¹ جی اویَ کی خیلیَأن حکایت اَ اُموری کی اَمی ورجَه به آخر برِسه دَره یَ، تألیف بوکودد، ² و دوروست هوطویی بینیویشتد کی شاهدان عینی، و اونِ شاگردان اَمرَه بِرِسَنِه دَأرِد. ³ پس منم کی دقت اَمرَه جی اول، همه چیَه بررسی بوکوده دَأرم، اَطو صلاح بیدِم کی اَ امورَ به ترتیبِ اوشَأنِ تاریخ ایتفاق، تِرِه بینیویسم ای عالیجناب تِئوفیلوس، ⁴ تا جی دوروستی اون کلامی کی اونِ جَه تعلیم بیده دَأرید، یقین بدَأرید. ⁵ زمانی کی «هیرودیس» یهودیه پادشاه بو، کاهنی ایسَه بو «زکریّا» نام، جی فرقه «ابیّا» کی اونِ زن «الیزابت» نام دأشته و جی هارونِ نسل بو. ⁶ اوشَأن خدا نظرِ جَه دوروستکار بُد و هر دو نفر خداوندِ همه تَه اَحکام و فریضه یَانَ، بی عیب انجام دَئِد. ⁷ ولی اَوشَأن زَأک نَأشتِد، چره کی الیزابت نازا بو و هر دو نفر پیرَ بوسته بود. ⁸ ایبار کی زکریا گروه نوبه بو کی معبدِ دورون خدمت بوکونه، اون خدا حضور جَه خدمت کوده. ⁹ اوجور کی کاهنان رسم دَأشتِد، قُرعه اونِ نام دِکفت کی بیشه، و خداوندِ معبدِ قُدسَه داخلَ بِه و بوخور بوسوجَأنه. ¹⁰ وختی کی بوخور سوجأنِن دوبو، جمعیت بیرون ایسَه بود و دوعا کودد. ¹¹ ایمرتبه خداوندِ فرشته، مذبحِ بوخورِ راستِ طرفِ جَه بِئسَه و زکریایَ ظاهرَ بوست. ¹² زکریا کی اونَ بیدِه، تعجب بوکود و بِتِرسِه. ¹³ فرشته اونَ بوگوفت:«نوَء ترسِن زکریا، چره کی تی دوعا مستجاب بوبوسته و تی زن الیزابت، ترِه ایته پسر زَأیه و تو اونِ نامَ «یحیی» نیهی. ¹⁴ و اونِ بودونیا اَمونِ وَسی خوشی و شادمانی جَه پُرَه بی، و خیلیان اونِ بودونیا اَمونِ جَه خوشحالَ بود، ¹⁵ چره کی خدا نظر جَه پیلِه کس بِه، و شراب و مشروبِ مستی اَورَه لب نِزِنِه، و خو مارِه شِکم جَه، جی روح القدسِ پُرهَ بِه. ¹⁶ و خیلی جی بنی اسرائیلیانَ، به خداوندِ طرف، یعنی اوشَأنِ خدا وَأگردَنه. ¹⁷ اون الیاسِ روح و قدرت اَمرَه خداوندِ جَه پیشتر اَیِه، تا پئرانُ زَأکانَ آشتی بِدِه و نافرمانانَ، به عادلانِ راه طرف وَأگردَنه. تا ایته آماده قؤم، خداوند رِه چَأکونه.» ¹⁸ زکریا فرشته یَ بوگوفت:«چوطو باور بوکونم؟ چره کی من پیرم و می زنم پیرَ بوسته و ناتوانه.» ¹⁹ فرشته جواب بدَه:«من جبرئیلم کی خدا حضورِ جَه ایسم، و اوسه بوبستم تا تی مرَه گب بِزِنِم و اَ خبرَ تِرَه مُژده بِدِم. ²⁰ هَسَه تا اَ ایتفاق دِنکِفته لال بیهی و دِ نِتَأنی گب بزنی، چره کی می گبَأنَ کی حتماً خودشِ موقع ایتفاق دکفه یَ، باور نوکودی» ²¹ و جمعیت زکریا رافأ ایسَه بود و چون اونِ شوئون قُدسِ دورون اَقدر طول بِکِشِه بو تعجب بوکوده بود. ²² اما وختی بیرون بأمو نِتَأنِسته مردم اَمرَه گب بِزِنه، پس بفهمستد کی قُدس دورون رویایی بیده دَأره، اون فقط ایشاره کوده و گب نِزَئِه. ²³ وختی زکریا خدمت کودَأنِ دوره معبدِ دورون تومامَ بوست، وَأگردست خو خانه. ²⁴ ایتَه مدت بوگوذشت و اونِ زن الیزابت حامله بوبَست، و پنج ماه خانه میَأن بینیشت و بوگفت ²⁵ :«اَ کارَه خداوند مرِه بوکوده دَأرِه، و اَ روزَأن مرِه لُطف بوکوده و اونچی کی مردمِ ورجَه مره خار کوده یَه، اوسَده دَأره.» ²⁶ الیزابت شیش ماه حامله بو، کی جبرئیل جی خدا طرف بوشو شهرِ ناصره کی ایالتِ جلیلِ میَأن نَهَه بو، ²⁷ تا بیشه ایتِه باکره ورجَه کی اونِ نام «مریم» بو. مریمِ نامزد جی خاندان داوود بو و «یوسف» نام دَأشته. ²⁸ فرشته بوشو اونِ ورجَه و بوگفت:«سلام بر تو ای کسی کی مورد لُطفی، خداوند تی اَمرَیِه و تو همۀ زنان میَأن مُتبارکی.» ²⁹ مریم فرشته گبانِ جَه پریشانَ بوست و خو مرَه فکر بوکود، اَ سلام معنی چییسه. ³⁰ فرشته اونَ بوگفت:«نِوَء ترسِن مریم، چره کی خدا ورجَه ارزش پیدا بوکودی، ³¹ هسَه آبستن بی، پسری بودونیا اَوری کی وَأستی اونِ نامَ «عیسی» بنی. ³² اون پیلِه کس بِه و خدایِ متعالِ پسر دِخَأدِه بِه. خداوند خدا، اونِ جدّ، داوودِ تختِ پادشاهیَ اونَ عطا کونه. ³³ اون تا به اَبد خاندان یعقوبِ رو پادشاهی کونه و اونِ سلطنت هیچ موقع تمامی نَئرِه.» ³⁴ مریم فرشته جَه وَأورسه:«اَ چوطو ایمکان دَأره؟ چره کی هیچ مردی مرَه دس نزَه دَأره.» ³⁵ فرشته جواب بده:«روح القدس ترَه نازل بِه و خدایِ مُتعال خو سایه یِه قدرتَ، تی رو تَأوَده، هنِه وَسی او زأی مقدسِه، و خدا پسر دخَأدِه بِه. ³⁶ هَسَه الیزابت هم کی تی خویشانِ جَه یِه، پیری موقع حامله بوبسته و پسری در راه دَأره، و کسی کی نازا دخَأدِه بوسته، هَسَه شیش ماهه کی حامله یه. ³⁷ چون هیچ کاری خدا ورجَه محال نییه.» ³⁸ مریم بوگفت:«هسَه من خداوندِ کنیزم، خدا جَه خَأیم هوطویی کی بوگفتی بیبه.» اونموقع فرشته جی اونِ ورجَه بوشو. ³⁹ هو روزان، مریم ویریشت و توندی اَمره بوشو ایته شهری کی کوهستان یهودیه میأن نَهَه بو، ⁴⁰ و بوشو زکریا خانه و الیزابتَ سلام بوکود. ⁴¹ وختی الیزابت مریم سلام کودَأنَ بیشتَأوست، زَأک اونِ رحمِ دورون تکان بوخورد، و الیزابت روح القدس جَه پُرَ بوست ⁴² و صدای بلند اَمرَه بوگوفت:«تو زناکانِ میأن مُتبارکی، و تی حاصلِ رحم هم مبارکه ، ⁴³ من کیم کی می خداوندِ مار بَأیه می ورجَه؟ ⁴⁴ وختی تی سلام کودَأن صدا به می گوش فَأرسه، زَأی می رحمِ دورون جی شادمانی تکان بوخورد. ⁴⁵ و خوش به حال اونکی ایمان بأورد، چون اونچی کی جی خدا طرف اونَ بوگفته بوبَسته، حتماً انجام گیره» ⁴⁶ بازن مریم بوگوفت:«می جان خداوندَ شُکر کونه ⁴⁷ و می روح می ناجی خدا رِه، شادی کودَأن دِرِه، ⁴⁸ چره کی خو کوچی کنیزَ لُطف بوکوده، جی اَن پس همه نسلان مرَه خوشبخت دخَأنِده، ⁴⁹ چون اون قادر، مرِه پیلِه کارانی انجام بدَه دَأره. اونِ نام مُقدس بیبه، ⁵⁰ اونِ رَحمت نسل در نسل نَهَه بر اوشَأنی کی اونِ جَه ترسِد. ⁵¹ خداوندِ دس، قدرت اَمرَه کار بوکوده، و اوشَأنی کی خوشَأنِ دیلِ فکر میَأن مغرور بودَه