¹ Ihehe kuiswa mavhu, kusvipiswa, dhorobha rinotambudza!. ² Arizi kupurutana kuizwi; arizi kuashira kupangwa. Arizi kugonda munaMambo Mwari; arizi kukwedzera pasinde naMwari waro. ³ Vakuru varo vari mukati mwaro imhondoro dzinobhonga; vatongi varo mathika emadeekoni asikasiyi chiro metsa nechimangwani. ⁴ Vaprofeti varo avana ndaa nezviro, vanhu vasikagondeki; vapristi varo vasvipisa ndau yakacheneswa, vagura mupango. ⁵ Mambo Mwari uri mukati mwayo wakarurama; aaiti zvakashata. Mangwanani eshe unoita kutonga kwake mambakwedza, amwe ngaamwe aakoreri akadi; asi vasikazi kururama avazii kutsveruka. ⁶ Ndauraya madzinza; masvingo awo aita matongo; ndaita kuti mapato awo aite shango, kuti pasaa naumwe unohamba ndiwo; madhorobha awo aparadzwa, amuna munhu, amuna nounogaramwo. ⁷ Ndakati, ‘Ngegwinyiso rinozonditya, rinozoashira kupangwa; arizokoreri kuona zveshe zvendaunza padera paro.’ Asi vakapinda kudisa kuita zviito zvavo zveshe kuti zvisvipiswe. ⁸ Ndizvo ndigarirenyi,” unoronza Mambo Mwari, “Metsa pazuva rendinozomiruka kuita uchapupu. Ngokuti kugura kwangu kuti ndiunganidze madzinza, kuti ndiunganidze umambo, kudurura padera pahwo ushungu hwangu, kweshe kupisha kwoushungu hwangu; ngokuti mumuriro wendurumwa dzangu nyika yeshe inozopedzwa. ⁹ Panguva iyo ndinozotsandura kuereketa kwevanhu kuti kuite kuereketa kwakaperera, kuti veshe vakumbire ngezina raMambo Mwari, kumudira ngomwoyo umwe. ¹⁰ Kubvira ngoruseri rwendwizi dzeEthiopia vanhu vangu, vakaparadzwa vangu, vanozounza zvipo zvangu. ¹¹ Pairo zuva auzotsverudzwi ngezviito zvako zveshe, izvo zvewakandirwisa ndizvo; ngokuti zvino ndinozodusa kubva pakati pako vanodakara mukudzikudza, newe auchazodzitunhumadzi mumutunhu wangu wakachena. ¹² Asi ndinozorekera pakati pako vanhu vanotambudzika nevanourombo. Vanozotsvaka pokuhwara ngezina raMambo Mwari. ¹³ Vakasara vaIsuraeri avazoiti zvakashata, nokuti kuereketa manyepo; norurumi runochengedzera aruzooneki mumuromo wavo. Zvino vanozodya nokuata pashi, akunazve unozovatyisidzira”. ¹⁴ Emba kakurutu, O mwanasikana weZioni; daidzira, O Isuraeri! Dakara nokudakadzwa ngomwoyo wako weshe, O mwanasikana weJerusarema! ¹⁵ Mambo Mwari wakadusa kutongwa kwako, warasha gaa rako. Mambo waIsuraeri, Mambo Mwari, uri pakati pako; auchazotyi zvakashata nakamwe. ¹⁶ Pairo zuva kunozoronzwa kuneJerusarema kuti, “Usatya, O Zioni; usatenda kuti nyara dzako dzipere simba. ¹⁷ Mambo Mwari, Mwari wako, uri pakati pako, ngwazi inopa kunyisa; unozodakara padera pako ngokudakadzwa; unozozorora murudo rwake, unozodakara ndiwe ngokuemba, ¹⁸ kudai ngepazuva redhiri. Ndinozodusa kubva kweuri kutambudzika, kuitira kuti usazoremerwa ngokushoorwa. ¹⁹ Ringira, ngouwo mukuwo ndinozotonga veshe vanokutambudza. Neni ndinozoponesa wakaremara, nokuunganidza wakadzingwa; ndinozotsandura kutsverudzwa kuita kukudzwa nembiri kunyika dzeshe. ²⁰ Panguva iyo ndinozomuunza kanyi, panguva apo pendinozomuunganidza; ngokuti ndinozomupa mbiri nokukudzwa pakati pevanhu veshe venyika, apo ndinozohwirinza ubatwa hwenyu pamberi pemadziso enyu,” unoronza Mambo Mwari.