¹ ای غلاطیانِ نادان، کی شمره اَطو جادو بوکوده تا راستی یَ اِطاعت نوکونید؟ مگر شومَأن نوبوئید وختی مسیحِ مرگَ شمرِه توضیح بدم جوری مجذوب بوبُستید کی انگار هو لحظه مسیحَ خودتانِ چومِ اَمرَه دِئِن درید؟ ² فقط خَأیم اَنَ بدَأنم: روح القدسَ جی اعمالِ شریعت بدس بأوردید یا جی راهِ ایمان به اونچی کی بیشتَأوستید؟ ³ چره شیمی فکرَ بکار تَأنوَأدید؟ شومَأنی کی پیشترانِ رِه احکامِ مذهبی انجامِ اَمرَه نتَأنستید از نظر روحانی خدا مقبول بیبید، چوطویه کی هَسَه خیال کونید تَأنید جی هون راه مسیحیانِ روحانی تری بیبید؟ ⁴ آیا هَچین اون همه زحمتَ انجیلِ وَسی تحمل بوکودید؟ آیا خَأئید همه یَ فیشَأنید؟ پس واقعاً هَچین زحمت بکشه اید! ⁵ باز خَأیم شیمی جَه وَأورسم: خدا چی وَسی روح القدسَ شمرَه عطا کونه و شیمی میَأن معجزات انجام دِهه؟ آیا اَنِ وَسیه کی شومأن شریعتَ حفظ کونید؟ یا اَنِ وَسیه کی اونچی کی بیشتَأوسته ایدَ ایمان دَأرید؟ ⁶ هوطو کی ابراهیمم خدا وعده یانَ ایمان بأورد و اونِ رِه عدالت محسوب بوبُست. ⁷ پس دینید کسانی ابراهیمِ زَأکأند کی ایمانَ تکیه دَأرد، ⁸ و کیتاب چون پیشتر بیده کی خدا غیرِیهودیانَ بواسطۀ ایمانْ عادل به حساب اَوره، هَنه وَسی پیشاپیش ابراهیمَ بشارت بدَه کی:«همۀ قومَأن تی جَه برکت گیرد» ⁹ پس اوشَأنی کی ایمانَ تکیه کوند، ابراهیمِ ایماندارِ اَمرَه برکت گیرد. ¹⁰ و همۀ اوشَأنی کی خَأید شریعتِ اَعمالِ اَمرَه نجات پیدا کوند، در واقع خدا لعنتِ جیر ایسَأد، چره کی توراتِ میَأن بینیویشته بوبُسته:«مَلعون بیبه کسی کی حتی ایتَه جی شریعتِ دستورانَ بیشکینه.» ¹¹ پس واضحه کی هیچکی خدا حضورِ جَه شریعتِ جَه عادل به حساب نَأیه، «چون فقط کسی نجات پیدا کونه کی خدایَ ایمان بدَأره» ¹² ولی شریعتْ ایمانَ تکیه نَئره، هر کس هر کودامِ اَشَأنَ کامل عمل بوکونه نجات پیدا کونه، و مُطابقِ شریعتْ انسان زمانی نجات پیدا کونه کی همۀ شریعتِ احکامَ مو به مو و بی نقص انجام بده بِه. ¹³ مسیح اَمی جا لعنت بوبُست و اَطو اَمرَه شریعتِ لعنتِ جَه آزادَ کود. هوطو کی توراتِ دورون بینیویشته بوبُسته:«هر کسی یَ کی دارَ آویزانَ کوند ملعونه» ¹⁴ خدا اَ کارَ بوکود تا هون برکتی کی ابراهیمَ وعده بدَه بویَ بواسطۀ مسیحِ عیسی غیرِیهودیانِ نصیب بوکونه، و هَسَه اَمَأن مسیحیانم تَأنیم روح القدسِ موعودَه جی هَ راهِ ایمان دریافت بوکونیم. ¹⁵ ای برأرأن، وَألید اَمی زندگی روزمره جَه مثالی بأورم. حتی اَمی زندگی روزمره دورونم هیچکس نتَأنه