojli pia lritalricanaataca. Lritalricanaata venticinco oonia Jerusalén ricó. Azuba pia jlidoa iipigtana, Silhi iito ⁴³ Josafat inaitja matsia cayotsa jlinirri Asa sho pia, lrinaitja matsia wa Minalri icapa. Mitsa corri lripeecoca njaji yenondaripe, nainocawa lrico maaficalri njite namjaitacawa lrico tsacja incienso idolonai irso. ⁴⁴ Corri pia Josafat inoacawa Irael italricanaa icjoete. ⁴⁵ Njite njaji Josafat inaitjaji inacoapana, jliida nacapanda lrinaco njite coanpiaca jlinaitjaca oowi nada nerroa paperra lrico nadana cawa nanacoapana njaji talricanaatinai Judá lricope. ⁴⁶ Lripeeco nawa jlipaite ioya njaji inaiki inaitjacape macadatsa nadaki sho naashopa matsiadalri idolo irso, njaji inaiki aperri piatoa jlinirri Asa caojli pia talricanaati. ⁴⁷ Corri piatsa pacapa talricanaati Edom rico, icaamitsa pada caaconaite iwapacada niini. ⁴⁸ Josafat inaitja pia jorre iita macafianipe; naashopao Ofir ricojle nadee carro owirro njite, mitsa corri piatsa naawa ima tococopeca njaca iita macafianipe Ezior Geber rico toa. ⁴⁹ Niini Ococia, Acab irri icaite Josafat irso lricadaacarro lrirsoperri iacarro lrirsoperri iinai nerricoda njaji iita macafianipe. Mitsa Josafat icaite corrica. ⁵⁰ Mayami Josafat njite nadawani jlinirrinaipemi icodapitsa, lriferrimi David iyacalre ricó. Njite lrirritsa Joram italricanata jliapodam. ⁵¹ Nini Ocozia, Acab irri iinita italricanataca Irael naco Samaria lrico diecisiete oonia cayaami talricanaatca Josafat, Judá italricanaa. Yamawalria oonia lritalricanaataca Irael nacó. ⁵² Lrinaitja maatsi wa Minalri ipeyajle. Lrinaitja cayotsaji jlinirri, jlidoa inaitja capisho pia, njite Jeroboam, Nabat irri inaitja capisho pia tsacja. Lricadaa Irael inaitjaca maatsi. ⁵³ Lridenjí Baal irso njite lria tsacja matsiadalri lrirso caishopa lrikerroataca wa Minalri, na Diote njaji Iraelnai, cayotsa jlinirri inaitja capisho pia tsacja.