¹ بعدِ چهاردَه سال ایبار دیگر برنابا مرَه بوشوم اورشلیمْ، و تیتوس هم می اَمرَه بوبوردم. ² ولی می شوئون خدا دستورِ اَمرَه بو تا بتَأنم دربارۀ انجیلی کی غیرِ یهودیانِ میَأن اعلام کونم، می برأرأنِ اَمرَه گب بزنم. من کلیسا رهبرانِ اَمرَه خصوصی جلسه بیگیفتم و اوشَأنِ اَمرَه مشورت بوکودم، نوکونه هَچین مرَه دُووم یا بودووَسته دَأرم! ³ و خوشبختانه اوشَأن مخالفتی نوکودد و حتی می همسفر تیتوسَ کی یونانی بو مجبور نوکودد کی ختنه بیبه. ⁴ و اَ مسئلۀ ختنه یَ مسیحیانِ دروغین پیش فَأکشه بود، اَ برارانِ دوروغینَ، مقاصدِ نادوروستِ وَسی اَمی میَأن اوسه کوده بود، اوشَأنْ بامو بود اَمی جمعِ دورون تا اون آزادی ایی کی مسیحِ دورون دَأریمَ جاسوسی بوکوند و، اَمرَه خوشَأنِ قوانین و اَحکامِ بَرده چَأکوند. ⁵ ولی اَمَأن ایتَه لحظه هم اوشَأنِ تسلیم نوبوستیم تا انجیلِ راستی و حقیقت شیمی میَأن محفوظ بمَأنه. ⁶ و اون رهبرانِ سرشناس و مُعتبر هم چیزی می پیغامِ مُحتوایَ اضافَه نوکودد، هر چند اَنم بوگویم اوشَأنْ هر کی بوبود مرِه فرقی نوکونه و اوشَأنِ مقام و منصب هیچ تأثیری می رو نَئره، چره کی خدا انسانِ ظاهرَ قضاوت نوکونه. ⁷ بلکی برعکس هم بوبُست و اوشأنْ وختی بیدد غیرِیهودیانِ بشارت دَئَنِ وظیفه مرَه بیسپُرده بوبُسته، هوطو کی یهودیانِ بشارت دَئَنْ پطرسَ، ⁸ و چون اونی کی بواسطۀ پطرس یهودیانِ میَأن عمل کونه، می جَه هم ایتَه رسولِ مَأنستَأن غیرِیهودیانِ میَأن عمل کودَأن دره، ⁹ مرَه تشویق بوکودد. پس وختی یعقوب و پطرس و یوحنا کی کلیسا ستونانَ معروفد اون فیضی کی مرَه عَطا بوبُسته دَأره یَ بیدد من و برنابا مرَه دستِ رفاقت فَأدد و قرار بوبُست کی اَمَأنْ غیرِیهودیانِ طرف بیشیم و اوشَأن یهودیانِ طرف. ¹⁰ فقط بخاستد کی فقیرانَ به یاد بدَأریم کی البته اَن چیزی بو کی خودمم اونِ ره اشتیاق دَأشتم. ¹¹ ولی وختی پطرس بأمو اَنطاکیه، اونِ روبرو اونِ اَمرَه مخالفت بوکودم و اونَ سرزنش بوکودم، چره کی واقعاً مُقصر بو. ¹² چون پیشتر جی اونی کی بعضی جی کلیسا رهبرانْ یعقوبِ طرفِ جَه بَأیدْ، اونْ غیرِیهودیانِ اَمرَه همسفره بوسته و غذا خورده، ولی هَطو کی اوشَأن بأمود خورَه کنار فَأکشه و دِ غیرِیهودیانِ اَمرَه غذا نوخورد، چون ترسِه ئه کی مسیحیانِ یهودی نژاد اونِ کارِ جَه ایراد بیگیرد. ¹³ بازن باقی مسیحیانِ یهودی نژادم اونِ کارِ جَه تقلید بوکودد و اَ ریاکاری یَ انجام بدد، بحدی کی برنابا هم جی راه بدر بوبُست. ¹⁴ وختی اَ مسئله یَ متوجه بوبُستم کی چوطو بر خلافِ خودشانِ ایمان و انجیلِ حقیقت رفتار کوند، جمعِ میَأن پطرسَ بوگوفتم:«تو خودت یهودی ایسی ولی غیرِیهودیانِ مَأنستَأن رفتار کونی نه یهودیانِ مَأنستَأن، پس چوطویه کی غیرِیهودیانَ مجبور کونی یهودیانِ شریعتَ بدارد؟» ^{15 16} اَمَأن کی یهودی ایم و نه به اِصطلاح غیرِیهودی گوناهکار، دَأنیم کی انسانْ شریعتِ اعمالِ انجام دَئَنِ اَمرَه بی گوناه به حساب نَأیه، بلکی ایمانِ به عیسی مسیح اَمرَه پاک و بی گناه به حساب اَیه، پس خودمانم مسیحِ عیسایَ ایمان بأوردیم تا ایمانِ اَمرَه بی گوناه به حساب بَأئیم نه شریعتِ اعمالِ اَمرَه. چون جی شریعتِ اَعمالْ هیچ بشری عادل به حساب نَأیه. ¹⁷ ولی اگر نجاتِ رِه مسیحَ ایمان بأوریم و بازن متوجه بیبیم کی کارِ اشتباهی بوکوده ایم، و نجاتْ بدونِ یهودِ شریعت بدس نَأیه، اونموقع چی بِه؟ آیا وأستی خیال بوکونیم مسیحْ اَمی بدبختی باعث بوبُسته؟ نه، هیچموقع. ¹⁸ بلکی برعکس، اگر اَمَأن دوباره وَأگردیم اَمی عقایدِ کهنه طرف، و فکر بوکونیم کی نجات فقط بواسطۀ شریعتِ اَعمال بدس اَیه، اَنَ مَأنه کی اونچی کی خرابَ کوده بیمَه دوباره چَأکونیم، اَطو کاملاً مشخصه کی تقصیر خودمانِ شینه. ¹⁹ چون من شریعتِ مطالعه مرَه بفهمستم کی شریعتِ مرَه، و دستوراتِ مذهبی حفظ کودَأنِ مرَه هیچموقع نتَأنم خدا مقبول بوبوم. و فقط ایمان به عیسی مسیح اَمرَه یه کی تَأنم خدا حضورِ جَه زندگی بوکونم. ²⁰ وختی مسیح مصلوب بوبُست، در حقیقت منم اونِ اَمرَه مصلوب بوبُستم، پس دِ من نییِم که زندگی کونم، بلکی مسیحه کی می دورون زندگی کونه، و اَ زندگی ایی کی هَسَه اَ جسمِ دورون دَأرمْ نتیجۀ می ایمانْ، به خدا پسره کی مرَه محبت بوکود و خو جانَ می وَسی فَدَه. ²¹ خدا فیضَ باطلَ نوکونم، چون اگر قرار بو نجات جی راهِ اعمال مذهبی و شریعت بدس بَأیه، پس مسیح هَچین بمرده و نیازی نوبو کی خو جانَ اَمرِه فَده.