پراکنده کوده دَأره. ⁵² ظالمانَه جی تختَان بیجیر فَأکِشِه دَأرِه، و فروتنانَ سربلندَ کودِه دَأره. ⁵³ ویشتایانَ چیزای خوب اَمرَه سِئرَ کوده، ولی دولتمندانَ خالی دس اوسه کوده. ⁵⁴ اون خو رحمتَ کی اَمی اجدادَ وعده بدَه بویَ به خاطر بأورده، و خو قؤم اسرائیل جَه حمایت بوکوده، ⁵⁵ هوطویی کی ابراهیم و اونِ نسلَ تا به اَبد وعده بدَه بو.» ⁵⁶ مریم در حدود سه ماه الیزابت ورجَه بِئسَه، بازن وَأگردست خو خانه. ⁵⁷ وختی الیزابتِ فارغ بوستن موقع بِرِسه، پسری بودونیا بَأورد. ⁵⁸ همساده یان و اونِ خویشَأن، وختی بیشتَأوستد کی خداوند چی پیلدانه لُطفی در حق اون بوکوده، اونِ مرَه شادی بوکودد. ⁵⁹ هشتمین روز رِه، اطرافیان، زَأکِ ختنه کودَأنِ رِه بأمود، و خَأستِد کی اونِ پئر زکریا نامَ اونِ رو بِنِد. ⁶⁰ ولی زَأیِ مار، مُلتفت بوبَست و بوگفت: «نه، اونِ نام وَأستی یحیی بیبه» ⁶¹ اونَ بوگفتد:«شیمی خاندان دورون کسی اَ نامَ نَئره.» ⁶² بَأزِن اونِ پئرَ ایشاره بوکودد کی:« اَ زَأیَ چی نام نیهی؟» ⁶³ اون ایته تخته بِخَأست و بینیویشت: «اونِ نام یحیی یِه» همه تَه حیران بِئسَأد، ⁶⁴ هو لحظه اونِ زبان وازَ بوست و شروع بوکود خدایَ ستایش کودَأن. ⁶⁵ همۀ همساده یان وحشت بوکودد و تمامی یهودیه کوهستان دورون، مردم درباره اَ موضوع گب زَأئِد. ⁶⁶ و هر کی ایشتَأوسته خو مرَه فکر کوده و گوفته:«اَن چوجور زَأیی بِه؟» چره کی خداوندِ دس اونِ اَمرَه بو. ⁶⁷ و اونِ پئر زکریا جی روح القدس پُرَه بوست، و نبوت بوکوده و بوگوفت: ⁶⁸ «متبارک بیبه خداوند، اسرائیلِ خدا، چره کی خو قؤمِ یاری رِه بأمویه و اوشَأنَ آزادَ کوده دَأره. ⁶⁹ اون اَمرِه خو خادم داوودِ نسلِ جَه ناجی یِه پُر قوّتی اوسه کوده. ⁷⁰ اون جی قدیم الایام خو پیغمبرانِ مقدسِ زبانِ جَه وعده بدَه ⁷¹ بو کی اَمرَه، اَمی دوشمنانِ دسِ جَه و همۀ کسایی کی اَمی جَه نفرت دَأرد، نجات دِهِه، ⁷² تا اَمی پِئرَأنَ رَحمت بوکونه و خو عهدِ مقدسَ به خاطر بَأوره، ⁷³ هون قسمی کی اَمی پئر، ابراهیمِ رِه بوخورد، ⁷⁴ کی اَمِرَه دوشمنِ دسِ جَه آزادَه کونه و اَمرَه یاری دِهِه کی اونَ بدونِ ترس عبادت بوکونیم، ⁷⁵ و همۀ اَمی عُمرَ اونِ حضورِ جَه، پاکی و عدالتِ اَمرَه بوگذرانیم. ⁷⁶ و تو ای زَأی جان، خدایِ مُتعالِ پیغمبر دِخَأده بی، چره کی خداوندِ پیش حرکت کونی، تا راهَ اونِ رِه آماده کونی. ⁷⁷ و اونِ قؤمَ آگاهَ کونی، کی خدا اوشَأنِ گوناهانِ آمرزشِ مرَه، اوشَأنَ نجات دِهِه. ⁷⁸ همۀ اَشَأن خدا رحمت و شفقتِ وَسی یِه، بزودی آفتاب تابان جی آسمان اَمِرِه طلوع کونه، ⁷⁹ تا کسایی یَ کی تاریکی و مرگِ سایه دورون ایسَدَه، روشنایی بِبِخشِه، و اَمرَه هدایت بوکونه کی صُلح و سلامتی راهِ میَأن، قدم بِنیم.» ⁸⁰ و یحیی رُشد کوده و روحِ میَأن قوی بوسته و بیابانِ میَأن ایسَه بو، تا روزی کی آشکارا قؤمِ بنی اسرائیلَ ظاهرَ بوست.