ایتَه عهد و قراردادِ انسانی یَ کی رسمیت دَأره باطلَ کونه یا چیزی اونَ اضافَه کونه. ¹⁶ هَسَه وعده یانی ابراهیم و اونِ نسلَ فَأدَه بوبُست، ولی نوگویه «نسلانْ» جوری کی خیال بوکون دربارۀ خیلیان بیبه، بلکی گویه «تی نسلَ» کی منظور اینفر یعنی مسیحه. ¹⁷ هَسَه می منظور اَنه، شریعتی کی چهارصد و سی سال بعد بأمو، عهد و پیمانی کی خدا پیشتر دوَسته بویَ باطلَ نوکوده، جوری کی خدا وعده باطلَ بِه. ¹⁸ چون اگر قرار بیبه نجات جی راهِ شریعتِ انجام دَئَن بدس بأیه، پس نجاتِ رَوش، اونْ روشی اَمرَه کی ابراهیم بواسطۀ اون خدا مقبول بوبُست، فرق کونه. چون ابراهیم تنها کاری کی انجام بدَه خدا وعده یانَ ایمان بأورد. ¹⁹ پس شریعت چیسه؟ شریعت بعدِ خدا وعده یان بأمو تا انسانَ نشان بده کی خدا احکامَ ندَأره و گوناهکاره! ولی شریعتِ روشْ وَأستی تا مسیحِ اَمونِ موقع ادامه پیدا کونه، یعنی هون نسلی که خدا ابراهیمَ وعده بدَه بو. اَیَ ایته فرقِ دیگرم نَهه، خدا خو شریعتَ بواسطۀ فرشته یان موسی یَ عطا بوکود تا اونم مردمَ فَأده، ²⁰ ولی خدا خو وعده یَ ابراهیمَ مستقیم فَأدَه، بدونِ اَنکی واسطه ایی در کار بیبه، یعنی واسطه ایی فرشته یانْ یا موسی مَأنستَأن. ²¹ پس آیا شریعت بر خلافِ خدا وعده یانه؟ هیچموقع! چون اگر اَمَأن بتَأنسته بیم شریعتِ احکامِ عمل کودَأنِ اَمرَه نجات پیدا کوده بیم، دِ لازم نوبو کی خدا راهِ دیگری یَ اَمی آزادی رِه اَمرَه نشان بده. ²² چون خدا کلام فرمایه همۀ اَمَأن گناه چنگِ جَه اسیریم. مسیح تنها راهِ اَمی آزادیه تا اونچی کی وعده بدَه بوبُسته بو بر پایۀ ایمانِ به عیسی مسیح ایماندارانَ عطا بیبه. ²³ پیشتر جی اَنکی مسیح بأیه، همۀ اَمَأن شریعت و قوانینِ مذهبی زندانِ دورون گرفتار بوئیم، و تنها اَمی اُمید اَن بو کی اَمی نجات دهنده بأیه و اَمرَه آزادَ کونه. ²⁴ پس شریعت اَمی مُربی بوبُست تا مسیح بَأیه و بواسطۀ ایمانْ عادل به حساب بأئیم. ²⁵ ولی هَسَه کی ایمان بأمو دَأره دِ اون مربی زیر دس نِئسَه ایم. ²⁶ شومَأن همه تَه بواسطۀ ایمان به مسیحِ عیسی، خدا زأکأنید. ²⁷ چون همۀ شومَأن کی مسیحْ نامِ اَمرَه تعمید بیگیفتید، جزئی جی مسیحِ وجودْ بوبُستید و مسیحَ دوکوده اید. ²⁸ دِ فرقی نوکونه کی یهودی بیبید یا غیرِیهودی، غلام بیبید یا آزاد، مرد بیبید یا زن، چره کی همۀ شومَأن مسیحِ عیسی میَأن ایتَه اید. ²⁹ و هَسَه کی مسیح شین بوبُسته اید، ابراهیمِ نسل هم ایسید، پس همۀ وعده یانی کی خدا ابراهیمَ بدَه بو شمرَه تعلق گیره.