¹ Ni'u sa vinakatia monu kila na levu ni noqu lomaocaoca ena vukumunu, ena vukudra voki lia mai Leotisea, kei na vukudra kece lia era sa yali raici au vayago. ² Me vacegui na yalodra, me ra vaduavataki e na loloma, me nodra nai yau kece lia ni vuku era na kila dina sara kinia na ka vuni ni Kalou, io na Karisito; ³ o koya sa bini tu vua nau kece lia ni vuku kei na yalomatua. ⁴ Ia na ka koya kau sa kaya, de dua e temaki kemunu ena vosa vicavilaki. ⁵ E dina lia au sa tiko tani vayago, ia au sa tiko lia vayalo vei kemunu, ka marau ka raici kemunu ni nu sa duavata ka tu dei ena vabauti Karisito. ⁶ Ia ni dou vabauti Jisu Karisito Jisu na Turaga, mo dou ia tiko nai valavala sa vinaka vua: ⁷ dou tauyavutaki ka tara cake vua, ka vataudeitaki ena nomunu vabauta, me vaka dou sa vatavulici, mo dou uasivi cake ki na ka vavinavinaka. ⁸ Dou raicia vinaka de dua sa vacacani kemunu ena vuku vavuravura, sa yali yaga ka lasu voki lia, e vaka nai tukuni vatamata, e vaka nai vavuvuli vavuravura, ka sa yali vaka nai vavuvuli va-Karisito. ⁹ Ni sa tiko ena yagona na ka kece lia sa sinai kinia na Kalou. ¹⁰ Ia dou sa vutu ni ka kece lia vi koya; sa liutaki ira kece lia sa liu vata ki ira sa kaukauwa ko koya: ¹¹ ia dou sa cilivi voki lia ena vicilivi sa yali caka ena liga, ni dou sa luvatia nai valavala ca ena vicili sa caka ena vukui Karisito. ¹² Niu dou a bulu vata kaya e na papitaiso: o koya voki lia dou sa tu cake voki kaya ni dou sa vabautia na kaukauwa ni Kalou, o koya sa vaturi koya voki mai na mate. ¹³ Ia oi kemunu, no dou a mate tu enai valavala ca, ena vuku voki lia ni yagomudou say ali cili, sa qai vabulai kemunu vata kaya ko koya, ni sa yali ni cudruvi ita ena vuku ni noda valavala ca; ¹⁴ ni sa qusia nai vola liga ni vivakaro sa beitaki ita, sa noda meca tiko, sa yadia tani sara, ni sa vakotia vi na kauveilatai; ¹⁵ ia ni sa vacacani ira sa liu, vata ki ira sa kaukauwa, sa vasesevotuni ira, ni sa rawai ira sara ena vi ka ke. ¹⁶ O koya gona, me kua sara ni dua me lewai kemunu ena vuku ni kakana, se na ka me lausomi, se na siga ni so levu, se na vula vou, se na siga tabu: ¹⁷ qori lia na vatakarakara ni vi ka ena yaco mai muri; ia sa nei Karisito na yago. ¹⁸ Me kua ni tarovi kemunu e dua mai na kemunu sau, ni sa viavia yalomalumalumu ka daumasu vi ira na agilosi, ni sa doudou ena vika sa raicia ko konu, a sa dokai konu ena vuku ni yalona sa vakalewe, ¹⁹ sa yali tauria matua na Uluda, o koya sa dau tokonia kinia na yago kece, sa vikabiti vata, ena vuku ni visema kei na viwa, sa tubu ena tunu ni Kalou. ²⁰ Ia kevaka dou sa mate vata kei Karisito mai nai vavuvuli vavuravura, a cava dou sa muria tiko kinia na vivaro me vaka dou sa bula tiko vavuravura: ²¹ Kua ni tara; kua ni tovolea; kua ni qumia; ²² ena oti kece lia oqori, ni sa tauri tiko; ni ra sa vaka na vunau kei nai vavuvuli ni tamata? ²³ Ia e dina lia sa rairai me vuku na vika koya; ena viavia masu vata kei na yalomalumalumu kei na vararawatakia na yago; ka yali yaga, sa vamamautaki lia kinia na yago.